1 Samuyele 1
1
Makani aa Elikana amukwasyi wakwe ku Syilo
1Kwakali mwaalumi wamusyobo wa Efulemu, uutegwa Elikana, wakali kukkala mumunzi wa Lama, munyika yatulundu-lundu ya Efulemu. Elikana wakali mwanaa Jelohamu, mwana wa Elihu, mwanaa Tohu baciinga ca Zufu, wamusyobo wa Efulemu. 2Elikana wakalaalikide, mukaintu umwi wakali Hana, umwi wakali Penina. Penina wakazyede bana, pele Hana wakanyina aomwe.
3Lino mwaka amwaka Elikana wakali kuunka kuzwa kumunzi wakwe kuyookomba akupa zipaizyo ku Mwami Leza Singuzuzyoonse ku Syilo, ooko Hofuni a Fineyasi, bana ba Eli nkobakali bapaizi ba Mwami Leza. 4Nkabela kufumbwa ciindi Elikana naakali kupa cipaizyo cakwe, wakali kwaabanya caabilo caco kuli Penina, akuli umwi aumwi wabana bakwe balombe abasimbi. 5Pele nikuba kuti wakali kuyandisisya Hana, wakali kumupa caabilo comwe buyo, nkaambo Mwami Leza taakamupede bana. 6Nkaako Penina ngwakaalikidwe limwi wakali kumunyetaukila, nkaambo Mwami Leza taakamupede luzyalo. 7Eeci cakali kucitika mwaka amwaka, lyoonse nibakali kuya kuŋanda ya Mwami Leza, Penina wanoonga upenzya Hana akumulizya, cakuti Hana taakwe anaakali kulya pe. 8Elikana mulumaakwe wakali kubuzya Hana kuti, “Ino nkaambo nzi ncolila akuumbaalilwa? Nkaambo nzi notalyi? Sena kulinduwe nsiindi bana balombe bali kkumi?”
Hana a Eli
9Cimwi ciindi kabali ku Syilo, nibakamana kulya, Hana wakainka kuyookomba. Eli mupaizi wakalikkede mubusena bwakwe kumbali aamulyango waŋanda ya Mwami Leza. 10Nkabela Hana wakaluuside kapati, naakali kukomba ku Mwami Leza wakali kulilisya. 11Wakakonkezya wati, “O Mwami Leza Singuzuzyoonse, ndibona. Bona mapenzi aangu alimwi kondiyeeya! Utandilubi, O Mwami wangu! Kuti naa wandipa mwana mulombe, ndasyomezya kuti njoomupa kulinduwe mubuumi bwakwe boonse, nkabela taakwe anatikagelwe pe.”
12Lino Hana kacikomba ku Mwami Leza, Eli mupaizi wakali kulangisya milomo yakwe. 13Wakali kukomba cacuumunizi kakuputa buyo milomo, pele majwi aakwe taakali kumvwigwa pe. Nkaako Eli wakayeeya kuti wakolwa. 14Eli wakati, “Ani unookoledwe kusikila lili? Koya ukakololokwe.”
15Aawo Hana wakaingula kuti, “Peepe, simalelo wangu nsinywide waini niciba cimwi cikola pe! Pele nduuside kapati, aboobo ndililila Mwami Leza akaambo kaceeci. 16Utayeeyi kuti ndimukaintu mubi pe. Ndali kukomba nkaambo ndipengede kapati mumoyo wangu.”
17Eli wakati, “Koya muluumuno, nkabela Leza wa Isilayeli akupe ceeco ncooli kumukumbila.”
18Hana wakati, “Kondifwida luzyalo lyoonse ndemubelesi wako.” Mpoonya aawo Hana wakanyamuka, wainka wakaakulya alimwi taakacuuside.
Kuzyalwa kwa Samuyele ambwaakapegwa ku Mwami Leza
19Elikana amukwasyi wakwe bakabuka cifumo-fumo, bakakomba Mwami Leza, bamane bakajokela kumunzi ku Lama. Nkabela Elikana wakasandukila Hana, eelyo Mwami Leza wakakuvuwa kukomba kwa Hana. 20Mpoonya wakamita wakazyala mwana mulombe. Wakamuulika kuti Samuyele, nkaambo wakati, “Ndakamukumbila buya kuzwa ku Mwami Leza.”
21Elikana amukwasyi wakwe bakainka ku Syilo kuyoopa zipaizyo ku Mwami Leza zyamwaka acimwi cipaizyo cilibedelede eeco ncaakasyomezezye. 22Pele Hana taakwe naakainka pe, wakaambila mulumaakwe kuti, “Kufumbwa buyo mwana aakulesegwa, ndiyoomutola kuŋanda ya Mwami Leza akuyoomupa kulinguwe, ooko nkwayookkala kwabuumi bwakwe boonse.”
23Eelyo Elikana wakaingula kuti, “Cita kufumbwa ncoyeeya kuti ncibotu, kkala mumunzi mane kusikila ukamulesye, nkuti buyo kube mbuli Mwami Leza mbwayanda.” Nkaako Hana wakasyaala mumunzi kalela mwanaakwe mane kusikila naakamulesya.
24Lino Hana naakalesya mwana, wakamutola ku Syilo, wakatolelezya amoombe wamyaka yotatwe, antumba yabusu bunante, ankomo yawaini. Wakamutola, kacili mwana muniini kuŋanda ya Mwami Leza ku Syilo. 25Nibakajaya moombe ooyo, bakaleta mwana kuli Eli. 26Mpawo Hana wakati kuli Eli, O simalelo wangu, masimpe ndendime mukaintu uulya ngookabona kaimvwi aawa, kakomba ku Mwami Leza. 27Ndakalikukumbila mwana ooyu, nkabela Mwami Leza wakandipa eeco ncindakali kukumbila. 28Aboobo lino ngooyu ndamupa ku Mwami Leza. Mubuumi bwakwe boonse unoobelekela Mwami Leza.
Currently Selected:
1 Samuyele 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
