1 Samuyele 12
12
Samuyele mbwaakalaya
1Lino Samuyele wakaambila Baisilayeli kuti, “Ndamucitila eeco ncimwakakumbila kuti ndimucitile. Ndamupa mwami uutimulele. 2Lino ngonguwe uunoomulela. Mebo ndacembaala ndatuba, abana bangu mbaaba. Nkabela mebo ndalikumweendelezya kuzwa kubukubusi bwangu kusikila sunu. 3Lino ndimaano. Kuti naa kuli cimwi cintu cibi ncindakacita, amwaambe kumbele lya Mwami Leza amunanike wakwe Saulu. Sena kuli ngundakanyanga ŋombe? Sena kuli ngundakanyanga mbongolo? Sena kuli ngundakacenga naa ngundakadyaminina? Sena kuli ngundakatambwida sinkamulomo? Kuti naa kuli cimwi ncindakacita, ndaciboozya.”
4Bantu bakaingula kuti, “Taakwe ncookatucenga nikuba kutudyaminina, alimwi taakwe ncookatunyanga.”
5Lino Samuyele wakati, “Mwami Leza amunanike wakwe ooyu mbabakamboni sunu, kuti taakwe kampenda nkumwandijanina.”
Eelyo balo bakati, “Iiyi, Mwami Leza ngokamboni wesu.”
6Nkabela Samuyele wakati, “Mwami Leza ngonguwe wakasala Mozesi a Aloni, akugwisya basikale banu kuzwa mu Ijipiti. 7Lino atuyeezyanye eezyo Mwami Leza nzyaakacitila ndinywe abasikale banu. 8Ciindi Jakobo amukwasyi wakwe kainkinde ku Ijipiti, ooko Baijipiti nkobali kubadyaminina, basikale banu bakalilila Mwami Leza kuti abagwasye, eelyo wakatuma Mozesi a Aloni, aabo bakabagwisya kuzwa mu Ijipiti akubabikka munyika eeyi. 9Pele bantu bakaluba Mwami Leza wabo, mpoonya walo wakabaaba kuli Sisela wabasilumamba ba Hazoo, aku Bafilisiti, aku mwami wa Mowabu. 10Mpawo bakalilila Mwami Leza kuti abagwasye bakati, ‘Twabisya, O Mwami Leza, nkaambo kakuti twakaka nduwe, twatalika kupaila ba Baali aba Asyitaloti. Pele lino tuvune, O Mwami Leza kuzwa kulibasinkondoma, nkabela tulakomba buyo nduwe.’ 11Mpoonya Mwami Leza wakatuma Jelububaali, Balaki, Jefuta, a Samuyele, aabo balo bakamuvuna kuzwa kuli basinkondonyoko, mwakakkala muluumuno. 12Alimwi nimwakabona kuti mwami Nahasyi wa Baamoni uyanda kumulwana mwakaamba kuti kulindime, ‘Tuyanda mwami uutinootulela.’ Nikuba kuti Mwami Leza nguwakali Mwami wanu. 13Lino ngooyu mwami ngomwakasala ngomwakakumbila, Mwami Leza wamupa. 14Zintu zyoonse zileenda kabotu andinywe, kuti naa kamulemeka Leza wanu, akumumanina milimo, akutazangila milawo yakwe alimwi kuti nywebo amwami wanu mwamutobela Mwami Leza ncibotu. 15Pele kuti naa mwakaka kuswiilila ku Mwami Leza akuzangila milawo yakwe, uyoomusubula mbwaakali kucita basikale banu. 16Aboobo amulindile, mubone cintu cigambya ncayanda kucita Mwami Leza. 17Sena sunu tabuli buzuba bwakutebula maila? Lino ndilakomba kuti Mwami Leza atume muzumo amvula. Nkabela mwacibona, mulaziba kuti masimpe mwakacita cibi ku Mwami Leza mukumukumbila mwami.”
18Mpoonya Samuyele wakakomba, buzuba oobo mbubonya Mwami Leza wakatuma muzumo amvula. Eelyo bantu boonse bakayoowa Mwami Leza a Samuyele. 19Mpoonya bakati kuli Samuyele, “Akaka, tukombele ku Mwami Leza, Leza wako kutegwa tutafwi pe. Nkaambo atala azinyonyoono zyesu, twayungizya bubi bwakukumbila mwami.”
20Lino Samuyele wakabaambila kuti, “Mutayoowi, nikuba kuti mwakacita cibi cili boobu, mutaleyi kuzwa ku Mwami Leza pele muleelede kumumanina milimo amyoyo yanu yoonse. 21Mutatobeli mituni iili njabuyo, nkaambo kakuti tiikwe milimo, tiikonzyi kumugwasya nikuba kumuvuna kayi njabuyo. 22Nkaambo Mwami Leza wakapa kale cisyomezyo cakuti takooyoomusiya, mukuti cakamubotela kuti mube bantu bakwe. 23Nkabela citacitiki kuti mebo mbisizye Mwami Leza mukutamukombela. Alimwi ndinoomwiisya makani aanzila mbotu iiluzi. 24Amulemeke Mwami Leza akumumanina milimo cakusyomeka amyoyo yanu yoonse. Amuyeeye zintu zipati eezyo nzyaakamucitila. 25Pele kuti naa muzumanane kucita zibi, ncobeni lwanu antoomwe amwami wanu muyoonyonyoonwa.”
Currently Selected:
1 Samuyele 12: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
