1 Bami 1

Devedi mbwaakacembaala

1Ciindi mwami Devedi naakacembaala, taakali kukonzya kukasaalilwa pe nikuba kuti bamuvumbe buti. 2Eelyo balupati-pati bakwe bakamwaambila kuti, “Oolemekwa, atukujanine mukaintu uutazi musankwa kuti akkale anduwe akukukasaazya. 3Lino kwakaba kulangaula musimbi mweebesi mucisi coonse ca Isilayeli limwi baakujana musimbi uutegwa Abisyagi, uuzwa ku Syunemu, bakamuleta kumwami. 4Nikuba kuti musimbi ooyu wakali mweebesi, alimwi wakali kumubamba akumulindila mwami, pele walo mwami taakwe naakakonzya kumulanga mbuli mukaintu.”

Adonija mbwaakayanda kutola bwami

5Lino Adonija mwanaa Devedi, ngwaakazyala kuli Hagiti, wakali mwaalumi mweebesi, nkaako wakatalika kulisumpula akuti ndime eentibe mwami. Aboobo wakalibambila nkalaki basikutanta mabbiza, abasikumusindikila bazuza kumbele lyakwe bali makumi osanwe. 6Wisi taakwe naakamukazya akumubuzya kuti ino zili boobu uzicitila nzi. Adonija wakali mubotu mukuzyalwa nguwakali kucilila Abisalomu. 7Lino wakaambaula a Jowabu mwanaa Zeluiya, alimwi amupaizi Abiyata, baalumi aaba bakazumina kuti balo bayoomugwasya kuti abe mwami. 8Pele Zodaki mupaizi, Benaiya mwanaa Johoiyada, Natani musinsimi, Syimeyi, Leyi, alimwi amulindizi wa Devedi taakwe nibakazuminana Adonija pe. 9Bumwi buzuba Adonija wakapaizya mbelele abapoho, atwana twaŋombe tuneneede kubusena butegwa Ibbwe lya Nzoka, kufwiifwi akukasensa ka Enilogeli. Wakatamba bana bokwabo, bana bamwami Devedi, abalupati-pati bamwami baku Juda kupobwe eeli lyakupaizya. 10Pele taakwe naakatamba Solomoni munyina, naba Natani musinsimi, naba Benaiya, naba mulindizi wamwami pe.

11Ciindi eeco Natani wakaya kuli Betisyeba banyina Solomoni akuyoobuzya kuti, “Sena toomvwa kuti Adonija mwanaa Hagiti walipa bwami mwini Mwami katazi? 12Kuti koyanda kufutula buumi bwako alimwi abwamwanaako Solomoni, mboobu mebo mbwenga ndakulailila kuti ucite, 13koya kumwami Devedi ukamubuzye kuti, ‘O mwami wangu sena tookandisyomezya akukonka kuti mwanaangu Solomoni nguutikatole busena bwako bwa bwami? Ino caza buti alimwi kuti Adonija abe ngomwami?’” 14Natani wakayungizya akuti, “Yebo kocaambaula a mwami Devedi, ndizoonjila ambebo kuti nkakugwasye kuyumya-yumya makani aako.”

15Aboobo Batisyeba wakanjila muŋanda yakuzyuli yamwami Devedi kuti akamubone. Mwami wakali cembeede kapati, cakuti Abisyagi musimbi waku Syunemu nguwakali kumulanga. 16Batisyeba wakavuntama kumbele lya Devedi, mwami wakamubuzya kuti, “Ino mbuti?” 17Aawo mukaintu wakaingula kuti, “O mwami lwako omwini wakakonkezya muzina lya Mwami Leza wako, wakati mwanaangu Solomoni nguutikatole bwami bwako. 18Pele kolanga ono Adonija waba kale mwami, yebo kakutakwe ancozi mumakani aaya. 19Lino wapa kale cipaizyo cabapoho banji, mbelele, alimwi atoombe tuneneede tunji, watamba bana bako boonse, Abiyata mupaizi, a Jowabu silutwe wabasilumamba bako kupobwe eelyo. Pele mwanaako Solomoni taamutamba pe. 20Oolemekwa, lino boonse Baisilayeli balangilide kulinduwe kuti ubaambile naa nguni uyootola bwami bwako. 21Buyo-buyo mbotikoonene mebo amwanaangu Solomoni tuyoolangwa mbuli kuti tuyanda kuzangila bwami oobu.”

22Kacaambaula mukaintu ooyu, 23Natani wakasika, lino mwami wakaambilwa kuti Natani musinsimi wasika. Eelyo Natani wakanjila akukotamina mwami. 24Wakaamba kuti, “Oolemekwa, sena mbookaambilizya kuti Adonija nguyooba mwami? 25Sunu wapa cipaizyo cabapoho banji, mbelele, atoombe tuneneede, alimwi watamba bana bako boonse, Jowabu silutwe wabasilumamba bako, amupaizi Abiyata. Cino ciindi balalya pobwe anguwe akuti, ‘Aongole mwami Adonija!’ 26Pele mebo, mupaizi Zadoki, Benaiya, alimwi a Solomoni taakwe naatutamba pe. 27Sena, oolemekwa, mbokacaamba oobu kaatakwe akuzibya balupati-pati bako kuti Adonija nguutitole bwami bwako?”

Solomoni mbwaakaba mwami

28Lino mwami Devedi wakati, “Mwaambile Batisyeba anjile.” Mpawo wakaima kumbele lyamwami. 29Mpoonya mwami wakaambila Batisyeba kuti, “Ndakusyomezya muzina lya Mwami Leza, ooyo wakandivuna kuzwa mumapenzi aangu oonse, 30kuti sunu ndilacibamba cikonke ncindakacita kuli nduwe muzina lya Mwami Leza wa Isilayeli, cakuti mwanaako Solomoni nguuyootola bwami bwangu.”

31Aawo Batisyeba wakavuntama akwaamba kuti, “Aongole mwami wangu!”

32Mpoonya mwami Devedi wakalailila kuti baite Zadoki, mupaizi, Natani musinsimi a Benaiya mwanaa Jehoiyada kuti baboole. 33Nibakanjila wakati kuli mbabo, “Amutolelezye abalupati-pati bangu mukatansike mwanaangu Solomoni amyuulu yangu, mukamusindikile akumutola kukasensa ka Gihoni. 34Kukasensa aako mupaizi Zadoki amusinsimi Natani bakamunanike kuti abe mwami wa Isilayeli. Mwaakumana kumunanika mukalizye mweembo akoongolola kuti, ‘Aongole mwami Solomoni!’ 35Mwaakumana mukamusindikile kuza kuno kuti azookkale acuuno cabwami. Nguuzootola busena bwangu, nkaambo ngonguwe ngwindakasala kuba mwami wa Isilayeli a Juda.” 36Benaiya wakaingula kuti, “Akube boobo, alimwi Mwami Leza wako aciyumye-yumye eeco ncooamba. 37Mbubonya Mwami Leza mbwali aanduwe oolemekwa, awalo Solomoni akabe aanguwe mbubonya buyo, alimwi akacite kuti bwami bwakwe bukazwidilile kwiinda bwali bwako.” 38Lino Zadoki mupaizi, Natani musinsimi, Benaiya, Bakeleti, a Bapaleti bakainka baakutansika Solomoni amyuulu yamwami Devedi. Mpoonya bakamusindikila kuya kukasensa ka Gihoni. 39Ooku Zadoki mupaizi wakagwisya nsazi yamafuta aaoliva njaakaletelela kuzwa kutente lisalala. Mpoonya wakananika Solomoni. Amane bakasiba myeembo, mpawo bantu boonse bakoongolola bati, “Aongole mwami Solomoni!” 40Lino bantu aabo bakamutobela kabaya bulizya nyeele akutangala kapati cakuti nyika yoonse yakadima.

41Lino Adonija abaabo mbaakatambide kulya pobwe, bakakumvwa kuyobeka ooku. Jowabu naakamvwa kulila kwamyeembo wakabuzya kuti, “Ani kuyobeka ooku kwaamba nzi mumunzi?” 42Katana akumana kwaamba Jonatani mwana wa mupaizi Abiyata wakasika. Adonija wakati kuli nguwe, “Konjila uli muntu uusyomeka, ambweni waboola aamakani mabotu.”

43Pele Jonatani wakaingula kuti, “Peepe zintu zyabija. Makani ngakuti, Uulemekwa, mwami Devedi wacita Solomoni kuba mwami. 44Ono watuma Zadoki mupaizi, Beniya mwanaa Jehoiyada Bakeleti a Bapeleti kuti bamutansike amyuulu yamwami. 45Zadoki a Natani bamunanika bwami kukasensa ka Gihoni. Bamane babweeda baakunjila mumunzi kabaya busekelela, ncenciceeco ncomumvwide kuyobeka ooku. 46Solomoni wabutola bwami. 47Abalo balupati-pati baluunkinde kuyoolumba mwami Devedi bati, ‘Leza wako ape Solomoni mpuwo mpati akuzwidilizya bulelo bwakwe kwiinda bwako.’ Naakamvwa boobo mwami Devedi wakavuntama abulo wakomba. 48Kati, ‘Aalumbwe Mwami Leza wa Isilayeli, wandicita kuti mebo ndilibonene ameso aangu ooyo walunyungu lwangu uuyooba mwami!’”

49Nibakaambilwa boobo beenzu ba Adonija boonse bamwaika. 50Lino Adonija awalo wakayoowa Solomoni, wakainka kucikombelo waakujata meja aakukaswi kacipaililo. 51Mwami Solomoni wakaambilwa kuti Adonija wayoowa, alimwi ulijatilide kumeja aacipaililo, kaamba kuti, “Mwami Solomoni akonkezye kuti takoondijaya pe.”

52Solomoni wakaingula kuti, “Kuti asyomeke, taticisigwe aasyoonto, pele kuti atasyomeki ulajaigwa.” 53Mpoonya mwami Solomoni wakatuma kuti Adonija aboole kuzwa kucipaililo. Eelyo wakainka kumwami akuyoovuntama kumbele lyakwe. Mwami wakati kulinguwe, “Koya kuŋanda yako.”

Currently Selected:

1 Bami 1: Tonga96

Highlight

Copy

Compare