Titusa 2
2
Lufunjisho lwalumbuluka
1Pakuba obewa, wambenga byonka bintu byafwainwa lufunjisho lwalumbuluka. 2Wibambile banabalume bakulumpe bekale bashing'ama, ba kwikanya, balumbuluka mu lwitabilo, ne mu butemwe, ne mu butekanye. 3Ne banabakazhi bakulumpe nabo pamo, wibambile bekale byafwainwa bazhijikwa, kechi babang'ana ne, nangwa banonkwa buzha ku binyu ne, bekale ba kufunjisha byawama, 4namba be bafunjishe banabakazhi banyike batemwe bamwata wabo, ne kutemwa baana babo. 5Bekale ba kwikanya ne balumbuluka, bengila bulongo ku mazubo abo, ba lusa, kasa be banekenena bamwata wabo abo bene, kuchiina amba, mambo a Lesa akanenwa bibi.
6Bansongwalume nabo pamo, wibafunjishe bekale ba michima yatekanya. 7Mu bintu byonse wimweshe obewa mwine ke wa kumwenako mu mingilo yawama. Wikale wakishinka ne wasumininwa mu lufunjisho lobe. 8Wa byambo bya lumbuluka, bibula kukonsheka kwibizhachisha, amba awa ulengulula amone bumvu pakubula kumona kintu kibi nangwa kimo kya kwitunenenako.
9Wibafunjishe bazha banekenene ba nkambo yabo abo bene, ne kwibatokesha pa muchima mu bintu byonse. Ne kwibalengulula ne, 10nangwa kwiba ne. Bamweshenga butekanye bwalumbuluka mu byonse, namba balengele lufunjisho lwa Lesa, Mupulushi wetu, kumwekana bulongo mu bintu byonse.
11Mambo bupe bwa Lesa bwamweka, bwaleeta lupulukilo ku bantu bonse. 12Bwitufunjisha atweba amba, tukaane bumbulwa kwakamwa Lesa ne bya lwiso lwa pano pantanda, twikale ba kwikanya, baoloka, ne ba kunemeka Lesa pano pantanda. 13Kasa tutengela alwa luketekelo lwa lusekelo, ko kumweka kwa lukumo lwa Lesa mukatampe, ne Mupulushi wetu Yesu Kilishitu. 14#Sala 130:8; Lupu 19:5; Mpitu 4:20; 7:6; 14:2; 1 Pe 2:9Ye wipaine mwine pe atweba mu kwitukuula ku bubi bonse, ne kwitokeshesha aye mwine bantu banji mwine, bamukoyo mu kwingila mingilo yawama.
15Wibifunjishenga bino bintu, kasa wibatundaika ne kwibalengulula na luusa lonse. Kechi uleke nangwa umo akusuule ne.
The Kaonde New Testament © The Bible Society of Zambia, 2019.