1 Bami 3
3
Solomoni mbwaakakumbila busongo
(2 Makani 1.3-12)
1Lino Solomoni wakamvwana a Falo mwami waku Ijipiti, kumane wakakwata mwanaa mwami ooyo. Wakaleta musimbi ooyo kuzookkala mumunzi wa Devedi mane kusikila ciindi naakamana kuyaka ŋanda yakwe yabwami aya Leza, alimwi alukwakwa lwakazingulukide munzi. 2Bantu bakacili kupailila mumasena aandeene-andeene, mukuti ŋanda ya Leza tiiyakanayakwa. 3Solomoni wakali muntu uuyandisya Leza, alimwi wakali kutobela milawo ya Devedi wisi, pele walo wakali kutuuzya banyama akuumpa tununkilizyo azipaililo zyaandeene-andeene. 4Ciindi cimwi wakainka ku Gibiyoni kuti akapaizye, nkaambo ooko nkokwakali cipaililo cipati. Ooko Solomoni wakapa zipaizyo zyakutenta zili cuulu. 5Lino masiku aayo Mwami Leza wakalibonya kulinguwe muciloto akumwaambila kuti, “Kumbila kufumbwa ncoyanda kuti ndikupe.”
6Solomoni wakaingula kuti, “Wakatondezya luzyalo kuli Devedi taata mubelesi wako mukuti wakali kusyomeka akululama mumoyo kulinduwe. Yebo wakatondezya luzyalo lwako mukumupa mwana mulombe ooyo uulela sunu mubusena bwakwe. 7Lino O Mwami Leza wangu, wakandibikka kuti nditole zina lyataata kuba mwami nikuba kuti ndicili mwana muniini, alimwi nsizi bulelwa bantu pe. 8Lino mebo ndemubelesi wako ndikkede akati kabantu bako, bantu banji-banji batabaliki. 9Nkaako kondipa busongo bwakuti ndikonzye kulela bantu bako buluzi. Kwataba boobo, ino inga ndakonzya buti kulela bantu aaba?”
10Aboobo Mwami Leza wakabotelwa akukumbila kwa Solomoni ooku. 11Eelyo wakati kuli nguwe, “Nkaambo kakuti wakumbila busongo kutali kuti woongole nikuba kuvuba kapati naa kuti kokoma basinkondonyoko, 12ndilakupa eeco ncookumbila. Ndilakupa busongo bunji alimwi akumvwisya zintu cakuti taakwe wakali mbubo kale naba uyooba mbubo alili.” 13Alimwi kuyungizya ndilakupa ancootakumbila. Uyoovuba akuba muntu uulemekwa mubuumi bwako boonse cakuti kunyina mwami uumbi uyooezyanyizigwa anduwe. 14Alimwi kuti naa kondiswiilila akubamba milawo yangu amalailile aangu, bwakacita uso Devedi, ndiyookucita kuti woongole.
15Lino Solomoni naakasinsimuka, wakaziba kuti ngu Leza wali kwaambaula anguwe muciloto. Aboobo wakainka ku Jelusalemu waakwiima kumbele lyabbokesi lyacizuminano ca Mwami Leza. Nkabela wakapa zipaizyo zyakutenta azyalumvwano ku Mwami Leza. Amane wakacitila balupati-pati bakwe pobwe.
Solomoni mbwaakabeteka mulandu muyumu
16Ciindi cimwi kwakaza bakaintu bavuule bobilo akwiima kumbele lya mwami Solomoni. 17Umwi mukaintu wakaamba kuti, “Oolemekwa, mebo amukaintuma ooyu tukkala ŋanda yomwe, mebo ndakatumbuka mwana mulombe kaliwo ooyu. 18Pele nikwakainda mazuba otatwe kazyedwe mwanaangu, awalo ooyu wakatumbuka mwana mulombe, twakali buyo tobilo muŋanda kakutakwe aumwi muntu pe. 19Bumwi buzuba masiku, uuyo mukaintu naakali koona wakalimbilila mwanaakwe, cakuti mwana ooyo wakafwa. 20Mukaintu ooyu naakabona kuti mwanaakwe wafwa, wakabuka masiku ngoonya aayo wabba mwanaangu muumi nindakali koona, waakumulazika kubulo bwakwe. Eelyo wakabweza mwanaakwe ooyo wakafwa akuzoomulazika abulo bwangu. 21Nibwakaca cifumo-fumo ndakabuka kuti ndinyonsye mwanaangu, ndakajana kuti mwana ulifwide. Nkabela nindakamulangisisya ndakajana kuti taali ngomwanaangu pe.”
22Lino awalo ooyo umwi mukaintu wakati, “Pe, wabeja yebo! Ooyu mwana muumi nguwangu, wako nguwakafwa!” Mukaintu mutaanzi kwaamba makani wakati, “Peepe! Mwana wakafwa nguwako, ooyu muumi ngowangu!” Mbubakali kukazyanya oobo kumbele lyamwami Solomoni.
23Mpoonya mwami Solomoni wakaamba kuti, “Ooyu waamba kuti, ‘Mwanaangu muumi, wako nguwakafwa,’ kwamana ayebo uti, ‘Peepe wako nguwafwa, wangu muumi.’” 24Mpoonya mwami wakalailila kuti kuletwe panga, nkabela panga nilyakaletwa, 25mwami wakati, “Amumukosole muzipaanzi zyobilo ooyu mwana uupona mupe cipaanzi umwi aumwi wabakaintu aaba bobilo.”
26Mpawo banyina mwana ooyo wakali muumi, mbokuli kuti bakali kumuyandisya amoyo uumaninide, bakati ku mwami, “Akaka oolemekwa, utamujayi mwana pe! Mupe buyo kumukaintu ooyu!” Pele walo ooyo umwi wakati, “Mwana utamupi nikuba kuluumwi wesu pe! Amumukosole buyo muzipaanzi zyobilo.”
27Mpoonya Solomoni wakati, “Mutamujayi mwana! Pele amumupe kumukaintu ooyu wasaanguna kwaamba. Mbabanyina mwana ncobeni.”
28Lino Baisilayeli nibakamvwa kubeteka kwamwami, bakatalika kumulemeka kapati, Bakaziba kuti Leza nguwakamupa busongo bwakukosola twaambo munzila iiluzi.
Currently Selected:
1 Bami 3: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
