1 Bami 9
9
Mwami Leza mbwaakalibonya kuli Solomoni alimwi
(2 Makani 7.11-22)
1Lino mwami Solomoni naakamana kuyaka Ŋanda ya Mwami Leza ayakwe, azimwi zyoonse nzyaakali kuyanda kucita. 2Mwami Leza wakalibonya lwabili kuli nguwe mbubonya mbuli mbwaakalibonyezezye ku Gibiyoni. 3Mwami Leza wakati kuli nguwe, “Ndakakumvwa kukomba kwako. Alimwi ndakasalazya Ŋanda yangu eeyi njookayaka akaambo kazina lyangu mukuti nkekombelwa mumo. Ndinooilanga akwiikwabilila lyoonse. 4Aboobo, kuti naa kondibelekela amoyo omwe mbuli uso Devedi, akucita nzendikulailila, kutobela milawo amalailile aangu, 5ndiyoositikizya cisyomezyo ncindakapangana a Devedi nindakamwaambila kuti mwanaakwe nguunoolela Baisilayeli lyoonse. 6Pele kuti yebo nobaba bana bako mukandisiye, akutatobela milawo amalailile ngindakupa, mukukomba baleza bambi, 7ndiyoogwisya Baisilayeli kuzwa munyika yangu eeyo njindakapede. Alimwi ndiyoosiya Ŋanda yangu eeyi njindakasalazya akaambo kazina lyangu kuti nkekombelwa mumo. Nkabela Baisilayeli bayooba kasimi acisesyo kuli bamasi. 8Nikuba kuti Ŋanda eeyi nimbotu, yeebeka, boonse bayooinda mpawo bayoogambwa akuti maawe yanyonyooka, ino ‘Nkaambo nzi Mwami Leza naakacita boobu kunyika akuŊanda eeyi?’ 9Pele bamwi bayooingula kuti, ‘Nkaambo kakuti bakasiya Mwami Leza wabo ooyo wakagwisya basikale babo munyika ya Ijipiti, bakakomba baleza bambi akubamanina milimo. Ncenciceeco Mwami Leza ncaacitila zeezi.’”
Cizuminano ca Solomoni a Hilamu
(2 Makani 8.1-2)
10Solomoni cakamutolela myaka iili makumi obilo kuyaka Ŋanda ya Leza ayakwe. 11Kwamana mwami wa Taya nguwakamupa zisamu zyamulombe, mapulanga angolida yoonse njaakali kuyanda mumulimo ooyu. Mwami Solomoni wakapa Hilamu minzi iili makumi obilo yamucisi ca Galilii. 12Pele Hilamu naakainka kuyooibona minzi eeyi, tiiyakamubotela pe. 13Aboobo wakaambila Solomoni kuti, “Eeyi njeminzi njookandipa mukwesu!” Ncenciceeco busena asunu ncobwiitwa kuti Kabulu. 14Ooyu Hilamu nguwakatumizizye mwami Solomoni ngolida iilema matalenta aali mwaanda amakumi obilo.
Aimwi milimo ya Solomoni
(2 Makani 8.3-18)
15Nzeezi zyakacita mwami Solomoni, wakabelesya basicibbalo kuyaka Ŋanda ya Mwami Leza ayakwe, wakayaka cikwabilizyo abwaanda bwa Jelusalemu akuyakulula minzi ya Hazoo, Megido awa Geza. 16Mwami wa Ijipiti wakatolede munzi wa Geza wuutenta. Wakajaya Bakenani bakali kukkala mumo, amane wakuupa kumwanaakwe naakakwatwa kuli Solomoni. 17Eelyo Solomoni wakuuyakulula munzi ooyo. Alimwi mwami Solomoni wakayakulula minzi ya Betiholoni kunselelo, 18Baalati, a Tadimoo munkanda mucisi ca Juda. 19Muminzi eeyo mwaakali kubikka zyakulya, nkalaki, mabbiza, anzyaakali kuyanda kuyasya mu Jelusalemu, mu Lebanoni amuzisi zyoonse nzyaakali kweendelezya. 20Lino bantu aabo bakasyeede: Baamoli, Bahiti, Bapelezi, Bahivi a Bajebusi. Bantu boonse aaba tiibakali Baisilayeli pe. 21Ncecaamba kuti mbalunyungu lwabaabo bakasyaala batakanyonyoonwa a Baisilayeli, Solomoni wakababelesya mucibbalo, mbubonya mbuli mbobali sunu. 22Pele Solomoni taakwe naakali kucita Baisilayeli buzike, balo mbibakali basilumamba, balupati-pati, beendelezi batukamu twabasilumamba, basilutwe bankalaki abatanti bazyo. 23Alimwi kwakali balangi bamilimo bali myaanda yosanwe amakumi osanwe aabo bakali kweendelezya bantu bazibbalo. 24Ciindi mwanaa Falo naakalonga kuzwa kumunzi wa Devedi kuya kuŊanda eeyo Solomoni njaakamuyakila, wakayaka zikwabilizyo zyayo.
25Mumwaka omwe Solomoni wakali kupa zipaizyo zyakutenta azyalumvwano akuumpa tununkilizyo acipaililo eeco ncaakayaka ku Mwami Leza kwaziindi zyotatwe mukuzuzikizya cikonke.
26Alimwi mwami Solomoni wakapanga mato aankondo ku Eziyongeba, munsi-munsi aku Elati mu Edomu ankomwe yalwizi lusalala. 27Nkabela Hilamu wakatuma bantu bakwe bacibwene kweendela mulwizi, wakabatuma kuti bakagwasyanye abantu ba Solomoni. 28Bakeenda amato kuya ku Offi, nkabela bakaakuletela mwami Solomoni ngolida iilema matalenta aali myaanda yone amakumi obilo.
Currently Selected:
1 Bami 9: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
