1 Samuyele 19

Devedi mbwaakapenzegwa a Saulu

1Lino Saulu wakaambila mwanaakwe Jonatani ababelesi bakwe boonse kuti bajaye Devedi. Pele Jonatani wakali kuyanda Devedi kapati. 2Nkaako Jonatani wakacenjezya Devedi kuti, “Taata uyandaula nzila yakukujaya, lino juunza cifumo-fumo ukacenjele loko ukayube. 3Mebo ndaboola kuzooima ataata musokwe, kumbali akooko nkoyubide, nzooambaula kuli taata zyanduwe, kuti naa ndikamvwe cimwi cintu nzookwaambila.”

4Mbombuboobu mbwaakacita, wakalumbaizya Devedi kuli wisi wakati, “O Mwami, utabisizyi mubelesi wako Devedi, nkaambo taakwe naakubisizya, alimwi milimo njakucitila njampindu. 5Wakalisanga naakalyaaba kuti ajaye Mufilisiti uulya, mulinguwe Mwami Leza wakazundila Baisilayeli boonse. Nkabela ayebo wakalibonena alimwi wakakondwa. Ino nkaambo nzi noyanda kubisizya muntu uutakwe mulandu mbuli kujaya Devedi kaatakwe akaambo?”

6Lino Saulu naakamvwa majwi aa Jonatani, wakakonkezya kuti, “Mbubonya mbuli Mwami Leza mbwali mmumi, Devedi takoojaigwa pe.” 7Kumane Jonatani wakaita Devedi wakamwaambila makani aaya oonse. Lino Jonatani wakaleta Devedi kuli Saulu, nkabela wakakkala akumubelekela mbubonya mbuli lyoonse.

8Alimwi kwakaba nkondo, Devedi wakainka kuyoolwana a Bafilisiti, eelyo wakabajaya kapati cakunga bakatija.

9Lino muuya mubi uuzwa ku Mwami Leza wakasikila Saulu, nkabela kakkede muŋanda kumwi kajisi asumo Devedi wakali kuuma kalumbu. 10Lino Saulu wakasoleka kuyasa Devedi asumo kuti amubbaatikizye kubwaanda. Pele wakaleya, aboobo sumo lyakaakuyasa bwaanda. Mpawo Devedi wakatija walivuna.

11Lino masiku aayo ngoonya Saulu wakatuma bantu kuŋanda ya Devedi kuti bakayubilile, kutegwa azoomujaye bwazooca cifumo-fumo. Pele Mikalo mukaintu wa Devedi wakacenjezya mulumaakwe kuti, “Kuti naa sunu masiku utatiji juunza uzoojaigwa.” 12Mpoonya aawo Mikalo wakainzya Devedi ampulungwido mpati, wakacita kuti Devedi atije. 13Aawo Mikalo wakabweza mutuni wuulazika abulo, wabikka cilitulisyo caboya bwampongo kumutwe wawo akuuvumba ngubo. 14Ciindi Saulu naakatuma bantu kuzoojata Devedi, Mikalo wakati, “Waciswa.” 15Mpoonya Saulu wakabatuma kuyoobona Devedi. Wakati, “Mukamulete kuno, mukamutembe abulo kuti nzoomujaye.” 16Ciindi batumwa nibakapiluka, bakabona kuti mmutuni wakalede kumitwe kwakali boya bwampongo. 17Naakamvwa Saulu wakati kuli Mikalo, “Ino nkaambo nzi noondicenga boobu? Nkaambo nzi ncooleka sinkondoma kuti atije?”

Mikalo wakaingula Saulu kuti, “Wandaambila kuti, ‘Ndileka, nduunke, watandileka ndakujaya.’”

18Lino Devedi wakatijila kuli Samuyele ku Lama akuyoomwaambila zyoonse eezyo Saulu nzyaakamucita. Mpoonya walo a Samuyele bakainka kuyookkala ku Naiyoti. 19Nkabela Saulu wakaambilwa makani aakuti, “Devedi uli ku Naiyoti ku Lama.” 20Saulu wakatuma bantu kuyoojata Devedi. Nibakabona nkamu yabasinsimi kabasinsima, awalo Samuyele kaimvwi mbuli silutwe wabo, mpoonya Muuya wa Leza wakabaselukila batumwa ba Saulu, eelyo abalo bakasinsima. 21Saulu naakaambilwa zyabaabo, wakatuma bambi, abalo bakaakusinsima mbubonya. Alimwi Saulu wakatuma abambi, abalo bakaakusinsima. 22Mpoonya lwakwe kumugama, wakainka ku Lama, wasika kumukalo ku Seku. Wabuzya kuti, “Ino Samuyele a Devedi bali kuli?” Umwi wakati, “Bali ku Naiyoti ku Lama.” 23Eelyo Muuya wa Leza wakamuselukila mane do naakaakusika ku Naiyoti ku Lama. 24Eelyo awalo wakasamununa zibaki zyakwe, wakasinsima kumbele lya Samuyele, wakalala ansi amantanda sikati amasiku woonse. Ncenciceeco ncokutegwa, “Sena awalo Saulu musinsimi?”

Currently Selected:

1 Samuyele 19: Tonga96

Highlight

Copy

Compare