1 Makani 18

Devedi mbwaakazunda

(2 Samuyele 8.1-18)

1Kusule azeezi Devedi wakalwana Bafilisiti akubazunda, alimwi wakatola munzi wa Gati ayeeyo iizingulukide kuzwa ku Bafilisiti aabo. 2Alimwi wakazunda Bamowabu. Aboobo wakabacita kuti kabatela kulinguwe. 3Alimwi Devedi wakazunda Hadadeza mwami wacisi ca Zoba, kusikila ku Hamati, ciindi Hadadeza naakali kukwakwabula cisi cakwe kusikila kumulonga wa Yufuletisi. 4Mpoonya Devedi wakatola kuzwa kulinguwe basimabbiza bali cuulu amyaanda iili ciloba, abasilumamba bali zyuulu zili makumi obilo, eelyo wakakosoola misisa yamabbiza oonse, wakaleka buyo aankalaki zili mwaanda. 5Nkabela ciindi Baalamu baku Damasikasi nibakasika kuzoogwasya Hadadeza, Devedi wakajaya baalumi baku Siliya bali zyuulu zili makumi obilo azibili. 6Mpoonya wakabikka basilumamba mu Siliya yamu Damasikasi, nkabela Baalamu bakaba bazike ba Devedi akutalika kutela. Eelyo Leza wakagwasya Devedi kuti azunde kufumbwa ooko nkwaaya. 7Aboobo Devedi wakatola ntobo zyangolida eezyo zyakabwezedwe abazike ba Hadadeza wazileta ku Jelusalemu. 8Nkabela kuzwa ku Tibati aku Kuni, minzi ya Hadadeza, Mwami Devedi wakabweza mukuba munji kapati ooyo Solomoni ngwaakabelesya mukubumba cibumbe caziba, zicinda, azibelesyo zimwi zyamukuba zyamuŋanda ya Leza. 9Lino ciindi Toyi mwami wa Hamati naakamvwa kuti Devedi wakazunda basilumamba boonse ba Hadadeza, mwami wa Zoba, 10wakatuma mwanaakwe Hadolamu kumwami Devedi kuti akamujuzye akumusangalazya nkaambo wakalwana Hadadeza akumuzunda nkaambo kakuti Hadadeza lyoonse wakajisi nkondo a Toyi. Nkabela Hadadeza wakali kunga wakatolelezya azintu zyansiliva, ngolida azyamukuba. 11Lino zyoonse eezi Devedi wakazipa ku Mwami Leza antoomwe amali ansiliva, amali angolida eezyo nzyaakasaala kuzwa kumisyobo yoonse njaakazunda eeyi: Edomu, Mowabu, Baamoni, Bafilisiti a Bameleki.

12Abisyai mwanaa Zeluiya wakajaya Baedomu bali zyuulu zili kkumi alusele mukkuti lya munyo. 13Wakabikka basilumamba mu Edomu nkabela boonse Baedomu bakaba bazike bakwe. Mwami Leza wakagwasya Devedi kuti azunde koonse nkwaaya.

14Mbombuboobu Devedi mbwaakeendelezya mu Isilayeli yoonse, Devedi wakali kubeteka bantu bakwe boonse cabululami. 15Jowabu mwanaa Zeluiya ngowakali silutwe wabasilumamba, Jahosyafati mwana wa Ahiludi ngowakali mulembi wamakani. 16Zadoki mwana wa Ahitubi a Ahimeleki mwana wa Abiyata mbibakali bapaizi, Syavusya ngowakali mulembi, 17Benaiya mwanaa Jehoyada wakali ngosilutwe wa Bakeleti a Bapeleti, eelyo bana balombe ba Devedi bakali balailili.

Currently Selected:

1 Makani 18: Tonga96

Highlight

Copy

Compare