1 Makani 23

1Lino Devedi naakacembaala wakabikka Solomoni mwanaakwe kuba mwami wa Isilayeli.

Mulimo wa Balevi

2Mwami Devedi wakabunganya Baisilayeli boonse, bapaizi antoomwe a Balevi. 3Balevi boonse bakajisi myaka iili makumi otatwe akwiindilila bakabalwa. Mweelwe wabaalumi aaba wakali zyuulu zili makumi otatwe alusele. 4Devedi wakati, “Kuzwa muli baaba bali zyuulu zili makumi obilo aane beelede kunoolanga mulimo wakuyaka ŋanda ya Mwami Leza. Bali zyuulu zili cisambomwe mbabanooendelezya akubeteka. 5Bali zyuulu zyone mbabanoolindila milyango. Bali zyuulu zyone mbabanootembaula Mwami Leza azigwali-gwali nzindakapa kuti zibelesegwe mumulimo ooyu.”

6Mboobu Devedi mbwaakaandaanya Balevi muziinga. Kwakali Bagesyoni, Bakohati a Bamaleli.

7Bana ba Gesyoni mbaa: Ladani a Syimeyi. 8Bana ba Ladani mbaa: Johiyeli uuli ngowakusaanguna, Zetamu, a Joweli. Antoomwe bakali botatwe. 9Bana ba Syimeyi mbaa: Syelomoti, Haziyeli a Halani. Antoomwe bakali botatwe. Aaba mbabasololi bamikwasyi ya Ladani. 10Bana ba Syimeyi mbaa: Jahati, Ziza, Jeusyi a Baliya. Aaba mbabana bone ba Syimeyi. 11Mukuzyalwa kwabo Johati ngowakali musololi, kumane kwaza Ziza. Pele ba Jeusyi a Beliya bakanyina bana balombe banji-banji, nkaako bakabalwa kuti mmukwasyi omwe akupegwa lukono lomwe.

12Bana Bakohati mbaa: Amulamu, Iziha, Hebuloni a Uziyeli. Antoomwe bakali bone. 13Bana ba Amulamu mbaa: Aloni a Mozesi. Aloni wakazandulwa alunyungu lwakwe kukabe kutamani kuti kabalanga zintu zisalalisya zya Mwami Leza. Mbabanoopaizya ku Mwami Leza kumubelekela akuleleka bantu muzina lya Mwami Leza kukabe kutamani. 14Bana ba Mozesi muntu wa Leza bakabalilizigwa a Balevi. 15Bana ba Mozesi mbaa: Gesyomu a Eliyezaa. 16Kuli balunyungu lwa Gesyomu, Syubaeli ngowakusaanguna. 17Kuli balunyungu lwa Eliyezaa, Lahabiya ngowakusaanguna. Eliyezaa wakanyina bana bambi balombe. Pele bana balombe ba Lahabiya bakali banji.

18Kubana ba Iziha, Syelomiti wakusaanguna. 19Bana ba Hebuloni mbaa: Jeliya ngowakusaanguna, kumane ngu Amaliya, Jahaziyeli a Jekameyamu. 20Bana ba Uziyeli mbaa: Mika uuli ngowakusaanguna kumane ngu Isyiya.

21Bana ba Melali mbaa: Mali a Musyi. Bana ba Mali mbaa: Eliyazaa a Kisyi. 22Eliyazaa wakafwa kanyina mwana mulombe, wakajisi buyo basimbi. Bana bokwabo bamwi, bana ba Kisyi bakabakwata. 23Bana ba Musyi mbaa: Mali, Eda a Jelemoti. Antoomwe bakali botatwe. 24Aaba mbabalunyungu lwa Levi muziinga amikwasyi yabo, mbubonya mbuli mbubakabalwa akulembwa. Omwe-omwe wabaaba wakajisi myaka iili makumi obilo naa kwiindilila wakajisi bulizi mumulimo wakubelekela muŋanda ya Mwami Leza.

25Mboobu Devedi mbwaakaambide, “Mukuti Mwami Leza wa Isilayeli waleta luumuno kubantu bakwe akuti uzookkala mu Jelusalemu kukabe kutamani. 26Nkaako Balevi tabacinoobwezi limbi tente niziba zibelesyo zyalyo.” 27Balevi bali aamyaka iili makumi obilo akwiindilila bakabalwa mbubonya mbuli mwami Devedi mbwaakalailila. 28Mulimo wa Balevi wakali wakugwasya Aloni abalunyungu lwakwe mukukutauka mulimo wamuŋanda ya Mwami Leza. Mbabakali kulanga mabbuwa atwaanda twawo, kusalazya zintu zya Mwami Leza, akucita milimo imwi kuŋanda ya Leza. 29Bakali kulanga cinkwa cacituuzyo, busu bwacipaizyo camaila, atunkwa tupapalete tutakwe mimena, kuvwelanya akukanga, kweeleka akupima zyoonse zipegwa kuŋanda ya Mwami Leza. 30Lyoonse cifumo-fumo baleelede kulumba akutembaula Mwami Leza. Baleelede kunoocita oobo kumangolezya. 31Kapati ziindi zyoonse lyakali kupegwa zipaizyo zyamasabata, likkala mwezi, aziindi zyamapobwe amwi. Bakaleelede kubelekela Mwami Leza buyandika lyoonse kabazulide mbubonya mbuli mbubakalaililwa. 32Aboobo Balevi bakabeleka milimo yamutente lyakuswaanganina amubusena busalala kabalangwa ababunyina bana ba Aloni.

Currently Selected:

1 Makani 23: Tonga96

Highlight

Copy

Compare