1 Bami 22
22
Musinsimi Mikaiya mbwaakacenjezya Ahabu
(2 Makani 18.2-27)
1Kwakali luumuno akati kacisi ca Isilayeli aca Alamu kwamyaka yotatwe, 2pele mumwaka watatu mwami Jehosyafati wacisi ca Juda wakainka kuyooswaya mwami Ahabu wacisi ca Isilayeli.
3Nkabela mwami wa Isilayeli wakabuzya balupati-pati bakwe wakati, “Tee mulizi kuti munzi wa Lamoti uuli mu Giliyadi nguwesu, kwamana kunyina ancotucita kuti tuuboozye kuzwa ku Baalamu.” 4Eelyo Ahabu wakabuzya Jehosyafati kuti, “Sena inga wakonzya kuunka andiswe kuti tukalwane Lamotigiliyadi?”
Jehosyafati wakaingula kuti, “Mebo ndili mbuli nduwe, bantu bangu bali mbuli bantu bako, amabbiza aangu ali mbuli mabbiza aako. 5Nikuba boobo Jehosyafati wakaambila mwami wa cisi ca Isilayeli kuti, ‘Kusaanguna uleelede kubuzya Mwami Leza kumakani aaya.’”
6Aboobo Ahabu mwami wacisi ca Isilayeli wakaita basinsimi aabo bakatisike kumyaanda yone, wakababuzya kuti, “Sena nduunke kuyoolwana Lamotigiliyadi naa pe?”
Basinsimi aabo bakati, “Koya buyo ukuulwane nkaambo Mwami Leza uyoowaaba kulinduwe.”
7Pele Jehosyafati wakabuzya kuti, “Sena taakwe uumbi musinsimi wa Mwami Leza ngotunga twabuzya?”
8Ahabu mwami wacisi ca Isilayeli wakaingula kuti, “Mpali aumbi, ngotukonzya kubuzya, Mikaiya mwanaa Imula. Pele mebo ndilimusulide muntu ooyu, nkaambo kakuti lyoonse taakwe nasinsima zintu zibotu kulindime pe, ccita zibi buyo.”
Pele Jehosyafati wakaingula kuti, “Peepe utaambi boobo pe.”
9Mpawo Ahabu wakaita umwi wabalupati-pati bakwe wamwaambila kuti akalete Mikaiya cakufwambaana.
10Lino bami aaba bobilo bakasamide majansi aabo aabwami kabakkede azyuuno zyabo kulubuwa lwakuumina maila luli anze lyamulyango wa Samaliya, basinsimi aabo boonse bakali kusinsima kumbele lyabo. 11Umwi wabasinsimi aaba, uutegwa Zedekiya mwanaa Kanaana, wakapanga meja aalubulo, eelyo wakati kuli Ahabu, “Nceeci ncaamba Mwami Leza ulati, ‘Ameja aaya ulakonzya kubalwana Baalamu akubanyonyweeda limwi boonse.’” 12Abamwi basinsimi aabo bakali kwaamba mbubonya kabati, “Koya buyo ukalwane Lamotigiliyadi. Mwami Leza wakuzundya kale.”
13Aawo uulya wakatumidwe kuyooita Mikaiya wakati kulinguwe, “Bona basinsimi boonse aaba baamba kuti mwami uyoozunda, aboobo ayebo weelede kusinsima mbubonya buyo.”
14Pele walo Mikaiya wakaamba kuti, “Mbuli Mwami Leza mbwaali muumi ndilaamba zitindaambile Mwami Leza zyalo!”
15Naakalibonya mwami Ahabu wakamubuzya kuti, “Mikaiya, sena mwami Jehosyafati ambebo tuunke kuyoolwana Lamotigiliyadi naa pe?”
Mikaiya wakati, “Kamuya muyoozunda, nkaambo Mwami Leza wamuzundya kale.”
16Pele Ahabu wakaingula kuti, “Ino nkukonkye ziindi zyongaye kuti undaambile zyakasimpe muzina lya Mwami Leza?”
17Mikaiya wakaingula kuti, “Ndabona Baisilayeli boonse kabamwaikizyenye muzilundu, mbubonya mbuli mbelele zitakwe mweembezi. Nkabela Mwami Leza waamba kuti, ‘Aaba bantu tabajisi musololi Ababweede buyo kumaanda aabo muluumuno.’”
18Mpoonya Ahabu wakati kuli Jehosyafati, “Tee ndakwaambila kuti muntu ooyu lyoonse taakwe nasinsima zibotu kulindime. Ccita zibi buyo!”
19Mikaiya wakaindilizya akuti, “Lino swiilila nzyaamba Mwami Leza! Ndakabona Mwami Leza kakkede acuuno cakwe cabwami kujulu, abakujulu kabaimvwi munsi lyakwe bamwi kululyo, bamwi kulumwensi. 20Mwami Leza wakabuzya kuti, ‘Ino nguni uunga ulacenga Ahabu mwami wa cisi ca Isilayeli kuti ainke kumunzi wa Lamotigiliyadi kuti akafwide nkuko?’ Bamwi babakujulu bakaamba ceeci, alimwi bamwi bakaamba cimbi, 21kumane muuya umwi wakasika ku Mwami Leza akwaamba kuti, ‘Ndiyoomucenga mebo.’ Mpawo Mwami Leza wakabuzya kuti, ‘Ino uuyoomucenga buti?’ 22Muuya ooyo wakaingula kuti, ‘Ndilainka ndikacite basinsimi ba Ahabu boonse kuti bakaambe zyakubeja.’ Eelyo Mwami Leza wakati, ‘Ulakonzya, koya ukamucenge.’”
23Mpawo Mikaiya wakati, “Ncenciceeci basinsimi bako aaba ncibakuunina. Pele Mwami Leza ukubambilide penzi ncobeni.”
24Mpoonya aawo Zedekiya wakainkila Mikaiya, waakumuuma lubayi wati, “Ino muuya wa Leza waza buti kuti uzooambile nduwe?”
25Mikaiya wakati, “Uyoolibonena buzuba oobo mboyooyuba muŋanda yamukati.”
26Mpoonya mwami Ahabu wakalailila umwi wabalupati-pati bakwe kuti, “Tola Mikaiya kuli Amoni mweendelezi wamunzi, alimwi akuli Jowasyi, mwanaa mwami. 27Ukabaambile kuti bamubikke muntolongo kabamusanina buyo cinkwa amaanzi mane kusikila nkaboole kunkondo.”
28Pele Mikaiya wakamwaambila kuti, “Kuti naa ukaboole koli muumi Mwami Leza taambauli kwiindila mulindime!” Alimwi wakaindilizya akuti, “Kamuziyeeyede nyoonse nobantu eezi nzindaamba!”
Lufu lwa Ahabu
(2 Makani 18.28-34)
29Lino mwami Ahabu wa Isilayeli a mwami Jehosyafati wa Juda bakainka kukulwana ku Lamotigiliyadi. 30Lino Ahabu wakaambila Jehosyafati kuti, “Ndilalwana cakutalizibya, pele yebo kosamide jansi lyabwami.” Aboobo mwami wa Isilayeli wakalwana katalizibyi.
31Lino mwami waku Alamu wakalailila bapati babeenzya nkalaki bali makumi otatwe ababili kuti batalwani kufumbwa buna muntu ccita buyo mwami wa Isilayeli. 32Lino aabo nibakabona Jehosyafati bakayeeya kuti ngonguwe mwami wa Isilayeli, nkabela bakamuunkila kuti bakamulwane. Lino naakakwemba, 33bakaziba kuti tali ngomwami wa Isilayeli pe, eelyo bakaleka kumutandaanya. 34Pele umwi sinkondo wa Baalamu wakawaala muvwi ciwaale-waale akuyooyasa mwami Ahabu aaswaanganina zikwabilizyo zyamubili. Nkabela mwami wakati kuli uumweenzya munkalaki, “Bandiyasa! Nyonena ambali tuleke kulwana.”
35Buzuba boonse oobu nkondo yakali kubbebba, walo mwami Ahabu bakali mukkazikide munkalaki kalangide Baalamu. Bulowa bwakali kuzwa mpaakayaswa, bwakali kukunka bwakatelekela atako lyankalaki, nkabela kumangolezya wakafwa. 36Lino kalibbila kwakaba kwaambilizya kuli basinkondo boonse ba Baisilayeli kuti, “Muntu oonse abweede kucisi cokwabo kumunzi wakwe.”
37Mbombuboobu mbwaakafwa mwami Ahabu. Mubili wakwe wakatolwa ku Samaliya akuyoozikkwa. 38Nkalaki yakwe yakaakusanzigwa kuziba lyaku Samaliya ooko kwakali kusambila bavuule. Babwa bakamyankuta bulowa, mbubonya mbuli Mwami Leza mbwaakaambide. 39Lino zyoonse eezyo Ahabu nzyaakacita, kubikkilizya ambwaakayaka ŋanda yakwe njaakabotezya ameja aabazovu, aminzi yoonse njaakakwabilila zililembedwe mumabbuku aamakani aabami Baisilayeli. 40Ahabu wakafwa akuzikkwa abasikale bakwe, eelyo mwanaakwe Ahaziya nguwakaba mwami mubusena bwakwe.
Mwami Jehosyafati wa Juda
(2 Makani 20.31—21.1)
41Mumwaka wane wakulela kwa mwami Ahabu, Jehosyafati mwana wa Asa wakaba ngomwami wa Juda. 42Wakaba mwami ciindi naakali aamyaka iili makumi otatwe aisanu. Nkabela wakalela mu Jelusalemu kwamyaka iili makumi obilo aisanu. Banyina bakali Azuba, mwanaa Syilihi. 43Munzila zyoonse wakali mbuli Asa wisi, wakali kucita ziluzi ku Mwami Leza. Nikuba boobo taakamwaya malende, aboobo bantu bakacili kupa zipaizyo akutenta tununkilizyo. 44Jehosyafati wakanyina mazwanga amwami wa Isilayeli.
45Lino eezyo zyoonse Jehosyafati nzyaakacita amilimo yakwe ankondo nzyaakalwana, zililembedwe mubbuku lya makani aabami ba Juda. 46Wakatanda baalumi boonse bakali kucita zitaambiki mumalende oomo bakasyeede ciindi wisi naakali kulela.
47Nyika ya Edomu taakwe niyakajisi mwami, kwakali buyo mweendelezi.
48Mwami Jehosyafati wakapanzya mato mapati kuti kaainka kuyooleta ngolida kuzwa kucisi ca Ofa. Pele mato aaya taakwe naakeenda akafwa ku Ziyongeba. 49Aawo mwami Ahaziya wacisi ca Isilayeli wakati kuli Jehosyafati, “Ino mbuti kuti bantu bangu abako kabeenzezya antoomwe?” Pele Jehosyafati wakakaka.
50Jehosyafati wakafwa, nkabela wakazikkilwa mu Jelusalemu, eelyo mwanaakwe Jeholamu nguwakaba mwami mubusena bwakwe.
Mwami Ahaziya wa Isilayeli
51Lino mumwaka wakkumi aciloba wakulela kwa Jehosyafati wacisi ca Juda, Ahaziya mwana wa Ahabu wakaba ngomwami wa Isilayeli mu Samaliya, nkabela wakalela kwamyaka yobilo. 52Pele wakabisizya Mwami Leza nkaambo wakali kutobela nzila zyawisi abanyina azya Jelobowamu mwanaa Nebati ooyo wakasolweda Baisilayeli muzinyonyoono. 53Ahaziya wakali kukomba akubelekela Baali aboobo wakanyemya Mwami Leza wa Isilayeli mbubonya mbwaakacita wisi.
Currently Selected:
1 Bami 22: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
