Loma 4
4
Abulahama ye wa kumwenako
1Nanchi tusa kwamba ka, namba Abulahama mushakulu wetu, i kika kyo amwenejile mu buntunshi? 2Mambo umvwe Abulahama wabingishiwe ku mingilo, nanchi uji na mwa kwitotela aye mwine, bino kechi ku meso a Lesa ne. 3#Nte 15:6; Nga 3:6Nanchi kinembelo kyaamba amba ka? Amba, “Abulahama waitabijile Lesa, kabiji na mambo a lwitabilo lwanji Lesa wamutelele amba waoloka.” 4Pano kuyewa wingila, mfweto kechi itelwa amba, ya bupetu ne, poso amba ya kwingijila. 5Kabiji kuyewa ubula kwingila bino waitabila mwi aye ubingisha babula kwakamwa Lesa, lwitabilo lwanji lwamutelelwa ke bololoke. 6Monka mwa ambila Davida mambo a kutokwa kwa yewa muntu ye baswa kwi Lesa amba waoloka, kwakubula ne mingilo, amba.
7 #
Sala 32:1,2 “Batokwa aba bobalekela bibi byabo,
ne mambo abo avwetwa!
8Watokwa awa yebakabula kuvulukila mambo anji kwi Nkambo!”
9Nanchi kuno kutokwa ba ambilatu bonka ba mu mukanda nyi, inyi ne babula mukanda pamo? Twa amba namba, “kabiji Lesa wamutelele Abulahama amba waoloka na mambo a lwitabilo lwanji.” 10Nanchi ng'anyi kimye kyo bamutelele Abulahama amba waoloka? Kasa akyangye kutwela mu mukanda nyi? Inyi kasa atwela kala mu mukanda? Kechi kyajinga kasa atwela kala ne, bino kasa akyangye kutwela mu mukanda. 11#Nte 17:10 Aye watambwile mukanda ke kayukilo, nobe kateetesho ka bololoke bwa mu lwitabilo bo ajinga naabo, kasa akyangye kutwela mu mukanda. Amba ekale ke shanja bonse baitabila kwakubula mukanda, amba ebaswe ne abo pamo amba baoloka. 12Kabiji amba ekale shanja ba mu mukanda, kechi abo bajitu mu mukanda ne, kana bonka balondela mungayo ya lwitabilo lwa shetu Abulahama loajinga naalo kasa akyangye kutwela mu mukanda.
Mulaye wa Lesa utambulwa kupichila mu lwitabilo
13 #
Nte 17:4-6; 22:17,18; Nga 3:29 Mambo awa mulaye, ye balayile Abulahama ne ba munkunwa yanji amba ukekala nswanyi wa pano pantanda, kechi walaijilwe mu Mizhilo ne, walaijilwe mu bololoke bwa mu lwitabilo. 14#Nga 3:18Mambo umvwe aba baji mu Mizhilo bo banswanyi, nanchi lwitabilo lwa aluka ke lwatu, ne mulaye naye wa aluka ke watu. 15Mambo Mizhilo yo yileta bukaji bwa Lesa, kabiji pabula Mizhilo kechi paji kuzhilulula Mizhilo ne.
16 #
Nga 3:7
Onka ano mambo oaikela mulaye pa lwitabilo, amba mulaye ekale pa bupe, mulaye akekale pa bonse ba mukisemi, kechi boba bonka bamu Mizhilo ne, nanchi ne kuboba bamulwitabilo lwa Abulahama shetu atweba bonse; 17#Nte 17:5 monka mo kyanembelwa amba, “Nakutongola ke shanja mikoka yavula.” Ku meso a Lesa yeaitabile, upana bumi ku bafu ne kutela bintu byabulwapo amba bikalepo. 18#Nte 15:5Ye waitabijile mu luketekelo mwabujilwe kufwainwa kuketekela, amba ekale ke shanja mikoka yavula, monka mo kyamwambijilwe amba, “Byo ikekala nkunwa yobe.” 19#Nte 17:17 Kabiji aye lwitabilo lwanji kechi lwayilenga na kupwa ne, nangwa mubiji wanji wajinga nobe wafwa kala byo afikizhe myaka makumi jikumi, nangwa Saala naye wajinga ng'umba. 20Byonkabyo kechi wazhinaukile mulaye wa Lesa ne, wakosejile mu lwitabilo, kasa atumbijika Lesa. 21Kabiji wayukisheetu amba Lesa wakonsha kufikizha akya kyo alayile. 22Onkao mambo na mambo a lwitabilo lwanji “watelelwe amba waoloka.” 23Abino byambo bya kuuba amba, “watelelwe amba waoloka” kechi bya munembejilwetu aye bunke ne. 24Bino byanembejilwe ne atweba pamo bakatelwa amba baoloka, atweba baitabila awa wamusangwile Yesu Nkambo yetu mu bafu. 25#Isa 53:4,5 Ye wasolwelwe pa mambo etu, kabiji ne kusangulwa na mambo a kubingishiwa kwetu.
Currently Selected:
Loma 4: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.