1 Makani 17
17
Cisyomezyo ca Leza kuli Devedi
(2 Samuyele 7.1-17)
1Lino mwami Devedi naakakkalikila muŋanda yakwe yabwami. Wakati kuli Natani musinsimi, “Langa, mebo ndikkala muŋanda iiyakidwe amukamba, kakuli bbokesi lyacizuminano ca Mwami Leza likkala mutente.”
2Eelyo Natani wakati kuli Devedi, “Koya ukacite coonse ncoyeeya mumoyo, nkaambo Mwami Leza uli aanduwe.”
3Pele masiku aayo ngoonya Leza wakaambila Natani kuti, 4“Koya ukaambile mubelesi wangu Devedi makani ngindakwaambila nde Mwami Leza kuti, ‘Toli nduwe ootindiyakile ŋanda yakukkala.’ 5Mebo nsinakkede muŋanda kuzwa buzuba mbundakagwisya Baisilayeli kuzwa mu Ijipiti kusikila sunu, pele ndali kweendeenda buyo mutente mwendikkala kuzwa kubusena-abusena. 6Mumasena oonse ngindakali kweendeenda abantu boonse Baisilayeli, sena ndakaambaula nikuba kuli omwe wababetesi Baisilayeli, ooyo ngondakalailila kweembela bantu bangu Baisilayeli mbuli mbelele, sena ndakabaambila kuti, ‘Nkaambo nzi tonandiyakila ŋanda yaziyako zyamukamba?’
7“Lino mboobu mboelede kuyooamba kumubelesi wangu Devedi. Ukati mboobu mbwaamba Mwami Leza Singuzuzyoonse. ‘Ndakakugwisya kuzwa kumacelelo, kuzwa kukweembela mbelele, kuti ukabe muleli wabantu bangu Baisilayeli. 8Alimwi ndakali aayebo kufumbwa nkookabede, ndakanyonyoona basinkondonyoko boonse, nkabela njookupa mpuwo iili mbuli yabapati baansi. 9Eelyo njoosala busena bwa bantu bangu Baisilayeli, alimwi njoobayumya-yumya kutegwa bakakkale mubusena bwabo beni, kabatatuntuliki limbi pe. Abalo bantu babi tabakooyoobakatazya limbi mbuli mbubakali kucita kusaanguna. 10Kuzwa ciindi eeco ncendakabikka babetesi babantu bangu Baisilayeli. Alimwi njookupa kulyookezya kuzwa kuli basinkondonyoko.’ Alimwi Mwami Leza ulaamba kuti, ‘Njookkazikizya mukwasyi wako. 11Ciindi waakufwa akuzikkwa, mbuli basikale bako njooimika mwana wamukwasyi wako, umwi wabana bako, alimwi njoobuyumya-yumya bulelo bwakwe. 12Ngonguwe uyoondiyakila ŋanda, abwalo bulelo bwakwe njoobwiimikizya kukabe kutamani. 13Njooba wisi walo uyooba mwanaangu. Taakwe nenjoogwisya luyando lwangu kuzwa kuli nguwe mbuli mbundakacita kuli yooyo ngookatolela busena. 14Njoomupa bantu bangu abulelo bwangu, acalo cuuno cakwe ciyooimikwa mane kukabe kutamani.’”
15Natani wakaambila Devedi zyoonse Mwami Leza nzyaakamuyubunwida.
Devedi mbwaakakomba
(2 Samuyele 7.18-29)
16Mpoonya aawo Devedi wakanjila mucikombelo ca Mwami Leza akupaila wati, “Ino mebo ndimeni, O Mwami Leza, alimwi mukwasyi wangu ulibuti kuti yebo undeendelezye kusikila sunu? 17Pele lino ucita ziindilila eezi, O Leza alimwi waamba makani aalunyungu lwamubelesi wako kuciindi ciboola. Alimwi ucindilanga mbuli mwaalumi usumpukide kwiindilila, O Mwami Leza. 18Ino inga mebo ndaamba nzi kulinduwe, mbuli mboondilemeka boobu? Nduwe oondizi mbwebede ndemubelesi wako, 19O Mwami Leza. Wacita zyoonse eezi nkaambo kacisyomezyo akuyanda kwamoyo wako nkookandicitila kuti ndizibe ziza kumbele mebo ndemubelesi wako. 20Taakwe uuli mbuli nduwe, O Mwami Leza, kwiindila muli ceeci ncitwakalimvwida lwesu tobeni taakwe Leza uumbi kunze lyako. 21Ino musyobo nzi uuli mbuli bantu bako Baisilayeli, aabo Leza mbaakavuna kuti babe bantu bakwe, kuti abe aampuwo akubacitila zintu zipati zigambya? Waitanda misyobo iimbi amituni yayo kuzwa kubantu bako mbookanununa kuzwa ku Ijipiti. 22Alimwi wakaliimizya bantu bako bantu Baisilayeli kuti babe bantu bako kukabe kutamani, kuti ayebo O Mwami Leza, ube Leza wabo.
23“Lino, O Mwami Leza sinizya kukabe kutamani majwi aayo ngooamba kumubelesi wako akumukwasyi wakwe, ucite mbubonya mbuli mbooamba. 24Ndendilyo zina lyako lyoonse nolinoolemekezegwa mane kukabe kutamani bantu kabati, ‘Mwami Leza Singuzuzyoonse ngo Leza wa Isilayeli,’ awalo mukwasyi wamubelesi wako Devedi uyookkalilila kulinduwe. 25Yebo, Leza wangu, ooyubununa eezi kumubelesi wako koti, ‘Njookkazikizya mukwasyi wako.’ Nkankakaako ncindaba aacamba kukukomba boobu. 26Lino, O Mwami Leza, nduwe Leza, alimwi majwi aako ngabwini, alimwi wasyomezya eeci cintu kumubelesi wako. 27Aboobo, lino cakubotelwa leleka mukwasyi wamubelesi wako, kuti lyoonse ukkalilile kulinduwe mane kukabe kutamani. Nkaambo nduwe, O Mwami Leza, ooamba. Acileleko cako mukwasyi wamubelesi wako uyoolelekwa mane kukabe kutamani.”
Currently Selected:
1 Makani 17: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
