1 Bami 21
21
Muunda wansaansa wa Naboti
1Lino kufwiifwi aŋanda yamwami Ahabu ku Jezuliili, kwakali muunda wansaansa wa Naboti. 2Cimwi ciindi Ahabu wakati kuli Naboti, “Ino mbuti kuti wandipa muunda wako ooyu wansaansa, kayi ulaafwiifwi aŋanda yangu, nkaambo aawa abusena ndali kuyanda kulima muunda wacisyu. Ono yebo inga ndakupa muunda mubotu kwiinda ooyu, alimwi naa kuti koyanda inga ndauula kufumbwa mboyanda.”
3Naboti wakaingula kuti, “A Mwami Leza uuzi, nsikonzyi kukupa muunda ooyu nkaambo ndakuukona buya kuli basikale bangu!”
4Ahabu wakapilukila kwakwe kazingidwe akufuta kapati, Naboti waku Jezuliili wakaambide kuti, “Nsikonzyi kukupa lukono oolu lwabasikale bangu.” Ahabu wakalala abulo kafutide kapati. 5Nkabela Jezibeli mukaintu wakwe wakanjila akumubuzya kuti, “Ino ufutila nzi? Utakatila nzi kulya?”
6Ahabu wakati, “Nkaambo kamakani aandaambila Naboti. Ndamwaambila kuti nduule muunda wakwe wansaansa, alimwi ndati naa ulayanda ndimupe uumbi muunda, pele walo wandaambila kuti takonzyi kundipa muunda pe!” 7Mpawo Jezibeli wakaingula kuti, “Sena yawe toli nduwe mwami wa Baisilayeli? Buka ulye. Kotangala buyo ndilakujanina muunda wansaansa wa Naboti!”
8Jezibeli wakalemba magwalo, muzina lya Ahabu waasimba, amane wakaatumya kuli balupati-pati abalemenede bakwe aabo bakali munzi omwe a Naboti. 9Magwalo akali kwaamba kuti, “Amusale buzuba bumwi bwakuliimya kulya, mukabungane antoomwe eelyo Naboti mukamupe cuuno cabulemu. 10Aawo mukasale zidakwa zyobilo cimwi kulubazu lumwi kuti zimutamikizye kaambo kakusampaula mwami wacisi. Mpoonya mukamutole kunze aamunzi mukamuume mabwe akafwe.”
11Aboobo balupati-pati abalemenede bamu Jezuliili bakacita mbuli bwaakalailila Jezibeli mumagwalo. 12Bakasala buzuba bwakuliimya kulya, akwiita bantu boonse, kumane bakapa Naboti cuuno cabulemu. 13Nkabela zidakwa eezyo zyobilo zyakatalika kaambo antangalala kakuti Naboti wakasampaula Leza amwami wacisi. Aboobo bakamutola kunze lyamunzi baakumuuma mabwe, wafwa. 14Bamane bakatumina makani kuli Jezibeli baakuti, “Naboti wajaigwa.”
15Jezibeli mbwaakamvwida buyo makani aaya, wakati kuli Ahabu, “Naboti wafwa, koya utole muunda wakwe wansaansa ngwaakakukasizye kuti uuule.” 16Mpoonya Ahabu wakatola muunda ooyo.
17Lino Mwami Leza wakaambila Elija musinsimi waku Tisyibi kuti, 18“Koya kumwami Ahabu waku Samaliya. Uyoomujana mumuunda wansaansa wa Naboti, uyanda kuutola. 19Ukamwaambile kuti mebo nde Mwami Leza ndati kulinguwe, ‘Eena wajaya muntu kuti utole lubono lwakwe?’ Ukamwaambile akuti, ‘Mumonya mubusena oomo babwa mubamyankuta bulowa bwa Naboti bayoomyankuta abwako, iiyi, bwako bwini.’”
20Lino Ahabu naakabona Elija kaza wakati, “Iiyi, mbombubo. Yebo wamaninina kucita zibi ku Mwami Leza.” 21Nkaako Mwami Leza ulati, “Ndilaleta mapenzi alinduwe. 22Ndiyookugwisya akubagwisya boonse bamukwasyi wako, uyooba mbuli bwakaba mikwasyi ya mwami Jelobowamu mwanaa Nebati, awa mwami Baasya mwana wa Ahija, nkaambo wakandinyemya alimwi wakasolweda Baisilayeli muzinyonyoono.” 23Lino kwaamba zya Jezibeli Mwami Leza ulati, “Babwa bayoolya mubili wakwe mumunzi wa Jezuliili. 24Kufumbwa wamukwasyi wako uuyoofwida mumunzi uyooligwa babwa, alimwi kufumbwa uuyofwida musokwe uyooligwa bayuni.”
25Taakwe aumbi muntu wakamaninide mbuli Ahabu kucita zibi kumbele lya Mwami Leza. Wakali kucita zyoonse eezi kasungilizigwa a Jezibeli mukaintu wakwe. 26Ahabu wakali kucita zinyonyoono zyuusya nsoni mbuli kukomba mituni mbubonya mbuli bwakali kucita Baamoli aabo Mwami Leza mbaakatandila Baisilayeli.
27Ciindi Elija naakamanizya kwaamba makani aaya, Ahabu wakazapaula zyakusama zyakwe, wasama masaka, waliimya kulya, kulivumba masaka, akweenda kaumba-umba.
28Lino Mwami Leza wakaambila Elija musinsimi kuti, 29“Wabona Ahabu mbwaalyeetezya kulindime? Lino mbuli mbwaacita boobu, nsikoomuletela mapenzi nacipona, pele ciyoocitika kwaakulela mwanaakwe.”
Currently Selected:
1 Bami 21: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
