1 Bami 2
2
Kulailila kwamamanino Devedi nkwaakapa Solomoni
1Ciindi Devedi naakali aafwiifwi kufwa, wakaita mwanaakwe Solomoni akumupa malailile aakwe aamamanino wakati, 2“Ndilaafwiifwi kumusiya. Lino yebo yuma, ube mwaalumi wini-wini. 3Kocita eeco mwami Leza ncakulailila, weende munzila zyakwe lyoonse akubamba malailile amilawo yakwe azeezyo nzyaamba, kweendelana azilembedwe mu Mulawo wa Mozesi, kutegwa uzwidilile muli zyoonse nzyoyoocita akufumbwa nkoyooya. Notikabe muntu uusumpukide muli zyoonse nzyocita. 4Kuti naa wacita oobo, awalo Mwami Leza uyoocibamba cikonke kulindime ncaakandaambila kuti balunyungu lwangu bayoolela Isilayeli kufumbwa buyo kuti kabasyomeka kulinguwe amoyo woonse.
5“Lino yebo lwako ulizi zyakacita Jowabu, mwanaa Zeluiya wakajaya basilutwe bobilo bampi ya Isilayeli basolwedwa a Abina mwanaa Nee, alimwi a Amasa mwanaa Jeta. Wakabajaya ciindi caluumuno akaambo kamfu nzibakaletelezya bamwi muciindi cankondo. Wakajaya bantu banyina mulandu ono mebo mubwami bwangu ndasamide mulandu wabujayi bwakwe. 6Mubusongo bwako ulizi mboelede kucita, utaleki kuti afwe lufuŋanda pe.
7“Lino ukabafwide luzyalo bana ba Baazilayi uuzwa ku Giliyadi, ukabalele kabotu, kabayoolida atebule lyako nkaambo bakandifwida luzyalo nindakali kutija Abisalomu munyoko.
8“Syimeyi mwanaa Gela, uuzwa kumunzi wa Bahulimu, mucisi ca Benjamini, wakanditukila kapati buzuba mbwendakali kumunzi wa Mahanaimu, pele naakandiswaanya alimwi kumulonga wa Jolodani ndakamusyomezya muzina lya Mwami Leza kuti nsikooyoomujaya pe. 9Lino yebo mubusongo bwako ubone kuti wasubulwa bweelede, uleelede kubona kuti wajaigwa.”
Lufu lwa Devedi
10Lino Devedi wakafwa akuzikkwa mu Jelusalemu. 11Wakalela Baisilayeli kwamyaka iili makumi one, wakalela mu Hebuloni kwamyaka iili ciloba alimwi akulela mu Jelusalemu kwamyaka iili makumi otatwe aitatu. 12Solomoni ngowakalela mubusena bwawisi alimwi wakakkalikila mukulela.
Lufu lwa Adonija
13Lino Adonija, mwanaa Hagiti, wakainka kuli Batisyeba banyina Solomoni. Ooko balo nkubakamubuzya kuti, “Ino uyanda kwaabanzi?” Eelyo Adonija wakaingula kuti, “Peepe, taakwe.” 14Amane wakayungizya akwaamba kuti, “Ndilijisi cakukumbila kulinduwe.” Aawo Batisyeba wakaingula kuti, “Ino ncinzi?”
15Eelyo Adonija wakati, “Ulizi kale kuti ndime ndakeelede kuba mwami, cakuti abantu boonse bamucisi ca Isilayeli bakali kuyeeya ndime kuti mbe mwami. Pele cakazoocitika bumbi, nkabela mwanookwesu wakaba ngomwami, nkaambo oolu ndulwakali luyando lwa Mwami Leza. 16Ono lino ndijisi nceyanda kukumbila, akaka utandikasyi pe.”
17Batisyeba wakabuzya kuti, “Ino ncinzi?” Adonija wakati, “Akaka kondikumbilila kumwami Solomoni, nkaambo ndilizi kuti inga takwe kukaka kulinduwe, kuti andizumizye ndikwate musimbi wiitwa kuti Abisyagi, uuzwa ku Syunemu.” 18Mpoonya Batisyeba wakati, “Ncibotu, ndiyookwaambilila kumwami.”
19Aboobo Batisyeba wakainka kumwami kuyooambilila Adonija. Lino mwami wakaima akukotama kujuzya banyina cabulemu. Amane wakakkala acuuno cakwe cabwami, wakaleta acimbi ncobakakkala banyina kulubazu lwakwe lwakululyo. 20Mpoonya banyina bakaamba kuti kulinguwe, “Ndijisi tukani twakukumbila kulinduwe, pele akaka utandikasyi.”
Mwami wakati, “Ino makani nzi, baama? Nsimukasyi pe.”
21Mpawo banyina bakati, “Komuzumizya Adonija kuti akwate Abisyagi waku Syunemu.”
22Lino mwami wakati kuli banyina, “Ino nkaambo nzi nimundikumbila kuti Adonija ndimupe Abisyagi? Mulakonzya nikuba kumukumbilila bwami. Kayi mupati wangu. Alimwi ba Abiyata mupaizi a Jowabu bali kulubazu lwakwe.” 23Mpoonya Solomoni wakakonkezya kuti, “Leza uleelede kuti andisubule akwiindilila kuti Adonija atabbadeli buumi bwakwe kuli ceeci ncaakumbila! 24Mbuli Mwami Leza mbwali muumi ooyo wakandikkazika abwami bwataata Devedi akusyomezya kubupa kulunyungu lwangu, ncobeni ndakonkezya ku Mwami Leza muumi kuti sunu ndilyonya Adonija ulafwa.”
25Aboobo mwami Solomoni wakalailila Benaiya kuunka kuyoojaya Adonija, awalo wakacita oobo.
Kutandwa kwa Abiyata alufu lwa Jowabu
26Mwami Solomoni wakaambila mupaizi Abiyata kuti, “Koya kumyuunda yako ku Anatoti. Weelede kujaigwa, pele nsikookujaya pe, nkaambo nduwe walikubweza bbokesi lya Mwami Leza ciindi ncookali aataata Devedi alimwi wakapenga anguwe mumapenzi aakwe oonse.” 27Mbombuboobu Solomoni mbwaakamugwisya Abiyata mubupaizi bwa Mwami Leza. Eeci cakacita kuti abe aakasimpe makani ngaakaamba Mwami Leza ku Syilo aazyaŋanda yamupaizi Eli abana bakwe.
28Jowabu naakamvwa cakacitika, mukuti awalo wakalimo mubuzangi bwa Adonija, nikuba kuti walo taakagwasilide Abisalomu, Jowabu wakazuzila kucikombelo ca Mwami Leza waakujata meja aacipaililo. 29Makani naakasika kuli Solomoni aakuti Jowabu watijila kucikombelo ca Mwami Leza, akuti wakajisi meja aacipaililo. Solomoni wakalailila Benaiya mwanaa Jehoiyada kuti akamujaye. 30Nkabela Benaiya wakainka kucikombelo akuyooti kuli Jowabu, “Mwami walailila kuti yebo uzwe aawo.” Pele Jowabu wakati, “Pe ndafwida mpoonya aano.” Mpawo Benaiya wakabweeda kumwami akuyoomwaambila mbwakaamba Jowabu.
31Aawo Solomoni wakalailila Benaiya kuti, “Koya ukacite mbuli mbwaamba, kamujaye akumuzikka. Oobo mebo amukwasyi wataata tatukooyooba aamulandu kuli ceeco ncaakacita Jowabu naakajaya batakwe mulandu. 32Leza ulamupa cisubulo Jowabu kubujayi oobo mbwaakacita taata Devedi katezi. Jowabu wakajaya baalumi bobilo, ba Abina, mwanaa Nee silutwe wabasilumamba ba Isilayeli, a Amasa, silutwe wabasilumamba ba Juda. 33Mulandu walufu lwabo ube aali Jowabu abalunyungu lwakwe. Pele Mwami Leza uyoopa kuzwidilila lyoonse kuli balunyungu lwa Devedi aabo bayookkala acuuno cakwe cabwami.”
34Aboobo Benaiya wakainka kucipaililo akuyoojaya Jowabu. Jowabu wakaakuzikkilwa kunyika yakwe munkanda. 35Mpoonya mwami wakabikka Benaiya kuba silutwe wabasilumamba mubusena bwa Jowabu, alimwi wakabikka Zadoki kuba mupaizi mubusena bwa Abiyata.
Lufu lwa Syimeyi
36Mwami Solomoni wakatumina kuti Syimeyi aitwe aze. Naakasika wakati kulinguwe, “Koyaka ŋanda omuno mu Jelusalemu. Kokkala muŋanda eeyo utainki kumbi. 37Kuti naa ukasiye munzi uuno akuyoosika mutala aakalonga ka Kidiloni, ncobeni uyoofwa, mulandu uyooba wako.”
38Lino Syimeyi wakaingula kuti, “Ncibotu eeco, Oolemekwa, ndiyoocita mbuli ncooamba.” Aboobo wakakkala mu Jelusalemu kwaciindi cilamfu.
39Pele nikwakainda myaka yotatwe, bazike ba Syimeyi bobilo bakanjila kumwami waku Gati uutegwa Akisyi mwanaa Maaka. Lino Syimeyi naakamvwa kuti bali mucisi ca Gati, 40wakatanta mbongolo yakwe akuya kumwami Akisyi mucisi ca Gati kayabulangaula bazike bakwe. Wakaakubajana akubaboozya kuŋanda yakwe. 41Mwami Solomoni naakamvwa ncaakacita Syimeyi, 42wakamutumina kuti aboole kulinguwe akuzooti, “Ndakakucita kuti ukonkezye muzina lya Mwami Leza, akukucenjezya kuti toelede kuzwa mu Jelusalemu wacita oobo uyoojaigwa. Sena tookazuminide makani aaya alimwi akuzumina kuti uyooswiilila malailile aangu? 43Ino lino wacityolela nzi cikonke ku Mwami Leza akutaswiilila malailile aangu. 44Ulizi mumoyo wako bubi boonse mbookamucitila taata Devedi. Lino Mwami Leza uyoobweedezya bubi bwako. 45Pele mebo ulandileleka alimwi ulacita kuti bulelo bwa Devedi bukkalilile akutamani.”
46Mpawo mwami wakalailila Benaiya mwanaa Jehoiyada kuti akamujaye Syimeyi.
Mbombuboobu bwami bwa Solomoni mbubwakakkalilila.
Currently Selected:
1 Bami 2: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
