1 Makani 9

Bantu bakaboola kuzwa mubuzike

1Bantu boonse bakalembwa mbubonya mbuli mumazyalani aabo, aaya makani alilembedwe mu bbuku lya bami ba Isilayeli. Bantu ba Juda bakatolwa mubuzike ku Babuloni akaambo kakutasyomeka. 2Lino aabo bakapilukila mumasena amuminzi yabo bakali ba Isilayeli bantu buyo. Bapaizi, Balevi ababelesi bamuŋanda ya Leza. 3Bantu bamisyobo ya Juda, Benjamini, Efulemu a Manase bakakukkalila mu Jelusalemu.

4Balunyungu lwa Pelezi mwanaa Juda bakali kusolodelwa a Utayi mwana wa Amihudi, mwana wa Omuli. Basikale bakwe, bamwi bakali ba Imuli a Baani. 5Balunyungu lwa Syela mwanaa Juda bakali kusolodelwa a Asayiya wakali ngomupati wamukwasyi. 6Balunyungu lwa mwanaa Juda Zela bakali kusolodelwa a Jewuyeli. Antoomwe mikwasyi yamusyobo wa Juda bakali mu Jelusalemu bakali myaanda iili cisambomwe amakumi fuka. 7Aabo bamusyobo wa Benjamini bakakkede mu Jelusalemu mbaa: Salu mwanaa Mesyulamu, walo wakali mwanaa Hodaviya, mwanaa Hasenuwa. 8Ibuneiya mwanaa Jelohamu, Ela mwana wa Uzi, mwanaa Mikili, a Mesyulamu mwanaa Syefatiya, mwanaa Luweli mwanaa Ibinija. 9Mikwasyi yamusyobo wa Benjamini mumazyalani aabo bakali myaanda iili fuka amakumi osanwe acisambomwe. Boonse aabo mbibakali basololi bamikwasyi yabo.

Bapaizi bakali kukkala mu Jelusalemu

10Mbaaba bapaizi bakali kukkala mu Jelusalemu, Jedaiya, Jehoyiyalibu a Jakini. 11Azaliya mwanaa Hilikiya wakali ngomupati wakuŋanda ya Mwami Leza. Basikale bakwe bakali kubikkilizya aba Mesyulamu, Zadoki, Melaiyoti alimwi a Ahitubi. 12Adaiya mwanaa Jelohamu, basikale bakwe bakali kubikkilizya aba Pasyuu, Malikija, Maasayi mwana wa Adiyeli uuli aabasikale bakali kubikkilizya aba, Jazela, Mesyulamu, Mesyilemiti a Ima. 13Bapaizi bakali basololi bamikwasyi bakali cuulu amyaanda iili ciloba amakumi cisambomwe. Bakali kukonzya kucita kufumbwa mulimo muŋanda ya Mwami Leza.

Balevi bakakkede mu Jelusalemu

14Mbaaba Balevi bakali kukkala mu Jelusalemu, Syimaiya mwanaa Hasyubu, uuli aabasikale kubikkilizya ba Azilikamu a Hasyabiya baciinga ca Melali. 15Bakibaka, Helesyi, Galalu, Mataniya, mwanaa Mika uuli aabasikale bakali kubikkilizya aba Zikili a Asafu. 16Obadiya mwanaa Syimaiya uuli aabasikale kubikkilizya aba Galalu a Jedutuni. Belekiya mwana wa Asa, mwana wa Elikana wakali kukkala mucisi ca Netowa.

Balindizi baŋanda ya Mwami Leza mu Jelusalemu

17Mbaaba balindizi baŋanda ya Mwami Leza bakali kukkala mu Jelusalemu, Shalumu, Akubu, Talumoni, Ahimani. Syalumu ngowakali musololi. 18Kusikila ciindi eeco baziinga zyabo bakabikkidwe kumanjililo akujwe kumulyango wa Mwami. Kaindi bakali kulindila manjililo aakuzivuka zya Balevi.

19Syalumu, mwanaa Kole mwana wa Ebiyasafu antoomwe abaciinga cakwe ca Kola mbabakali kulindila kumanjililo aakutente lya Mwami Leza, mbubakali kucita basikale babo nibakali kulindila zivuka zya Mwami Leza. 20Kumatalikilo Finehasi mwana wa Eliyazaa, nguwakali kulanga balindizi bakumanjililo. Mwami Leza abe aanguwe!

21Zekaliya mwanaa Mesyelemiya wakali mulindizi kumanjililo aatente lyakuswaanganina. 22Lino boonse antoomwe bakasalidwe kuba balindizi kuzyuumino bakali myaanda yobilo akkumi ababili. Bakalilembedwe kweendelana amazyalani kuminzi nkubakali kukkala. Mwami Devedi a Samuyele mulangi mbibakabapa milimo eeyi nkaambo bakali kusyomeka. 23Balo abalunyungu lwabo mbibakali kulindila milyango yaŋanda ya Mwami Leza mbuubakali kucita kutente. 24Balindizi bakali mumabazu one, kujwe, kumbo, kunyika akumusanza. 25Aaba balindizi bakali kubalana anzubo zyakali kukkala muminzi eeyo, lino bakali kutola bulizi bumana mvwiki yomwe. 26Kwakali bapati babalindizi bali bone Balevi, balo bakapedwe mulimo wakulanga maanda aziyobwedo zyamuŋanda ya Leza. 27Bakali kulindila ŋanda ya Leza masiku oonse nkaambo mbibakali kwiilindila alimwi kufumbwa bwaca mbibakali kwiipingulula.

Zya Balevi bamwi

28Lino Balevi mbibakali kulanga zibelesyo zyakali kubelesegwa mukukomba. Bakali kuzibala nizyakali kuletwa akugwisigwa. 29Bamwi bakali kubamba zibelesyo eezyo zisalala abusu bunante, waini, mafuta atununkilizyo. 30Pele bapaizi mbibakali kuvwelenganya tununkilizyo.

31Mulevi umwi uutegwa Matitiya mwana wakusaanguna wa Syalumu Mukola nguwakali kubona bukangwe bwazinkwa zyacituuzyo. 32Bamwi baluzubo lwa Kohati mbibakali kulanga zyazinkwa zipedwe ku Mwami Leza akuzibikka atebule buzuba bwa Sabata a Sabata. 33Balevi bamwi bakali kulanga zyabasikwiimba muŋanda ya Leza. Tiibakapedwe milimo iimbi nkaambo bakalipakesye masiku asikati. 34Boonse aabo mbibakali basololi bamikwasyi ya Balevi. Aaba mbibakali basikale abapati bamikwasyi ya Balevi, bakali mu Jelusalemu.

Basikale abalunyungu lwa mwami Saulu

(8.29-38)

35Jeiyeli nguwakajana munzi wa Gibeyoni akukkala ooko. Mukaintu wakwe wakali Maaka. 36Mwanaakwe mulombe wakusaanguna wakali Abudoni. Bamwi mbaa: Zuu, Kisyi, Baali, Nee, Nadabu, 37Gedoo, Ahiyo, Zekaliya a Mikiloti. 38Mikiloti wisi Syimeyamu. Balunyungu lwabo bakali kukkala mu Jelusalemu, anzubo zyabo. 39Nee nguwakazyala Kisyi, Kisyi nguwakazyala Saulu. Saulu wakazyede bana bone ba: Jonatani, Milikisyuwa, Abinadabu a Esyibaali. 40Jonatani ngowisi wa Melibubaali wakazyala Mika. 41Mika wakazyede bana bone ba: Pitoni, Meleki, Taleya a Ahazi. 42Ahazi wakazyala Jala, walo wakazyede bana botatwe ba: Alemeti, Azimaveti a Zimuli. Zimuli walo wakazyala Moza. 43Moza wakazyala Bineya, Bineya wakazyala Lefaiya, Lefaiya wakazyala Eliyasa. Eliyasa wakazyala Azeli. 44Azeli wakazyede bana bali cisambomwe ba: Azilikamu, Bokelu, Isyimayeli, Syeyaliya, Obadiya a Hanani.

Currently Selected:

1 Makani 9: Tonga96

Highlight

Copy

Compare