1 Samuyele 13

Baisilayeli mbubakalwana a Bafilisiti

1Saulu wakaba mwami kali amyaka iili makumi otatwe. Wakalela myaka iili makumi one aibili. 2Wakasala baalumi bali zyuulu zyotatwe Baisilayeli aabo bamwi bakasyeede wakabaleka bapiluka. Nkabela baalumi bali zyuulu zyobilo bakali aanguwe ku Mikimasyi munyika yatulundu-lundu ya Beteli, balo bamwi bakali cuulu bakali amwanaakwe mulombe Jonatani mu Gibeya wa Benjamini.

3Nkabela Jonatani wakasaala akuzunda Bafilisiti ku Geba, eelyo Bafilisiti bakamvwa makani aaya. Mpoonya Saulu wakatuma bantu kuti basibe myeembo mucisi coonse ca Isilayeli, kaamba kuti, “Baswiilile Bahibulu!” 4Mpoonya Baisilayeli boonse bakamvwa kuti Saulu wasaala akuzunda Bafilisiti, akuti Bafilisiti bakasesemwa Baisilayeli. Aboobo baalumi bakaitwa kuti bagwasye Saulu ku Giligali.

5Lino Bafilisiti bakalibunga antoomwe kutegwa bakalwane Baisilayeli. Bakalijisi nkalaki zyankondo zili zyuulu zili makumi otatwe, abasimabbiza bali zyuulu zili cisambomwe, abasilumamba batabaliki mbuli musenga wankomwe yalwizi. Lino bakaya ku Mikimasyi kujwe lyamunzi wa Betaveni akuyooyaka zivuka ooko. 6Baisilayeli nibakabona kuti bakali mumapenzi nkaambo kakuyuma kwampi ya Bafilisiti bakayoowa kapati. Bamwi babo bakayuba mumpangala, muzyoonde, akati kamandomba, muzilindi, amuziteelekezyo. 7Bamwi bakazubuka mulonga wa Jolodani akuyoonjila muzisi zya Gadi a Giliyadi.

Ciindi eeco Saulu wakacili ku Giligali, nkabela bantu aabo mbaakali aabo bakakkede cakukankama. 8Mukutobela malailile aa Samuyele, Saulu wakalindila kwamazuba aali ciloba, pele Samuyele taakwe naakasika ku Giligali. Bantu bakatalika kuloboka Saulu. 9Aboobo Saulu wakati, “Amundiletele cipaizyo cakutenta azipaizyo zyalumvwano.” Eelyo wakapa cipaizyo cakutenta, 10nkabela mbwaakamanina buyo kupaizya, awalo Samuyele wakasika. Lino Saulu wakainka kuyoomucinga akumujuzya. 11Pele Samuyele wakati, “Wakacitila nzi eeci?”

Saulu wakaingula kuti, “Nindakabona kuti bantu bandimwaika, ayebo toosika muciindi ceelede, akuti Bafilisiti balibungene ku Mikimasyi, 12ndayeeya kuti, ‘Bafilisiti balandilwana mebo muno mu Giligali, nketana akukumbila lugwasyo ku Mwami Leza.’ Nkenkakaako ncindapa cipaizyo cakutenta.”

13Mpoonya Samuyele wakati, “Wafubaala yebo. Taakwe nootobela mulawo wa Mwami Leza wako ngwaakakupa pe. Nootobela mulawo wa Mwami Leza nokunga yebo abaciinga cako nomulela kwalyoonse. 14Pele lino bwami bwako tabuciyi kumbele. Mwami Leza uyoosala mwaalumi ooyo ngwayanda akumucita kuti abe ngomwami wabantu bakwe, nkaambo taakwe noomuswiilila.”

15Mpoonya Samuyele wakanyamuka kuzwa ku Giligali akuya ku Gibeya wa Benjamini. Eelyo Saulu wakabala basilumamba, wakajana kuti bakatisike kumyaanda iili cisambomwe buyo. 16Lino Saulu a Jonatani mwanaakwe, abaalumi mbobakali aabo bakakkala mu Geba mucisi ca Benjamini, Bafilisiti bakayakide zivuka zyabo ku Mikimasyi. 17Mpoonya basilumamba ba Bafilisiti bakaandaana mumpi zyotatwe, imwi yakatozya ku Ofula kufwiifwi a Syaulu, 18imwi yakatozya ku Betiholoni, yatatu yakatozya kumunyinza wakalangene akkuti lya Zeboimu kulanga kunkanda.

19Lino taakwe amufuzi wakalikujanika mu Isilayeli, nkaambo kakuti Bafilisiti bakalikanzide kuti Bahibulu balesegwe kupanga mapanga amasumo. 20Aboobo Baisilayeli bakali kuya buselemukila nkobakakkede Bafilisiti kuti bakakwenge milomo yamaamba, maamba, tweembe, azigonsyo. 21Kwakali kubbadelwa kadi kaniini ciindi lyakali kukwengwa milomo yamaamba, alimwi kadi lyakali kukwengwa zigonsyo atweembe akusensemuna zidunsyo. 22Aboobo mubuzuba bwankondo taakwe naba omwe silumamba waba Isilayeli wakajisi zilwanyo, cita buyo Saulu a Jonatani mbabakajisi masumo amapanga.

23Mpoonya Bafilisiti bakatuma mpi yakalindilide mumumpata ku Mikimasyi.

Currently Selected:

1 Samuyele 13: Tonga96

Highlight

Copy

Compare