1 Samuyele 18
18
Saulu mbwaakanyonokela Devedi
1Devedi naakamana kwaambaula a Saulu, Jonatani mwanaa Saulu a Devedi bakatalika kumvwana, nkabela Jonatani wakayandisya Devedi mbubonya mbuli mbwaliyanda mwini. 2Saulu wakamutola buzuba oobo, taakamuzumizya kuti aye kuŋanda yawisi. 3Mpoonya Jonatani wakapangana cizuminano a Devedi, nkaambo wakali kumuyanda mbubonya mbuli mbwaliyanda mwini. 4Jonatani wakasamununa jansi eelyo ndyaakasamide, walipa Devedi antoomwe azyakusama zyankondo, panga, buta, alutambo lwakwe. 5Kufumbwa Devedi ncaakatumwa wakali kuzwidilila, aboobo Saulu wakamucita kuti abe mupati wabasilumamba. Nkabela eeci cakabotezya bantu boonse ababelesi ba Saulu boonse.
6Lino basilumamba nibakali kuboola kumunzi ciindi Devedi naakamana kujaya Mufilisiti uulya, bamakaintu bakazwa muminzi yoonse ya Isilayeli kabaimba akuzyana kabaya kukucingauzya mwami Saulu atooma atwiimbyo tumwi kabaimba nyimbo zyakukondwa. 7Bakaintu aaba nobakali kusekelela bakali kuvwiilana kuti,
“Saulu wajaya bantu bali zyuulu, Devedi wajaya bantu bali zyuulu zili makumi.”
8Amvwe boobo Saulu wakanyema kapati, nkaambo kaambyo aaka kakamunjila kapati. Mpawo wakati, “Devedi bamutembawida zyuulu zili makumi, mebo banditembawida zyuulu buyo, ino ncinzi casyaala kuti atole, mbulelo!” 9Kuzwa ciindi eeco wakakweeka Devedi.
10Lino nibwakaca, muuya mubi wakazwida kuli Leza wakamusikila Saulu canguzu, nkabela wakatalika kulabalika mumonya muŋanda. Ciindi eeco Devedi wakali kuuma kalumbu, mbubonya mbuli mbwaakali kucita lyoonse. Saulu ciindi eeco wakajisi sumo. 11Mpoonya wakafusa sumo, kayeeya kuti, “Limubbaatikizye kubwaanda.” Pele Devedi wakaleya ziindi zyobilo.
12Saulu wakatalika kuyoowa Devedi, mukuti Mwami Leza wakali aanguwe. Mwami Leza wakafutatilide Saulu. 13Aboobo Saulu wakagwisya Devedi kumbele lyakwe, wakamubikka kuba silutwe wabasilumamba bali cuulu, aabo mbaakali kusolweda munkondo. 14Devedi wakazwidilila munzila zyakwe zyoonse, mukuti Mwami Leza wakali aanguwe. 15Lino Saulu naakabona Devedi mbwaakali kuzwidilila, wakamunyonokela kapati. 16Pele Baisilayeli boonse abaku Juda bakali kuyanda Devedi nkaambo wakali musololi mubotu.
Devedi mbwaakakwata mwanaa Saulu
17Mpoonya Saulu wakati kuli Devedi, “Ngooyu mwanaangu mupati Melabu, ngweti kupe kuti ukwate, ncendiyanda nkuti ube sicamba akulwana nkondo zya Mwami Leza.” Saulu wakali kuyeeya kuti, “Nsyeelede kumujaya ndemwini pe. Pele kumujaye Bafilisiti.”
18Mpawo Devedi wakati kuli Saulu, “Ino mebo ndimeni? Awalo mukwasyi wataata naa ciinga cataata mu Isilayeli, ninzi kuti mebo ndikwate mwanaa mwami?” 19Pele ciindi eeco Melabu mwanaa Saulu ncakeelede kukwatwa kuli Devedi, wisi wakamukwasya kuli Adiliyeli waku Mehola.
20Lino mwanaa Saulu Mikalo bakayandana a Devedi, eelyo Saulu wakaamvwa makani aaya, nkabela Saulu wakakkomana kapati. 21Mpawo wakayeeya kuti, “Nkoomukwasye, kutegwa abe kooze kuli Devedi kuti akajaigwe a Bafilisiti.” Mpoonya aawo Saulu wakaambila Devedi kabili kuti, “Ulaba mukwe wangu.” 22Saulu wakalailila babelesi bakwe kuti, “Amwaambile Devedi kumbali, mwaambe kuti, ‘Bona, mwami wabotelwa kapati anduwe, babelesi bakwe boonse balakuyanda, lino koba buyo mukwe wamwami.’”
23Babelesi ba Saulu bakaambila Devedi majwi aayo. Pele wakati, “Sena muyeeya kuti ncintu cuuba-uba kuba mukwe wamwami? Mebo ndimucete, alimwi nsizizilwe pe.” 24Babelesi ba Saulu bakamwaambila kuti, “Ngaaya makani ngaamba Devedi.” 25Mpoonya Saulu wakati, “Mboobu mbomutikaambe kuli Devedi, ‘Mwami tayandi lubono lwakukwasya pe, ccita ndomo zili mwaanda zya Bafilisiti kutegwa ndipilusizye cibi kuli basinkondoma.’” Muzeezo wa Saulu wakali wakuti Devedi akajaigwe a Bafilisiti. 26Babelesi aabo nibakaambila Devedi majwi aaya, wakabotelwa kapati kuti abe mukwe wamwami. Nkabela ciindi kacitanamana, 27Devedi wakanyamuka akuunka abasilumamba bakwe, bakaya Bafilisiti bali myaanda yobilo. Eelyo wakaleta ndomo, eezyo mwami nzyaakaambilide Devedi kuti abe mukwe wakwe. Mpoonya Saulu wakakwasya mwanaakwe kuli Devedi.
28Saulu naakabona akuziba kuti Mwami wakali aa Devedi, alimwi akuti mwanaakwe wakali kuyanda mulumaakwe, 29Saulu wakaindilila kuyoowa Devedi. Aboobo Saulu wakaba sinkondonyina mubuumi bwakwe boonse.
30Eelyo basilutwe babasinkondo ba Bafilisiti bakaboola kuzoolwana, nkabela kufumbwa ciindi ncibakeza Devedi wakali kuzwidilila kwiinda bamwi basilutwe ba Saulu, nkaako wakaduma.
Currently Selected:
1 Samuyele 18: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
