1 Bami 13
13
Bukombi bwaku Beteli mbubwakasinganyizigwa
1Lino Mwami Leza wakalailila umwi musinsimi uuzwa ku Juda kuti ainke ku Beteli. Wakasika ooko ciindi Jelobowamu ncaakaimvwi kucipaililo kuti ape cipaizyo. 2Lino mukucita ncaakalaililwa a Leza musinsimi ooyo wakasinganya cipaililo akuti, “Yebo ocipaililo, ocipaililo, mboobu mbwaaamba Mwami Leza, ‘Mwana mulombe wazina lya Josiya, uyoozyalwa muciinga ca Devedi. Nkabela alinduwe mpayoopaizizya bapaizi bapaizya alinduwe, alimwi alinduwe mpayootentela mafuwa aabo.’” 3Mubuzuba mbubonya oobo musinsimi wakapa citondezyo wati, “Cipaililo eeci cilaanduka eelyo itwe lilimpawo lilamwaika. Ndendilyo yebo Jelobowamu notikazibe kuti Mwami Leza nguuamba kwiindila mulindime.” 4Lino mwami Jelobowamu naakamvwa oobu, wakatondeka muntu ooyo akwaamba kuti, “Amumujate!” Mpoonya aawo kuboko kwamwami kwakalandabalila limwi, taakacili kukonzya kukuvunga alimwi pe. 5Acalo cipaililo cakaanduka, itwe lyakamwaika, mbubonya bwakaamba musinsimi muzina lya Mwami Leza. 6Mwami Jelobowamu wakaambila musinsimi kuti, “Akaka, ndikombela ku Mwami Leza wako, umukumbile kuti aponye kuboko kwangu!” Mpawo musinsimi wakamukombela kuli Leza, mpoonya kuboko kwamwami kwakapona. 7Eelyo mwami wakaambila musinsimi kuti, “Atuunke kuŋanda yangu ukalye. Ndiyookupa cipo akaambo kaceeci ncoondicitila.” 8Pele musinsimi wakaingula kuti, “Nikuba kuti wandipa cisela calubono lwako loonse, nsikonzyi kuunka anduwe pe. Nsikonzyi kulya nikuba kunywa maanzi kuno. 9Mwami Leza wandilailila kuti nsyeelede kulya nikuba kunywa cintu pe, alimwi nsyeelede kupiluka anzila eeyo njindakaleta.” 10Aboobo taakwe naakainda nzila eeyo njaakaleta, wakatola nzila iimbi.
Mudaala musinsimi waku Beteli
11Ciindi eeco kwakali mudaala musinsimi wakali kukkala mu Beteli. Bana bakwe bakamwaambila eezyo zintu nzyaakacita musinsimi uuzwa ku Juda ambuli mbwaakaambila mwami Jelobowamu. 12Eelyo wisi wakababuzya kuti, “Ino watozya nzila iili?” Bakamutondezya nzila eeyo, 13mpoonya wakabaambila kuti bamubambile mbongolo yakwe kutegwa atante. Bakamubambila, eelyo wakatanta 14akutobela nzila eeyo, katobela musinsimi ooyo waku Juda. Wakaakumujana ulikke mucisiko camubanga. Mpawo wakamubuzya kuti, “Sena ndonduwe musinsimi uuzwa ku Juda?” Walo wakaingula kuti, “Iiyi, ndime.” 15Eelyo wakati, “Atweende kuŋanda ukalye.” 16Pele musinsimi waku Juda wakati, “Peepe, nsiyandi kuunka kuŋanda yako nikuba kulya naa kunywa maanzi kuno pe, 17nkaambo Mwami Leza wakandilailila kuti nsyeelede kulya nikuba kunywa cintu cimwi pe, alimwi nsyeelede kuti nditole njiyonya nzila njindeza aayo okuno ndabweeda kumunzi.”
18Lino ooyo mudaala musinsimi waku Beteli wakati kulinguwe, “Amebo mbubonya ndili musinsimi uuli mbuli nduwe, nkabela Mwami Leza wandaambila kwiindila mumungelo kuti ndizookutole kuŋanda yangu kuti ukalye akunywa maanzi.” Kwalo wakali kumuunina buyo. 19Eelyo musinsimi uuzwa ku Juda wakainka anguwe kuŋanda yakwe waakulya akunywa. 20Lino nibakacili kulya majwi aa Mwami Leza akasikila ku mudaala musinsimi ooyo 21wakaamba cakupozomoka kumusinsimi uuzwa ku Juda wakati, “Mwami Leza waamba kuti akaambo kakuti taakwe noondiswiilila, akutobela malailile ngindakakupa nde Mwami Leza wako, 22pele wapiluka akuzoolya zilyo mubusena mbookaambilwa kuti toelede kulida naa kunywida muno, uyoojaigwa, nkabela mubili wako tuukooyoozikkilwa kuzyuumbwe zyabasikale bako pe.”
23Lino nibakamana kulya, ooyo mudaala musinsimi wakabambila musinsimi uuzwa ku Juda mbongolo yakwe, aawo walo wakatanta akuunka. 24Pele kaceenda, kwakasika syuumbwa wakamujata wamujaya wawida ansi. Mbongolo yakwe asyuumbwa ooyo zyakaliimvwi kumbali aamutumba wakwe. 25Bamwi bantu bakainda aawo akubona muntumba munzila asyuumbwa kaimvwi aafwiifwi anguwe. Bakaya mumunzi wa Beteli akwaamba ncobakabona. 26Nkabela ooyo mudaala musinsimi naakaamvwa makani aayo wakaamba kuti, “Oyo ngonguwe musinsimi watakaswiilila malailile aa Leza. Mwami Leza nguwatuma syuumbwa kuti amulume akumujaya, mbubonya mbuli mbwaakacenjezezye.” 27Eelyo wakaambila bana bakwe kuti bamubambile mbongolo yakwe, eelyo bakamubambila, 28nkabela wakeenda, wakaakujana mutumba wamusinsimi ulilede munzila ayalo mbongolo asyuumbwa kaziimvwi munsi aanguwo. Syuumbwa ooyo taakalya mutumba nikuba kujata mbongolo pe. 29Mpawo ooyo musinsimi wakabweza mutumba akuubikka ambongolo yakwe, wakuutola ku Beteli nkwaakazoomuzikka akumulila. 30Wakuuzikka mucuumbwe camukwasyi wakwe, nkabela walo abana bakwe bakamulila musinsimi ooyo kabati, 31“Akaka mukwesu, akaka mukwesu! Ndaakufwa, ambebo mukandizikke mucuumbwe eeci nciconya, mukabikke mutumba wangu munsi aamafuwa aakwe. 32Majwi aalya ngaakakanana mukulaililwa a Mwami Leza kwaamba zyacipaililo amalende aali mumasena aaminzi yaku Samaliya ayoocitika ncobeni.”
Cinyonyoono ca Jelobowamu
33Kwaamba zya Jelobowamu, mwami wa Isilayeli, taakasiya nzila zyakwe zibi wakalisalila bapaizi bamalende, kufumbwa ooyo wakayanda kuba mupaizi wakamubikka.
34Ncecinyonyoono eeci cakalobya mukwasyi wa Jelobowamu, walo wakanyonyweedwa limwi munyika.
Currently Selected:
1 Bami 13: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
