1 Makani 24

Milimo yakapegwa bapaizi

1Mboobu bana ba Aloni mbubakaapawidwe. Bana aaba bakali ba Nadabu, Abihu, Eliyazaa, a Itamaa. 2Pele Nadabu a Abihu bakafwa wisi katanafwa, alimwi bakanyina bana balombe, caamba kuti Eliyazaa a Itamaa mbibakabeleka mubupaizi. 3Mwami Devedi wakaapaula baciinga ca Aloni mumalizi, mumulimo ooyu wakagwasigwa a Zadoki walunyungu lwa Eliyazaa a Ahimeleki walunyungu lwa Itamaa. 4Bunji bwabakali kukonzya kusololela bakajanika mulunyungu lwa Eliyazaa kwiinda muli lwa Itamaa. Aboobo wakabaapaula bweelede. Kwakali basololi bamikwasyi bali kkumi acisambomwe kuzwa kulunyungu lwa Eliyazaa. Bali lusele bakazwa balunyungu lwa Itamaa. 5Wakabaapaula cakutasalulula kwiindila mukuuma cisolo. Kwakali balangilila zyamuŋanda ya Leza abalangilila zyabukombi kuzwa kunyungu zyobilo zyoonse zya Eliyazaa a Itamaa. 6Bakali kupana ziindi mukuuma cisolo. Nkabela Syemaiya mwanaa Netaneli Mulevi wakalemba mazina aabo, mwami abalupati-pati bakwe, Zadoki mupaizi, Ahimeleki mwana wa Abiyata, abasololi bamikwasyi yabapaizi a Balevi kabalangilila. Mukwasyi omwe wakazwa kuli Eliyazaa umwi kuli Itamaa.

7Wakasalwa kusaanguna ngu Jehoiyalibu, wabili ngu Jedaiya, 8watatu ngu Halimu, wane ngu Seyolimu, wasanu ngu 9Malikija, wacisambomwe ngu Mijamini, 10waciloba ngu Hakozi, walusele ngu Abija, 11wafuka ngu Jesyuwa, wakkumi ngu Syekaniya, 12wakkumi aumwi ngu Eliyasyibu, wakkumi ababili ngu Jakimu, 13wakkumi abatatu ngu Hupa, wakkumi abane ngu Jesyebeyabu, 14wakkumi abasanu ngu Biliga, wakkumi acisambomwe ngu Ima, 15wakkumi aciloba ngu Hezii, wakkumi alusele ngu Hapizezi, 16wakkumi afuka ngu Petahiya, wamakumi obilo ngu Jehezikeli, 17wamakumi obilo aumwi ngu jakini, wamakumi obilo ababili ngu Gamuli, 18wamakumi obilo abatatu ngu Delaiya, alimwi wamakumi obilo abane ngu Maaziya. 19Mbubakali kuccililana oobu nibakali kukutauka muŋanda ya Mwami Leza. Bakeendelanya malailile ngubakalaililwa asikale wabo Aloni, mbubonya mbuli mbwaakalaililidwe a Mwami Leza wa Isilayeli.

Balevi bamwi

20Mbaaba bamwi balunyungu lwa Levi. Kuzwa kubana ba Amulamu kwakali Syubayeli. Kuzwa kubana ba Syubaeli kwakali Jedaiya.

21Kwaamba zyabana ba Lehabiya, Isyiya ngowakusaanguna, 22kuzwa ku Baiziha kwakali Syelomoti. Kuzwa Basyelomoti kwakali Jahati.

23Bana ba Hebuloni bakali boobu, Jeliya ngowakusaanguna, kumane ngu Amaliya, kumane ngu Jahaziyeli, kuzwa waawo ngu Jekameyamu.

24Kuzwa kuli Uziyeli ngu Mika, kuzwa kubana ba Mika ngu Syamii. 25Munyina Mika ngu Isyiya. Kuzwa kubana ba Isyiya ngu Zekaliya.

26Bana ba Melali mbaa: Mali, Musyi a Jaaziya. 27Bana ba Jaaziya mbaa: Syohamu, Zaku a Ibili. 28Kuzwa kubana ba Mali ngu Eliyazaa, walo taakajisi bana balombe. 29Umwi wabana ba Mali ngu Kisyi wakazyala Jelameeli. 30Bana ba Musyi mbaa: Mali, Eda a Jehimoti. Aaba mba Balevi kweendelana amikwasyi yabo. 31Mbubonya mbuli bwakacita babunyina balunyungu lwa Aloni, bakauma cisolo mwami Devedi, Zadoki, Ahimeleki abasololi bamikwasyi yabapaizi a Balevi kabalangilila. Kwakanyina lusalululo, bana bamupati abamusyoonto bakali kulangwa mbubonya.

Currently Selected:

1 Makani 24: Tonga96

Highlight

Copy

Compare