1 Samuyele 10
10
1Mpoonya Samuyele wakabweza nsazi yamafuta aaoliva akwaatila amutwe wa Saulu, mpoonya wamumyonta akumwaambila kuti, “Mwami Leza wakunanika mafuta kuti ube mwami wabantu bakwe Baisilayeli. Uyoolela bantu ba Mwami Leza akuyoobavuna kuzwa kuli basinkondonyina. Nceeci cizibyo cakuti yebo ncobeni Leza wakusala kuti ube mwami wabantu bakwe. 2Lino wazwa buyo kuno, uyooswaangana a baalumi bobilo kumbali lyacuumbwe ca Lacelo kumunyinza wacisi ca Benjamini ku Zeliza. Bayookwaambila kuti, ‘Mbongolo nzooli kuyandaula zyajanwa kale, aboobo uso wakaleka kuyeeya mbongolo wakatazigwa akaambo kanu.’ Nkabela ubuzya kuti, ‘Ino ndilacita buti amakani amwanaangu?’ 3Kuzwa kooko ulaya, ukasike kumusamu mupati uulya waku Taboo kwalo uyooswaangana abaalumi botatwe baya kukupaizya ku Beteli. Umwi wabo unoobwezede tupongo totatwe, wabili unoobwezede zinkwa zyotatwe, watatu unoobwezede nkomo yawaini. 4Nkabela bayookujuzya akukupa zinkwa zyobilo, eezyo nzyoelede kuyootambula. 5Waakumana ukainke kucilundu ca Leza ku Gibeya, ooko kwalo nkokuli zivuka zyabasilumamba ba Bafilisiti. Mboyoosika buyo kumanjililo aamunzi, uyooswaangana nkamu yabasinsimi bazwida kucilundu cakukombela. Nkabela banoouma tulumbu, tungoma, nyeele atunkobela kumwi kabasinsima. 6Mpoonya muuya wa Mwami Leza uyookuselukila canguzu, eelyo uyoosinsima aabo, mpawo uyoosanduka akuba muntu uumbi. 7Lino zyaakucitika buyo eezi zitondezyo, ukacite kufumbwa oobo mbokonzya, nkaambo Leza ulaanduwe. 8Nkabela undisaangunine kuya ku Giligali. Ooko njooboola ncobeni kuzoopa zipaizyo zyakutenta, azyalumvwano. Uleelede kuyoolindila ooko kwamazuba aali ciloba mane do ndaakusika akuzookwaambila cakucita.”
9Ciindi Saulu naakapiluka akusiya Samuyele, Leza wakasandula moyo wa Saulu, azyalo zitondezyo ziya zyakacitika mubuzuba mbubonya oobo. 10Ciindi Saulu amubelesi wakwe nibakasika ku Gibeya, nkamu yabasinsimi yakabaswaanganya. Mpawo muuya wa Leza wakamuselukila canguzu, eelyo wakasinsima ambabo. 11Lino aabo bantu bakamuzi kale nibakamubona kacita ceeci, bakatalika kulibuzya akati kabo kuti, “Ino ncinzi eeci cicitika kumwanaa Kisyi? Sena Saulu awalo waba musinsimi?” 12Umwi mwaalumi wakali kukkala kooko wakati, “Sena aba mbana babasinsimi balo-balo?” Aawa mpampawo aakatalikila kasimi kakuti, “Sena Saulu awalo musinsimi?” 13Lino Saulu naakamana kusinsima, wakainka kucipaililo cakali acilundu.
14Mpawo simizyaakwe wakamubuzya antoomwe amubelesi wakwe kuti, “Ino mwakali kuli?”
Saulu wakaingula kuti, “Twakali kuyabuyandaula mbongolo, nkabela nitwakabona kuti twazibula, twakainka kuli Samuyele.”
15Mpoonya simizyaakwe wakabuzya kuti, “Ndaambila ncinzi ncaakakwaambila Samuyele?”
16Saulu wakaingula kuti, “Wakatuzibya kuti mbongolo zyabonwa.” Pele taakwe naakaambila simizyaakwe makani aabwami bwakaamba Samuyele kuti buyooba bwakwe.
Saulu mbwaakazumininwa kuba mwami
17Mpoonya Samuyele wakabunganya Baisilayeli antoomwe kukukomba Mwami Leza ku Mizipa. 18Wakabaambila kuti, Mwami Leza, Leza wa Isilayeli, waamba kuti, “Ndakaleta Isilayeli kuzwa mu Ijipiti, ndakamuvuna kuzwa ku Baijipiti akubantu boonse aabo bakali kumudyaminina.”
19Pele sunu mwamukaka Leza wanu, ooyo uumuvuna kuzwa kumapenzi amakatazyo aanu, alimwi mwaamba kuti, “Peepe. Tupe buyo mwami. Nkaako lino amubungane kumbele lya Mwami Leza mumisyobo amuziinga zyanu.”
20Lino Samuyele wakaswenya aafwiifwi misyobo yoonse ya Isilayeli, nkabela musyobo wa Benjamini nguwakawidwa cisolo. 21Lino Samuyele wakaita musyobo wa Benjamini muziinga zyawo. Ciinga ca Matili ncicakawidwa cisolo kumamanino Saulu mwanaa Kisyi nguwakawidwa cisolo. Pele nibakamuyandaula, taakwe nibakamujana. 22Nkaako alimwi bakabuzya ku Mwami Leza kuti, “Mwati waza buya ooyo?”
Mwami Leza wakati, “Iiyi, uliyubide akati kazintu.”
23Mpawo bakazuzaana kuyoomugwisya bakamuleta kubantu. Bakamwiimika akati kabo, wakali mulamfu kwiinda bantu boonse. 24Eelyo Samuyele wakati kubantu boonse, “Sena mwamubona mwaalumi Mwami Leza ngwaasala? Taakwe uumbi uuli mbuli nguwe.”
Mpoonya bantu boonse bakapozomoka bati, “Aaongole mwami.”
25Lino Samuyele wakapandulwida bantu milimo yabwami, amane wakailemba mubbuku akwiibikka kumbele lya Mwami Leza. Kumane Samuyele wakalayana abantu. 26Saulu wakapilukila kumunzi wakwe ku Gibeya. Baalumi bamwi basinguzu aabo Mwami Leza mbaakayumya-yumya bakamusindikila. 27Pele bamwi babi bakati, “Ino inga ooyu muntu watuvuna buti?” Bakamusampaula, tiibakamupa cipego pe. Pele Saulu wakaumwide buyo.
Currently Selected:
1 Samuyele 10: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
