1 Makani 11

Devedi mbwaakaba mwami wa Isilayeli a Juda

(2 Samuyele 5.1-10)

1Lino Baisilayeli boonse bakabunganina Devedi ku Hebuloni, akuti kulinguwe, “Swebo tuli bamwi anduwe. 2Ciindi cakamana Saulu naakacili mwami wesu nduwe wakasolweda Baisilayeli munkondo, alimwi Mwami Leza wako wakati kulinduwe, ‘Nduwe ooyooembela bantu bangu Baisilayeli, alimwi nduwe uuyoobalela.’” 3Ciindi basololi boonse bamu Isilayeli nibakasika ku mwami Devedi ku Hebuloni, wakapangana ambabo cizuminano kumbele lya Mwami Leza. Mpawo bakamunanika kuba mwami wa Baisilayeli kweendelana akusyomezya kwa Mwami Leza kwiindila muli Samuyele.

4Lino mwami Devedi a Baisilayeli boonse bakaya kuyoolwana munzi wa Jelusalemu uuli ngo Jebusi. Bajebusi bakali kukkala mulinguwo, 5bakati kuli Devedi, “Tokoonjila muno pe.” Nikuba boobo wakazunda munzi uukwabililidwe wa Ziyoni, uuli ngomunzi wa Devedi. 6Devedi wakati, “Kufumbwa uutisolole kuyoolwana Bajebusi nguutibe silutwe wabasilumamba. Jowabu mwanaa Zeluiya wakasolola. Mpoonya wakaba ngosilutwe. 7Nkaambo kakuti Devedi wakakkala mulukwakwa oolo ncokutegwa ‘Munzi wa Devedi.’” 8Wakayakulula munzi ooyo kutalikila kucikwabilizyo ca Milo kuyoosika kulukwakwa luzingulukide. Jowabu nguwakayakulula cipaanzi camunzi cakasyeede. 9Lino Devedi wakaindilila munguzu, nkaambo kakuti Mwami Leza Singuzuzyoonse wakali aanguwe.

Basilumamba ba Devedi basintanze

(2 Samuyele 23.8-39)

10Mbaaba bapati babasintanze ba Devedi. Aaba antoomwe a Baisilayeli mbibakapa kuti bulelo bwa Devedi bube bwanguzu. Bwakakwakwabuka munyika mbubonya mbuli Mwami Leza mbwaakasyomezya. 11Ngooyu mundandanda wabasintanze aaba, Jasyobeyamu Muhakimo nguwakali mupati wabo. Wakalwana bantu bali myaanda yotatwe mbaakajaya lweendo lomwe. 12Kuzwa kulinguwe kwakali Eliyazaa mwanaa Dodayi Muaholi, wakali ngoumwi wabasintanze botatwe. 13Wakali a Devedi kumwaako wa Damimu, ooko kwakandandeme Bafilisiti kuti babalwane. Ooko kwakali muunda wakalimidwe maila, Baisilayeli bakatalika kutija Bafilisiti. 14Pele bakaakwiima akati kamuunda ooyo. Bakuukwabilila akujaya Bafilisiti. Mwami Leza wakabazundya loko.

15Bumwi buzuba baalumi botatwe babaabo basilutwe bali makumi otatwe bakaza kuli Devedi kumpangala yaku Adulamu. Ciindi eeco impi ya Bafilisiti yakayakide zivuka mukkuti lya Lefaimu. 16Devedi wakali mumpangala, nkamu yabasilumamba ya Bafilisiti yakali mu Betelehemu. 17Lino Devedi naakafwa nyota wakati, “Nikwali muntu uunga wanditekela maanzi aakunya kuzwa kumukalo uuli munsi aamanjililo aa Betelehemu!” 18Mpoonya aabo baalumi botatwe basintanze bakaandulula muzivuka zya Bafilisiti bateka maanzi mumukalo uuli amanjililo aa Betelehemu, baaleta kuli Devedi. Pele taakaanywa pe, wakaatila ansi ku Mwami Leza. 19Wakati, “Peepe O Leza, nsikonzyi kwaanywa maanzi aaya, nkaambo ndaanywa cilabaanga ndinywa bulowa bwabaalumi aaba balisangide.” Akaambo kakuti bakalisanga kuyooteka maanzi, Devedi taakaanywa pe. Eezi nzezintu nzibakacita baalumi aabo botatwe basintanze. 20Jowabu munyina Abisyai nguwakali mupati wabasintanze aaba bali makumi otatwe. Wakalwana baalumi bali myaanda yotatwe aabo mbaakajaya asumo mubuzuba bomwe. Aboobo wakaduma mbubonya mbuli babaya botatwe. 21Nkaako wakaduma kwiinda bamwi aaba. Nikuba kuti taakali mbuli botatwe baya.

22Benaiya mwanaa Jehoiyada uuzwa ku Kabuzeeli wakali silumamba wakacita milimo yabusicamba. Wakajaya basilumamba beni-beni bobilo ba Bamowabu. Bumwi buzuba kakutontola kakuli caanda wakanjila mudindi mwakali syuumbwa wamujaya. 23Wakajaya Muijipiti mwaalumi mupati wakali kulampa tukokola tuli ciloba acisela nikuba kuti walo wakajisi sumo lili mbuli musako wasikuluka. Benaiya wakamulwana ankoli buyo, wamunyanga sumo eelyo akumujazya a ndilyo. 24Eeyi njemilimo yabusicamba njaakacita Benaiya mwanaa Jehoiyada wabamwi bali makumi otatwe. 25Wakalidumide akati kabali makumi otatwe nikuba kuti taakali mbuli botatwe baya. Devedi wakacita kuti abe ngomulangi wabalindizi bakwe. 26Baalumi basintanze bakali ba, Asaheli munyina Jowabu, Elihanani mwanaa Dodo uuzwa ku Betelehemu, 27Syamoti Muhaloli, Helezi Mupeleni, 28Ila mwana wa Ikesyi uuzwa ku Tekowa, Abiyeza uuzwa ku Anatoti, 29Sibekayi mu Husyati, Ilayi Muahohi, 30Mahalayi Munetofa, Heledi mwanaa Baana Munetofa, 31Itayi mwanaa Libayi uuzwa ku Gibeya mucisi ca Benjamini, Benaiya Mupilatoni, 32Hulayi uuzwa kumakkuti aaku Gaasyi, Abiyeli Muaba, 33Azimaveti Mubahuli, Eliyaba Musyaliboni, 34Hasyemu uuzwa ku Gizoni, Jonatani mwanaa Syagee Muhalaa, 35Ahiyamu mwanaa Sakaa Muhalaa, Elifali mwana wa Uli, 36Hefa Mumekelati, Ahija Mupeloni, 37Hezilo Mukaameli, Naalayi mwana wa Ezibayi, 38Joweli munyina Natani, Mibiha mwanaa Hagili, 39Zeleki Muamoni, Nahalayi Mubeeloti wakali kubweza zilwanyo zya Jowabu mwanaa Zeluiya, 40Ila Mujatii, Galebu Mujatii, 41Uliya Muhiti, Zabadi mwana wa Alayi, 42Adina mwanaa Syiza Mulubeni wakali musololi wabasilumamba Balubeni bali makumi otatwe, 43Hanani mwanaa Maaka, Josyafati Mumitini, 44Uziya Muasyitaleti, Syama a Jeiyeli bana ba Hotamu Mualowa, 45Jediyayeli mwanaa Syimuli munyina Joha Mutizi, 46Eliyeli Mumahavi, Jelibayi a Josyaviya bana ba Elinaamu, Itima Mumowabu, 47Eliyeli, Obedi a Jaasiyeli Mumezobayi.

Currently Selected:

1 Makani 11: Tonga96

Highlight

Copy

Compare