1 Samuyele 17
17
Goliyati mbwaakakonga Baisilayeli
1Lino Bafilisiti bakabunganya basilumamba babo ku Soko, mucisi ca Juda. Bakayaka zivuka zyabo akati ka Soko a Azeka mu Efesidamimu. 2Saulu a Baisilayeli bakabungana akuyaka zivuka zyabo mukkuti lya Ela, bakalibambila kuyoolwana Bafilisiti. 3Bafilisiti bakaliimvwi acilundu kubbazu limwi, abalo Baisilayeli bakaliimvwi kubbazu limwi acilundu cimwi akati kabo kwakali kkuti.
4Lino kwakazwa muntu singuzu kuzivuka zya Bafilisiti, wakali waku Gati uutegwa Goliyati. Wakali kulampa tukokola cisambomwe acisela. 5Wakali kusama apanga yamukuba alimwi wakali kusama cibaki cakali amapanga aamukuba, bbaki eeli lyakali demu loko. 6Kumaulu wakali kusama matapisi aamukuba aakali kumukwabilila, alimwi wakagwabikide sumo lyamukuba kusule. 7Lusako lwasumo lyakwe lwakali lupati, alyalo sumo lini lyakali lyalubulo, lyakali demu loko. Ooyo wakali sikuyumuna ntobo yakwe wakali kweenda kumbele lyakwe. 8Goliyati wakaima akoongolweda basilumamba ba Isilayeli kati, “Nkaambo nzi nimwasika akwiima mindando yankondo? Mebo ndi Mufilisiti, sena nywebo tamuli buyo babelesi ba Saulu? Lino amusale muntu wanu nobeni, uutindilwane. 9Kuti naa wakonzya kundilwana akundijaya, tulaba bazike banu. Pele kuti naa ndimuzunde akumujaya, nywebo mulaba bazike besu.” 10Mufilisiti ooyo wakaindilizya akuti, “Tubone sunu, amundipe muntu tulwane anguwe.” 11Saulu a Baisilayeli boonse nibakamvwa majwi aaya aa Mufilisiti, lyakabaleka.
Devedi mbwaakainka kuzivuka zya Saulu
12Lino Devedi wakali mwana mulombe wa Jese, Muefulati waku Betelehemu mucisi ca Juda, Jese wakalijisi bana balombe bakali lusele. Saulu naakali mwami, Jese wakalicembeede. 13Bana ba Jese balombe bapati botatwe bakainka a Saulu kunkondo. Mazina aabo ngaaya: Eliyabu, uuli ngowakusaanguna, wabili ngu Abinadabu, watatu ngu Syama. 14Devedi ngowakali keela, nkabela aaba bapati botatwe bakainka a Saulu, 15pele Devedi wakali kuzwida kwa Saulu kuyooembela mbelele zyawisi ku Betelehemu. 16Nkabela Mufilisiti ooyo wakali kulikankaizya lyoonse kumbele lya Baisilayeli cifumo-fumo akumangolezya kwamazuba aali makumi one.
17Lino Jese wakati kuli Devedi mwanaakwe, “Tolela bapati bako cisuwo eeci cipati camaila aakangidwe, azinkwa eezi zili kkumi, ufwambaane kuzitola kubapati bako bali kuzivuka. 18Alimwi utole zinkuli zyabwanda zili kkumi uzitolele silutwe wabasilumamba bali zyuulu. Alimwi ukabalange abapati bako kuti naa sunu bali buti, nkabela ukaletelezye cintu cimwi citondezya kuti waakubabona.” 19Bali aa Saulu abasilumamba boonse ba Baisilayeli kukkuti lya Ela, nkobalwana aa Bafilisiti.
20Mpoonya Devedi wakabuka kabucili kooko akusiya umwi wakali kulanga mbelele, wakabweza zyakulya akuunka mbubonya mbuli Jese mbwaakamulailila. Nkabela wakaakusika kuzivuka ciindi basilumamba nobalibambila kundandama, kabayobelana. 21Basilumamba ba Baisilayeli bakaima kubbazu limwi, abalo basilumamba ba Bafilisiti bakaima kubbazu limwi. 22Devedi wakasiya zintu eezyo kumulindizi wazintu, wakazuzaanina kumindando kwakali bapati bakwe. 23Kacaambaula ambabo, Goliyati silumamba singuzu Mufilisiti waku Gati wakazooima akati-kati kalikankaizya mbuuli lyoonse ku Baisilayeli. Ciindi eeci Devedi awalo wakalimvwida. 24Basilumamba boonse Baisilayeli nibakabona muntu ooyo, bakatija mukuyoowa, 25Baisilayeli bakali kwaamba kuti, “Tee mwamubona muntu ooyu? Ncobeni waboolela kusampaula Baisilayeli. Kufumbwa uunga wamujaya mwami uyoomupa lubono lunji, alimwi ulamupa mwanaakwe kuti akwate, abalo bamukwasyi wakwe tabaciteli.”
26Devedi wakabuzya baalumi aabo mbaakaimvwi aabo, “Ino ncinzi ncaticitilwe muntu uunga wajaya Mufilisiti ooyu akugwisya masampu aaya ku Baisilayeli?” Nkaambo nguni walo ooyu Mufilisiti uutapalwidwe kuti kasampaula basilumamba ba Mwami Leza muumi? 27Lino bantu bakamwaambila eeco ncanga muntu ooyo ulacitilwa.
28Eliyabu, mupati wa Devedi, wakamvwa ciindi naakali kwaambaula abaalumi aabo mbaakaimvwi aabo. Mpoonya wakanyemena Devedi akumwaambila kuti, “Ino ncoyanda ncinzi okuno? Nguni ngoosiila kweembela munkanda? Ndilizi cisapi abubi bwamoyo wako, waboolela kubona nkondo.”
29Mpoonya Devedi wakati, “Ino ndacita nzi? Sena nsikonzyi kwaamba nikuba kubuzya?” 30Eelyo wakacengulukila kuluumbi akwaambaula makani ngoonya, nkabela bantu bakamwiingula mbuli kusaanguna.
31Majwi aakaamba Devedi akamvwigwa, akatolwa kuli Saulu, mpawo wakamutumina sikumwiita. 32Mpoonya Devedi wakati kuli Saulu, “Kutabi muntu naba omwe uulenguka moyo akaambo ka Mufilisiti uulya, mebo ndemubelesi wako ndainka nkamulwane.”
33Mpoonya Saulu wakati kuli Devedi, “Tokonzyi kulwana Mufilisiti, bona, yebo ucili mwana muniini, walo ngusinkondo kuzwa kubukubusi bakwe.”
34Pele Devedi wakati kuli Saulu, “Mebo nde mubelesi wako ndili mweembezi wambelele zyataata, nkabela nikwakaza syuumbwa naba munyama wabutambo umwi, akujata mbelele kuzwa mubutanga, 35ndakamutobela, ndakamuuma akuvuna mbelele kuzwa kumulomo wakwe. Eelyo naakandibukila, ndakamujata kucilezu, ndakamuuma akumujaya. 36Mebo ndemubelesi wako ndakajaya boonse bobilo syuumbwa amunyama wabutambo umwi, lino ayooyu Mufilisiti uutapalwidwe ulaba mbuli umwi wabaabo banyama, ndamumvwa kasampaula basilumamba ba Mwami Leza muumi.” 37Mpoonya Devedi wakati, “Mwami Leza wakandigwisya kuzwa kucifumba casyuumbwa akuzwa kucifumba camunyama wabutambo lino ulandivuna aku Mufilisiti ooyu.”
Eelyo Saulu wakati kuli Devedi, “Koya, Mwami Leza abe anduwe.” 38Saulu wakasamika Devedi zisani zyakwe zyankondo, wakamusamika ngowani yamukuba antoomwe abbaki lyakulwanya. 39Devedi wakasekka panga lyakwe atala azisani eezyo, pele naakasoleka kweendeenda anzizyo, wakakacilwa, nkaambo taakazizibide. Mpoonya Devedi wakati kuli Saulu, “Sikonzyi kweenda azeezi, nsizizibide.” Mpoonya Devedi wakazisamununa. 40Eelyo wakabweza musako mujanza, wakaakusala mabwe osanwe aabulungene mukalonga, wakaabikka munkomo, wakalijisi a nkwibba mujanza, eelyo wakaswena aafwiifwi ku Mufilisiti ooyo.
Devedi mbwaakazunda Goliyati
41Lino Mufilisiti wakaswenenena kuli Devedi, sikuyumuna ntobo yakwe wakalisolwede kumbele lyakwe. 42Mufilisiti naakalanga, wakabona Devedi, nkabela wakamusampaula, nkaambo wakacili muniini, kali mubotu, weebeka. 43Mufilisiti wakati kuli Devedi, “Sena mebo ndili mubwa noza kulindime atusako?” Mufilisiti wakasinganya Devedi muzina lyabaleza bakwe. 44Mufilisiti ooyo wakati kuli Devedi, “Swena kuno mubili wako ndaupa bayuni abanyama bamusokwe.”
45Mpoonya Devedi wakati ku Mufilisiti, “Yebo waza kulindime apanga amasumo, pele mebo ndaboola kulinduwe muzina lya Mwami Leza, Singuzuzyoonse, Leza wabasilumamba ba Baisilayeli, ooyo ngosampaula. 46Sunu Mwami Leza ulakwaaba kulindiwe, ndilakuuma, nkabela ulawida ansi, kwamana ndilakukosola mutwe. Eelyo mitumba ya basilumamba ba Bafilisiti sunu ndaipa bayuni abanyama bamusokwe, lino nyika yoonse ilaziba kuti kuli Leza mu Isilayeli. 47Bantu boonse babungene waawa balaziba kuti Mwami Leza tavuni apanga niliba sumo, nkondo eeyi nja Mwami Leza, sunu ulakwaaba kulindime.”
48Lino Mufilisiti naakaza aafwiifwi kuti aswaangane a Devedi, Devedi wakafwambaana kuzuzaanina kumundando. 49Mpoonya Devedi wakanjila munkomo, wakagwisya bbwe, waliwaala ankwibba, lyakauma Mufilisiti ankumo. Bbwe lyakabbila munkumo, mpawo wakawa cakuvuntama. 50Mbombuboobu Devedi mbwaakazunda Mufilisiti ankwibba abbwe lyomwe. Wakauma Mufilisiti ooyo akumujaya, katajisi panga pe. 51Mpoonya Devedi wakazuza akwiima atala lya Mufilisiti, wakabweza panga lya Mufilisiti, wakalisomona mucikanda calyo, wamumaninizya, amane wakamukosola mutwe andilyo.
Bafilisiti nibakabona kuti singuzu wabo wafwa, bakatija. 52Mpoonya aawo Baisilayeli abaku Juda bakavwankamuka kabayobeka, bakatandaanya Bafilisiti mane kusikila ku Gati akumilyango mipati ya Ekiloni. Bafilisiti bakali kuyaswa, bakali kuya buwa munzila yoonse kuzwa ku Syalaimu kusikila ku Gati aku Ekiloni. 53Kumane Baisilayeli bakapiluka kuzwa kukutandaanya Bafilisiti, bakaakusaala zintu zyakajanwa kuzivuka zyabo. 54Mpoonya Devedi wakatola mutwe wa Mufilisiti uulya ku Jelusalemu, alimwi wakabikka zilwanyo zya Mufilisiti mutente lyakwe.
Devedi mbwaakatondezegwa kuli Saulu
55Ciindi Saulu naakabona Devedi ulainka kuyoolwana a Mufilisiti ooyo, wakati kuli Abina silutwe wabasilumamba bakwe,
“Abina ino uulya mwanaani?”
Mpoonya Abina wakati, “Mbubonya mboli muumi, O mwami, ambe nsimuzi.”
56Mpawo mwami wakati, “Buzya naa mwanaani.”
57Devedi naakapiluka kuzwa kukujaya Mufilisiti, Abina wakamutola kuli Saulu kayumwide amutwe wa Mufilisiti ooyo.
58Mpoonya Saulu wakati kulinguwe, “Nguni uso mulombwana?” Devedi wakati, “Ndimwana wamubelesi wako Jese waku Betelehemu.”
Currently Selected:
1 Samuyele 17: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
