1 Makani 19

Devedi mbwaakazunda Baamoni a Basiliya

(2 Samuyele 10.1-19)

1Bweende-bweende Nahasyi mwami wa Baamoni wakafwa, eelyo Hanuni mwanaakwe nguwakalela mubusena bwawisi. 2Lino Devedi wakati, “Ndamutondezya luse Hanuni, mwanaa Nahasyi mbubonya mbuli wisi mbwaakali kundicitila.” Aboobo Devedi wakatuma babelesi bakwe kuyoomulizya nkaambo kawisi. Babelesi ba Devedi bakasika munyika ya Baamoni. 3Pele bapati ba Baamoni bakati kuli Hanuni mwami wabo, “Sena uyeeya kuti Devedi naatuma basikukulizya nkulemeka uso? Tee watuma babelesi bakwe kuti bazootwele munzi akuubona mbuubede kwamana bazoousaale.”

4Mpawo Hanuni wakajata babelesi ba Devedi akubanyoola cilezu, akukosola zibaki zyabo mpozili akati kazibuno amane wabatanda. 5Nkabela ciindi Devedi naakaambilwa makani aaya, wakatuma basikuyoobacingauzya, nkaambo balo bakafwide nsoni kapati. Eelyo mwami wakati, “Amukkale ku Jeliko kusaanguna mane kusikila zilezu zyanu zimene akulampa, kwamana ndendilyo nimuyoopiluka.”

6Lino Baamoni nibakabona kuti Devedi wacimwa, Hanuni a Baamoni bakatumya matalenta aansiliva aali cuulu kuti bakabbadezye nkalaki abasikutanta bazwa ku Mesopotamiya, Alamumaaka a Zoba. 7Bakabbadelela nkalaki zili zyuulu zili makumi otatwe azibili abasikutanta kubikkilizya a mwami waku Maaka ampi yakwe. Bakaboola kuzooyaka zivuka kumbali a Medeba, balo Baamoni bakali kuzwida muminzi yabo kuzoolwana.

8Lino Devedi naakamvwa ceeci, wakatuma Jowabu ampi yoonse yabasilumamba basinguzu. 9Eelyo Baamoni bakazwa mumunzi akwiima mindando yakulwana kumanjililo aamunzi, nkabela bami bakazide kubagwasya bakali mumbali.

10Ciindi Jowabu naakabona kuti bamulwana kumbele akusule, wakasala bamwi basilumamba basinguzu akubalanganya a Basiliya. 11Pele aaba basilumamba bamwi bakasyaala wakabasiila Abisyai munyina akubalanganya a Baamoni. 12Mpawo wakati, “Kuti naa Basiliya balaanguzu kwiinda ndime, yebo inga wandigwasya, pele kuti naa Baamoni balaanguzu kwiinda nduwe, mebo ndilaboola kuzookugwasya. 13Kobasicamba alimwi atulwanine bantu besu aminzi ya Mwami Leza wesu, alimwi Mwami Leza acite eeco cimubotela.”

14Aboobo Jowabu abantu aabo bakali aanguwe bakaswena afwiifwi kuti balwane Basiliya, nkabela Basiliya bakatija. 15Mpoonya Baamoni nibakabona kuti Basiliya batija, abalo mbubonya buyo bakatija Abisyai, akuyoonjila mumunzi. Mpawo Jowabu wakapiluka kuzwa kukulwana Baamoni waboola ku Jelusalemu.

16Lino ciindi Basiliya nibakabona kuti bazundwa a Baisilayeli bakatuma batumwa kuti bakalete basilumamba babo bamwi bakali kujwe lyamulonga. Wakabasolweda ngu Syofaki mulailili wabasilumamba ba mwami Hadadeza.

17Nkabela Devedi naakaambilwa makani aaya wakabunganya Baisilayeli boonse antoomwe, akuzubuka mulonga wa Jolodani. Bakainka kuyoobalwana baakundandama kabalangene ambabo. Devedi wakainka kubalwana.

18Mpoonya Basiliya bakatija Baisilayeli alimwi. Nkabela basinkondo ba Devedi bakajaya basinkalaki ba Basiliya bali zyuulu zili ciloba. Alimwi bakajaya abali zyuulu zili makumi one basikweenda aamaulu. Alimwi bakajailizya a Syofaki wakali kubalailila.

19Nkabela ciindi bami bakali kweendelezegwa a Hadadeza nibakabona kuti bazundwa a Baisilayeli, bakapangana cizuminano caluumuno akulibombya kuli Devedi. Mbombuboobu Basiliya mbubakayoowa kugwasya Baamoni alimwi.

Currently Selected:

1 Makani 19: Tonga96

Highlight

Copy

Compare