Titusa 3
3
Byubilo bya bwina Kilishitu
1Kasa wibavulula kwibanekenena bamfumu ne ba luusa, bekale ba lukookelo, ne kwinengezha kwingila mingilo yonse yawama. 2Kechi bamunene bya mwenga muntu nangwa umotu ne, nangwa kwikala ba lutobo ne, bekale bakooka michima ne kumwesha bukimote ku bantu bonse. 3Mambo ne atweba kala twajinga babula maana, bamilengulwila, bajimbaikwa, kasa twanonkwa buzha ku bya lwiso ne ku bya lusangajiko bya misango ne misango, kasa twaikala mubushikwe ne mu kikonkoma. Betushikilwe kabiji twishikilwe ne atweba bene na bene. 4Pakuba lusa lwa Lesa Mupulushi wetu, ne butemwe bwanji boatemwa bantu byo byamwekele, 5aye witupulwishe. Kechi na mambo a mingilo ya bololoke yotwaubile atweba bene ne, poso monka mwayila lusa lwanji, monka mu kovwa kwa kusemwa jibiji, ne kusangulwa kupya kwa Mupashi Wazhila. 6Ye etwitulwijile wavula mwi Yesu Kilishitu Mupulushi wetu, 7amba byo twabingishiwa mu bupe bwanji, twaluke ke banswanyi monka mwayila luketekelo lwa bumi bwa myaka. 8Kino kyambo kyokya kishinka.
Kabiji na mambo a bino bintu nasaka namba ukoselepotu na kwamba namba, aba bamwitabila Lesa batesheko muchima na kuuba mingilo yawama, bino bintu byawamisha, mambo bantu bamwenamo byawama. 9Bino chiina mepuzho a kukosama, ne bya kulondolola bisemi, ne mapata ne lutobo pa mambo a mizhilo, abya byo byatu bya kubula kumwenamo kintu. 10Muntu uleeta lwabano umvwe wamufunda jimo ne jibiji, umuleke. 11Byo wayuka amba, muntu wa byonkabyo ye waluwankana, kabiji ulenga mambo, bino ne kwizhachisha aye mwine.
Bya kupezhako
12 #
Byu 20:4; Efi 6:21,22; Kolo 4:7,8; 2 Tim 4:12 Byo nkamutuma Aletemasa kwi obewa, nangwa Tikikusa, ukesekeshe na mukoyo kwiya kwi amiwa ku Nikapolisa, mambo konkakwa koko nafuukula kwikala mu ba ng'ondo ba mashika. 13#Byu 18:24; 1 Ko 16:12Ukebemanye bulongo ba Zenasi wa mizhilo, ne Apolosa pa lwendo lwabo, kechi bakakajilwe kintu nangwa kimotu ne. 14Kabiji bantu betu nabo bafunde kwingila mingilo yawama, bamwenemo byawama, kuchiina kwikala ke baatu.
15Bonse bonji naabo bakwimuna obewa Titusa. Wibemune betutemwa mu lwitabilo.
Bupe bwikale ne anweba bonse.
The Kaonde New Testament © The Bible Society of Zambia, 2019.