1 Makani 10

Lufu lwa mwami Saulu

(1 Samuyele 31.1-3)

1Lino Bafilisiti bakalwana Isilayeli, Baisilayeli bakatija. Nkabela banji bakajaigwa mucilundu ca Gilibowa. 2Bafilisiti bakeenzya Saulu abana bakwe balombe, Bafilisiti aabo bakajaya Jonatani, Abinadabu a Malikisyuwa bana ba Saulu. 3Lino nkondo yakamukomenena Saulu, cakuti basimata bakamweenzya eelyo bakamucisa. 4Mpoonya Saulu wakati kuli sikubweza zilwanyo zyakwe, “Gwisya panga lyako, undijaye andilyo, nkaambo antela inga aaba batapalwidwe baboola kuzoondisobanya akundijaya.” Pele sikumubwezela zilwanyo taakwe naakacita oobo pe, nkaambo wakaliyoowede. Nkaako Saulu wakabweza panga lyakwe mwini akuwida alindilyo. 5Eelyo sikumubwezela zilwanyo naakabona kuti Saulu wafwa, awalo wakawida apanga lyakwe akufwa. 6Mbombuboobu Saulu mbwaakafwa abana bakwe balombe botatwe, nkaako lunyungu lwakwe loonse lwakafwida antoomwe. 7Lino Baisilayeli boonse bakali mukkuti nibakabona kuti Baisilayeli batija akuti Saulu abana bakwe balombe bafwa, bakasiya minzi yabo akutija. Eelyo Bafilisiti bakasika akuzookkala mulinjiyo.

8Lino nibwakaca ciindi Bafilisiti nibakaboola kuzoosaala zintu zyabaabo bakajaigwa, bakajana Saulu abana bakwe balombe balifwide mucilundu ca Gilibowa. 9Bakakosola mutwe wa Saulu akugwisya zilwanyo zyakwe, akutuma bantu munyika yoonse ya Bafilisiti kuti bazoobweze makani mabotu kwaatola kumituni yabo akubakaintu. 10Mpawo bakabikka zilwanyo zya Saulu muŋanda yabaleza babo akwaanzika mutwe wakwe mucikombelo ca Dagoni. 11Lino bantu boonse bakali kukkala ku Jabesyigiliyadi nibakamvwa zyoonse Bafilisiti nzibakacita Saulu, 12boonse baalumi basinguzu bakainka kuyoobweza mutumba wa Saulu amitumba yabana bakwe balombe biileta ku Jabesyi. Bamane bakazikka zifuwa zyabo munsi amusamu mupati mu Jabesyi, bakaliimya kulya kwamazuba aali ciloba.

13Saulu wakafwa nkaambo taakwe naakasyomeka ku Mwami Leza, taakatobela majwi aa Mwami Leza, alimwi wakaakusonda kumizimo, 14taakabuzya Mwami Leza. Aboobo Mwami Leza wakamujaya. Eelyo wakasandula bulelo bwakwe akubupa Devedi mwanaa Jese.

Currently Selected:

1 Makani 10: Tonga96

Highlight

Copy

Compare