1 Bami 14

Lufu lwamwana mulombe wa Jelobowamu

1Lino ciindi eeco Ahija, mwanaa Jelobowamu wakaciswa. 2Nkabela Jelobowamu wakaambila mukaintu wakwe kuti, “Libbalaike kuti bantu batakuzibi kuti uli mukaintu wangu, wamana uunke ku Syilo ooko nkwakkala musinsimi Ahija ooyo wakandaambila kuti ndime eentikabe mwami wa Baisilayeli. 3Utolelezye azinkwa zili kkumi, alimwi akankuli kabuci. Ukamubuzisisye kabotu, uyookwaambila citikacitike kumwana.”

4Aboobo mukaintu wakacita mbwaakaambilwa, wainka kuŋanda ya Ahija ku Syilo. Ahija Meso aakwe akaloomfokede. 5Pele Mwami Leza wakalimucenjezezye kale kuti mukaintu wa Jelobowamu uli munzila kuboola kuli nguwe kuti azoobuzye zyamwanaakwe mulombe ooyo uuciswa. Mwami Leza wakaambilide Ahija mbweelede kuzoomwaambila. 6Ahija naakamvwa musindo amulyango waŋanda yakwe, wakati kuli nguwe, “Konjila muka Jelobowamu nolicengeezya mbuli kuti toli nguwe? Ndijisi makani aatakondi. 7Koya ukaambile mwami Jelobowamu kuti, mboobu mbwaamba kulinduwe Mwami Leza wa Isilayeli wati, ‘Ndakakusala kuzwa akati kabantu kuti usolwede bantu bangu Baisilayeli. 8Ndakagwisya bwami kuzwa kuciinga ca Devedi akubupa kuli nduwe. Pele yebo toli mbuli bwakabede Devedi mubelesi wangu, wakali kunditobela wakabamba malailile aangu akunditobela amoyo omwe, kacita buyo ziluleme kulindime. 9Yebo wacita zinyonyoono zipati kwiinda boonse baleli bakakusaangunina. Wakabumba baleza bapange, amituni yalubulo. Noondifutatila boobu wandinyemya. 10Lino akaambo kaceeci ndiyooleta mapenzi mapati kumukwasyi wako, ndiyoojaya boonse balombe bamulunyungu lwako, baniini abapati boonse buyo. Ndiyoobaumpa mbuli bufumba bakabe lufuse. 11Kufumbwa waciinga cako uyoofwida mumunzi uyooligwa babwa, awalo ooyo uyoofwida musokwe uyooligwa bayuni. Ndime Mwami Leza waamba boobo.’”

12Alimwi Ahija wakacili kwaamba kumukaintu wa Jelobowamu wakati, “Lino kobweeda kuŋanda yako. Pele mbotikalyatile buyo mumunzi awalo mwanaako uyoofwa. 13Nkabela bayoomulila akumuzikka. Ooyu uyooba ngomwana alikke ngwaakaboteledwe Mwami Leza wa Isilayeli. 14Alimwi Mwami Leza uyoobikka uumbi mwami kuti alele ba Isilayeli, mwami ooyo nguyoolobya mukwasyi wa Jelobowamu. 15Mwami Leza uyooyuuntanya Baisilayeli nkabela bayooteketeka mbubuyuuntana lubu mumaanzi. Uyoozyula akutanda Baisilayeli kuzwa munyika eeyi mbotu njaakapa kuli basikale babo, uyoobamwaisya kutala lya mulonga wa Yufuletisi, nkaambo kakuti bakamunyemya nibakabumba mituni yaleza mukaintu Asyela. 16Leza uyoobafutatila Baisilayeli nkaambo Jelobowamu wakacita zinyonyoono alimwi wakasolweda Baisilayeli muzinyonyoono.”

17Lino mukaintu wa Jelobowamu wakabweeda ku Tiza. Pele mbwaakalyatila buyo mumunzi, mwana wakafwa. 18Nkabela Baisilayeli bakamulila akumuzikka, mbubonya mbuli mbwakaambide Mwami Leza kwiindila mumubelesi wakwe, Ahija musinsimi.

Lufu lwa Jelobowamu

19Lino zyoonse zintu zyaakacita mwami Jelobowamu, nkondo nzyaakalwana, alimwi azya mbwaakalela, zyoonse zililembedwe mubbuku lyamakani aabami Baisilayeli. 20Jelobowamu wakalela kwamyaka iili makumi obilo aibili. Mpoonya wakafwa akuzikkwa, nkabela mwanaakwe Nadabu nguwakaba mwami mubusena bwakwe.

Zyamwami Lehobowamu wa Juda

(2 Makani 11.5—12.15)

21Lino Lehobowamu, mwanaa Solomoni wakali aamyaka iili makumi one aumwi ciindi naakaba mwami wa Juda. Wakalela kwamyaka iili kkumi aciloba mu Jelusalemu, munzi ooyo Mwami Leza ngwaakasala kuzwa mucisi ca Isilayeli coonse kuba mbobusena bwakukombela. Banyina bakali Naama, bazwa ku Amoni.

22Lino bantu bamusyobo wa Juda bakabisizya Mwami Leza. Azinyonyoono nzibakacita bakamunyemya kwiinda bwakali kumunyemya basikale babo. 23Bakayaka malende, akwiimika mabwe amituni ya Asyela muzilundu a munsi amisamu iivwevwede. 24Lino cintu cakaindilila kubija ncakuti kwakali baalumi bakali kucitana zitaambiki mumonya mumalende oomo. Bajuda bakali kucita zisesemyo eezi zyakali kucita misyobo eeyo Mwami Leza njaakatanda Baisilayeli kabatanasika.

25Mumwaka wasanu wakulela kwa Lehobowamu, mwami Syisyaki waku Ijipiti wakalwana munzi wa Jelusalemu. 26Wakatola lubono loonse lwamuŋanda ya Leza ayabwami. Wakatolelezya antobo zyangolida zyaakafude Solomoni. 27Lino mwami Lehobowamu wakafula ntobo zyamukuba mubusena bwazeezyo zyakatolwa, wakazipa kubalangi babalindizi baŋanda yabwami. 28Kufumbwa ciindi mwami ncaakali kuunka kuŊanda ya Leza balindizi bakali kuyumuna ntobo eezyo, kwamana bakali kuziboozya kukaanda kubalindizi.

29Lino zyoonse zintu eezyo nzyaakacita mwami Lehobowamu zililembedwe mubbuku lyaamba zyabami ba Juda. 30Lyoonse kwakali mazwanga akati kabwami bwa Lehobowamu abwa Jelobowamu. 31Lehobowamu wakafwa akuzikkwa abasikale bakwe mumunzi wa Devedi, banyina bakali Naama bazwa ku Amoni, eelyo mwanaakwe Abija nguwakaba mwami mubusena bwakwe.

Currently Selected:

1 Bami 14: Tonga96

Highlight

Copy

Compare