1 Samuyele 11
11
Saulu mbwaakazunda Baamoni
1Lino Nahasyi Muamoni wakaya kuyoolwana munzi wa Jabesyigiliyadi. Basilumamba bakwe bakazinguluka munzi ooyo, mpoonya baalumi bamu Jabesyi bakati kuli Nahasyi, “Atupange cizuminano, cakuti katukubelekela.”
2Pele Nahasyi Muamoni wakabaambila kuti, “Mbotunga twapanga cizuminano andinywe nkuti umwi aumwi akati kanu mmugwisye liso lyalulyo kutegwa eeci cintu cikajazye nsoni Baisilayeli boonse.”
3Aawo bapati baku Jabesyi bakati, “Tupe mazuba aali ciloba kutegwa tutumye ku Baisilayeli boonse, kuti naa taakwe uunga watuvuna tulalipa kuli nduwe.”
4Lino batumwa aabo nibakaakusika ku Gibeya wa Saulu akuyooamba makani aayo, bantu bakalila kapati. 5Ciindi eeco Saulu wakali kuzwida kumuunda kaza bubinga basune bakwe, mpoonya wakabuzya kuti, “Ino ncinzi cacitika? Ino nkaambo nzi bantu boonse ncobalila?” Mpawo bakamulungwilida makani aakaleta batumwa baku Jabesyi. 6Ciindi Saulu naakamvwa makani aaya, muuya wa Mwami Leza wakamuselukila canguzu, nkabela wakakalala kapati. 7Mpawo wakabweza basune bobilo, wabakosoola zituli-zituli, ucimana wazitumya ku Baisilayeli boonse wati, “Kufumbwa ooyo uukaka kutobela Saulu a Samuyele kunkondo, basune bakwe bayoocitwa boobu.”
Mpawo Baisilayeli bakayoowa ncaakali kunga ulacita Mwami Leza, aawo boonse bakainka camoyo omwe. 8Saulu wakabunganya bantu boonse ku Bezeki, kwakali baalumi bali zyuulu zili makumi otatwe bakazwa kucisi ca Juda. 9Mpoonya bakaambila batumwa aabo baku Jabesyi kuti, “Mukazibye bakulindinywe kuti, ‘Juunza aatentela zuba muyoovunwa.’” Eelyo batumwa nibakaakusika akwaamba makani aaya baalumi baku Jabesyi, bakakondwa, 10bakati ku Baamoni, “Junza tuzoolipa kuli ndinywe, nkabela uzootucita kufumbwa ncoyanda.”
11Lino nibwakaca Saulu wakaandaanya bantu bakwe mu mpi zyotatwe, nkabela kabucili kooko, basilumamba aaba bakanjila muzivuka zya Baamoni akutalika kubajaya, mane kusikila aatentela zuba. Aabo bakacili baumi bakamwaikizyanya akutija omwe-omwe.
12Lino Baisilayeli bakabuzya Samuyele kuti, “Ino mbaani aabo bakali kwaamba kuti Saulu takonzyi kuba mwami? Balete tubajaye.”
13Pele Saulu wakati, “Peepe, sunu kutajaigwi muntu naba omwe pe, nkaambo kakuti sunu Mwami Leza wavuna Baisilayeli.” 14Mpoonya Samuyele wakaambila bantu kuti, “Kamuza, tweende ku Giligali, tukazuminane kuti Saulu ngo mwami wesu.” 15Aboobo bantu boonse bakainka ku Giligali, nkabela okuya Saulu bakamucita mwami kumbele lya Mwami Leza, ooko Saulu abaalumi boonse Baisilayeli bakasekelela akupa zipaizyo zyalumvwano.
Currently Selected:
1 Samuyele 11: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
