1 Samuyele 2

Kukomba kwa Hana

1Hana wakakomba wakati,

“Moyo wangu uliboteledwe mu Mwami Leza mu Mwami Leza mwendijana nguzu.

Ndilabaseka basinkondoma,

Nditangede nkaambo Mwami Leza wandizundya basinkondoma.

Ndiliboteledwe nkaambo wandifutula.

2“Taakwe uusalala mbuli Mwami Leza,

taakwe uumbi uuli mbuli nguwe pe,

taakwe mwaala uuli mbuli Leza wesu.

3Amuleke kulisumpula,

majwi aakulinonomona mwaaleke.

Nkaambo Mwami Leza ngu Leza uuzi,

alimwi nguubeteka eezyo zicitwa abantu.

4Mata aabasilumamba basinguzu alatyoka,

pele bateteete baba mbabasinguzu.

5Aabo bakazuzizye ono baya basunza,

pele bakafwide nzala mbabali muceyo.

Awalo mukaintu watakali kuzyala wazyala bana bali ciloba,

pele ooyo wakajisi dwi lyabana taacikwe aomwe pe.

6Mwami Leza nguuleta lufu akupa buumi,

ngonguwe nguutola bantu kucikkalilo cabafu,

alimwi ngonguwe nguubabusya kuzwa nkuko.

7Mwami Leza nguucetaazya akuvubya,

Nguubombya bamwi akubasumpula bamwi.

Nguugwisya babulide kucitantaala catwe

akubakkazika antoomwe abami akubabikka muzyuuno zyabulemu.

8Zyoonse ntalisyo zyanyika nzya Mwami Leza,

alinzizyo mpabumbide nyika.

9“Ulakwabilila buumi bwabantu bakwe basyomeka,

pele babi balazimaana mumudima,

nkaambo taakwe muntu uukonzya kuzunda munguzu zyakwe mwini.

10Nkabela basinkondonyina Mwami Leza bayoonyonyoonwa,

uyoozuma kuzwa kujulu.

Mwami Leza uyoobeteka nyika yoonse mbwiibede,

uyoopa nguzu kumwami wakwe,

akuyoosumpula nguzu zyamunanike wakwe.”

11Mpoonya Elikana wakapiluka kumunzi ku Lama, pele mulombe wakasyaala mu Syilo, akukutaukila Mwami Leza kalangwa amupaizi Eli.

Bana balombe ba Eli

12Lino bana ba Eli bakali bantu babi, taakwe nibakali kuswiilila Mwami Leza pe. 13Mboobu mbubakali kucita. Kwanoonga ciindi mwaalumi naleta cituuzyo cakwe kucipaizyo, mubelesi wamupaizi wali kuza aciyasyo camala otatwe, 14ciindi nyama niicibila, wali kuyasa aciyasyo mumpoto, nkabela kufumbwa cituli cayaswa cakali kuba camupaizi. Baisilayeli boonse bakalikuza ku Syilo mbubakali kubacita oobo bana ba Eli. 15Kunze lyakooku, bakali kunga mafuta kaatanatentwa mubelesi wamupaizi wali kusika akwaambila uupaizya kuti, “Ndipa nyama njokele mupaizi, nkaambo tayandi nyama iijikidwe.”

16Pele kuti naa muntu ooyu waingula kuti, “Akusaangunwe kutenta mafuta, notitole mbuli mboyanda,” mubelesi wamupaizi wali kwaamba kuti, “Peepe. Kondipa lino. Kuti utandipi ndakunyanga.”

17Mbombuboobu zinyonyoono zyabana ba Eli mbuzyakakomena ku Mwami Leza, mukuti bakali kusampaula zituuzyo zya Mwami Leza.

Samuyele ku Syilo

18Lino Samuyele wakali kubeleka kumbele lya Mwami Leza lyoonse. Wakali kusama kabaki kabupaizi kategwa efodi. 19Alimwi banyina bakali kumutungila jansi mwaka amwaka. Bakali kumutolela ciindi ncibakali kuunka amulumi wabo kukupa zipaizyo zyamwaka amwaka. 20Eelyo Eli wakali kuleleka Elikana amukaintu wakwe amajwi aakuti, “Mwami Leza kacikupa abambi bana kwiindila mumukaintu ooyu, bayootola busena bwayooyu ngookatuuzya ku Mwami Leza.” Bamana bakali kubweeda kulimbabo.

21Leza wakafwida Hana luzyalo, nkabela wakazyala abambi bana balombe botatwe abasimbi bobilo. Elyo mwana Samuyele wakakomena kabelekela Mwami Leza.

Eli abana bakwe balombe

22Lino Eli wakalicembeede kapati. Nkabela lyoonse wakali kumvwa nzibakali kucita bana bakwe balombe ku Baisilayeli, ambubakali kweenda abakaintu aabo bakali kubelekela kumulyango watente lyakuswaanganina lya Mwami Leza. 23Aboobo wakati kulimbabo, “Nkaambo nzi nomucita zintu eezi? Bantu boonse balandaambila zintu zibi nzomucita. 24Peepe bana bangu, amuleke. Nkaambo taili mpuwo mbotu njemvwide eeyo bantu ba Mwami Leza njobamwaamba. 25Kuti naa umwi wabisizya muntunyina, Leza ulamukombelezezya, pele kuti naa wabisizya Mwami Leza, ino nguni uunga wamukombelezezya?” Pele nikuba boobo tiibakaswiilila majwi aawisi, nkaambo ooku kwakali kuyanda kwa Mwami Leza kuti bafwe.

26Lino Samuyele wakali kuya bukomena, akukkomanisya Mwami Leza abantu.

Muntu wa Leza mbwaakasinsima zyamukwasyi wa Eli

27Lino kwakasika muntu wa Leza kuli Eli amakani aaya kuzwa ku Mwami Leza wakati, “Ciindi sikale wanu Aloni amukwasyi wakwe nibakali bazike ba Falo munyika ya Ijipiti, ndakaliyubununa lwangu kulinguwe. 28Kuzwa kumisyobo yoonse ya Isilayeli ndakasala sikale wanu kuti abe mupaizi wangu, uundibelekela kucipaililo, kuti katenta tununkilizyo, akusama kaefodi muŋanda yangu. Alimwi ndakapa mukwasyi wakwe kutola caabilo cazipaizyo zitentwa a Baisilayeli acipaililo. 29Ino nkaambo nzi nomuubaula zituuzyo azipaizyo nzendakalailila kuti zipegwe kulindime? Ino nkaambo nzi yebo Eli ncoyandisya bana bako kwiinda ndime nobalekela kulineneesya lwabo azituli eezyo zyoonse zibotu zyazipaizyo zindipa bantu bangu? 30Mebo, nde Mwami Leza wa Isilayeli, ndakasyomezya muciindi cakale kuti, mukwasyi amikowa yanu iyoondibelekela kuba bapaizi muciindi coonse. Pele lino ndaamba kuti, peepe, tacikonzeki pe. Nkaako ndiyoolemeka baabo bandilemeka, pele aabo bandisampaula ambebo ndiyoobaubaula. 31Masimpe, mazuba aazoosika ciindi nendiyoojaya bana balombe boonse mumukwasyi amumukowa wako, kutegwa kutakabi muntu naba omwe mumukwasyi wako uutikoongole. 32Lino mumapenzi aako uyoonyomenenwa zyoonse nzenjoopa ku Baisilayelinyoko, pele ncobeni taakwe naba omwe wamumukwasyi wako uyooongola pe. 33Ooyo uuyoosyaala kandibelekela kucipaililo uyoobaya akuusa mumoyo wakwe, nkabela bana boonse baluzubo lwako bayoofwa lufu lwakujaigwa kabacili acijatilo canzoka. 34Ziyoocitika ku bana bako, Hofuni, a Fineyasi ciyooba citondezyo kulinduwe, boonse bayoofwa buzuba bomwe. 35Njoolisalila mupaizi ooyo uusyomeka kulindime akucita zyoonse eezyo nzeyanda. Ndiyoomupa mukwasyi uyoondibelekela lyoonse kumbele lya munanike wangu. 36Bana boonse baluzubo lwako banoocipona, banooyooinka kulinguwe akumukumbila tuli nikaba kakulya, akumukumbila kuti, ‘ndizumizya kuti ndigwasilizye bapaizi kuti ndijanine kakulya.’”

Currently Selected:

1 Samuyele 2: Tonga96

Highlight

Copy

Compare