1 Samuyele 16

Devedi mbwaakananikwa

1Lino Mwami Leza wakati kuli Samuyele, “Ino nciindi cilamfu cili buti ncoocinoolilila Saulu kwalo kozi kuti ndakamukaka kuti kacili mwami wa Isilayeli? Zuzya lwija lwako amafuta, uunke kwa Jese ku Betelehemu, ndakutuma ooko nkaambo ndasala mwami akati kabana bakwe balombe.”

2Mpawo Samuyele wakati, “Ino nduunke buti? Kuti naa Saulu wamvwa, ulandijaya.”

Mwami Leza wakati, “Tolelezya akapwizi, mpawo ukaambe kuti, ‘Ndazida kupa zipaizyo ku Mwami Leza.’ 3Lino ukatambe Jese kucipaizyo, nkabela njookwaambila cakucita. Ooyo ngwetikakwaambile ukamunanike nguuyooba mwami.”

4Samuyele wakacita mbubonya mbwaakaambilwa a Mwami Leza, wakainka ku Betelehemu. Kwalo ooko nkwaakaakuswaangana abapati bamunzi, lino bakamubuzya cakukankama bakati, “Mwati waboola buyo?”

5Walo wakaingula kuti, “Iiyi ndaboola buyo. Ndaboolela kuti nzoopaizye ku Mwami Leza. Amulisalazye, tweende anywebo kukupaizya.” Alimwi wakatamba Jese abana bakwe balombe kuti bainke anguwe.

6Nibakaakusika ooko, Samuyele wakabona Eliyabu, mwana mulombe wa Jese, walyaambauzya lwakwe wati, “Ooyu mwaalumi wiimvwi aawa kumbele lya Mwami Leza, ngonguwe munanike wakwe.” 7Pele Mwami Leza wakaambila Samuyele kuti, “Utalangi ciwa cakwe nibuba bulamfu bwaciimo cakwe. Mebo ndamukaka, nkaambo mebo nde Mwami Leza nsilangi mbuli bulanga muntu. Muntu ubona ciwa buyo, pele mebo nde Mwami Leza ndilanga mumoyo wamuntu.”

8Mpoonya Jese wakaita mwanaakwe mulombe Abinadabu akumwiinzya kumbele lya Samuyele. Pele Samuyele wakati, “Peepe, Mwami Leza awalo ooyu tamusalide.” 9Mpawo Jese wakainzya Syama. Samuyele wakati, “Peepe, Mwami Leza awalo ooyu tamusalide.” 10Munzila njiyonya eeyi Jese wakaleta bana bakwe balombe bali ciloba kuli Samuyele. Pele Samuyele wakali kwaamba kuti, “Mwami Leza taakwe naba omwe ngwaasala akati kabaaba.” 11Mpoonya Samuyele wakati kuli Jese, “Sena aaba balikke mbabana bako balombe?” Jese wakaingula kuti, “Kwasyaala omwe muniini, pele uli kukweembela mbelele.”

Mpawo Samuyele wakati, “Tuma kuti bakamulete, nkaambo tatukonzyi kukkala ansi ccita asike okuno.” 12Mpawo Jese wakatuma basikuyoomweeta. Lino ooyu wakali mulombe mubotu wakalimvwide. Mpawo Mwami Leza wakati kuli Samuyele, “Ngonguwe ooyu, munanike.” 13Samuyele wakabweza lwija lwamafuta, wakananika Devedi bana bokwabo kabalangilide. Lino Muuya wa Mwami Leza wakaselukila Devedi canguzu kuzwa mubuzuba oobo. Amane Samuyele wakapilukila ku Lama.

Devedi mbwaakabelekela Saulu

14Muuya wa Mwami Leza wakazwa kuli Saulu, nkaako Mwami Leza wakalekela muuya mubi kuti unjile muli Saulu umupenzye. 15Mpoonya babelesi ba Saulu bakati kulinguwe, “Bona, muuya mubi uuzwa kuli Leza mbuukupenzya. 16Simalelo wesu tulailile tobabelesi bako, notuli aano, kuti tukayandaule muntu uuzi kabotu mbokuumwa kalumbu, kutegwa ciindi muuya mubi uuzwa ku Mwami Leza nuukunjila, kuuma, ndendilyo nonoolimvwa kabotu alimwi.” 17Saulu wakati kubabelesi bakwe, “Mbubo, amundilangawide muntu uukonzya kukauma kabotu, mumulete kulindime.”

18Lino umwi wababelesi bakwe wakaingula kuti, “Bona, ndibwene umwi mwana mulombe wa Jese waku Betelehemu uuzi kuuma kabotu, alimwi mwaalumi sicamba, ulakanana cabusongo, kwamana mubotu. Awalo Mwami Leza uli aanguwe.”

19Saulu wakatuma bantu kuli Jese akuyooamba kuti, “Nditumina mwanaako mulombe uutegwa Devedi, ooyo weembela mbelele.” 20Lino Jese wakatumya mbongolo yakayumwide cinkwa, nkomo yawaini akapongo, wakazituma amwanaakwe Devedi kuli Saulu. 21Mpoonya Devedi wakasika kuli Saulu, eelyo wakanjila mumulimo wakwe. Nkabela Saulu wakamuyandisya kapati, eelyo wakaba sikumubwezela zilwanyo. 22Mpoonya Saulu wakatumya makani kuli Jese aakuti, “Devedi ndamuyandisisya, aboobo ndiyanda kuti akkale okuno kulindime.” 23Nkabela kuzwa eelyo, kufumbwa ciindi muuya mubi ooyo wakali kuzwa kuli Leza nuwakali kumunjila Saulu, Devedi wanoonga wabweza kalumbu wakauma. Eelyo Saulu wakali kuubulukwa waba kabotu, muuya mubi wakali kuzwa.

Currently Selected:

1 Samuyele 16: Tonga96

Highlight

Copy

Compare