Loma 2
2
Bunchiba mambo bwa Lesa
1 #
Mat 7:1; Lu 6:37 Onkao mambo obewa muntu uzhachisha mukwenu, wi wa byepi? Wabula ne mwa kwibingishisha obewa mwine. Pakuba monka mo umuzhachishisha mukwenu, wifwisha nao obewa mwine, mambo ne obewa umuzhachisha, wibyuba abya byonka bimotu. 2Twayuka namba, aye Lesa moachibila mambo a bantu boba bintu bya byonkabye, mo mwaoloka. 3Bino, obewa muntu wibazhachisha boba bibye, ne obewa mwine kasa wibyuba pamo! Walanguluka amba, ukapuluka ku luzhachisho lwa Lesa nyi? 4Inyi wasulatu kuvula kwa lusa lwanji ne kutekanya kwanji ne kukooka muchima kwanji, ne kuyuka amba, lusa lwa Lesa lwayila mukuuba amba, ulapile nyi? 5Nanchi monka mwayila kukosa kobe ne muchima wobe ubula kulapila, ubena kwitujila obewa mwine bukaji bwa mu juba ja bukaji ne ja lumwekesho lwa bunchiba mambo bwaoloka bwa Lesa. 6#Sala 62:12; Maana 24:12Ye ukapana ku muntu yense monka mwayila mingilo yanji. 7Kuboba batekanya na kuuba byawama na kukeba lukumo ne buneme ne bumbulwa kubola, ukebapa bumi bwa myaka. 8Pakuba aba boba mwayila bisaka michima yabo abo bene ne balengulula bya bukine, ne kukookela bya bumbulwa koloka, kukekala bukaji ne lukabisho. 9Kukekala bya malwa, ne bitanta, bikebafikila bantu bonse boba bibi, kutatwila ku Bayudea, bino ne ku Bagiliki pamo. 10Pakuba lukumo, ne buneme, ne mutende bikekala ku bonse boba byawama, kutatwila ku Bayudea, kabiji ne ku Bagiliki pamo. 11#Mpitu 10:17Mambo Lesa kechi utala ku bilungi bya bantu ne. 12Mambo bonse mobavujila balenga mambo kwakubula Mizhilo bakonaika pamo kwakubula Mizhilo, kabiji bonse mobavujila balenga mambo mu Mizhilo bakachibilwa mambo monka mu Mizhilo. 13Mambo aba bomvwatu Mizhilo kechi bobabinga ku meso a Lesa ne, kana aba boba byaamba Mizhilo bo bakabingishiwa. 14Mambo Bangentila babula Mizhilo byo bobatu bene bya mu Mizhilo, abo byo babula Mizhilo, beubila mizhilo abo bene. 15Mambo bamwesha byatongola Mizhilo byo byanembwa mu michima yabo kabiji ne jiwi ja mu michima yabo kasa jitaba, ne milanguluko yabo kasa ibazhachisha nangwa kwibabingisha. 16Mu joja juba aye Lesa joakebachibila bantu byafyamika byabo konka kwi Kilishitu Yesu, monka mwayila Mambo ami Awama.
Bayudea ne mizhilo
17Pakuba umvwe obewa witeela amba, wi Muyudea, ne kuketekela mu Mizhilo, ne kwitotela mwi Lesa; 18ne kuyuka mwayila kyaswa muchima wanji, ne kwibitaba byawamisha, mambo wafunjishiwa mu Mizhilo; 19ne obewa wiitabizha amba, ne ntangi wa bampofu, ne kyeya kya baji mu mfishi, 20ne mufunjishi wa bakosama, ne mufunjishi waba bilubi. Byo waikala na musango wa maana ne wa bukine monka mu Mizhilo. 21Byonkabyo obewa ufunjisha bakwenu, kechi wifunjisha obewa mwine nenyi? Obewa usapwila amba, muntu kechi ebe ne, obewa wiba nyi? 22Obewa wamba amba, “Muntu kuuba bukende ne,” Obewa wibuba nyi? Obewa washikwa bankishi, wiba bya mu mazubo a bankishi nyi? 23Obewa witotela mu Mizhilo, umupelula Lesa pa kuzhilulula Mizhilo nyi? 24#Isa 52:5 Mambo monka mo kyanembelwa amba, “Jizhina ja Lesa janenwa bya mwenga mu Bangentila na mambo a anweba.”
25Mambo kisela kya mukanda kimuwamina inge mwalama Mizhilo; bino umvwe waikala wa kuzhilulula Mizhilo, mukanda wobe wa aluka ke watu. 26Bino umvwe aye wabula mukanda walama byatongola Mizhilo, kubulwa mukanda kwanji kechi kukamutelelwa nobe mukanda nenyi? 27Kabiji abwa bumbulwa mukanda bwa kusemwa naabo umvwe bulama bulongo Mizhilo, kechi bukakuchibila mambo obewa nenyi, obewa uji na buku wa Mizhilo ne kisela kya mukanda, kasa uzhilula Mizhilo? 28Mambo awa waubatu bwina yudea bwa kumubijitu kechi ye mwine mwina yudea ne; byonkabyo ne mukanda wa kumubijitu kechi ye mukanda wa kine ne; 29#Mpitu 30:6pakuba mwine mwina yudea ye yenkawa uji naabo ne mu muchima, ne mukanda wa kine ye wa muchima, wa ku Mupashi, kechi wa mu byambotu ne, ye batota kechi ku bantu ne, kana kwi Lesa.
Currently Selected:
Loma 2: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
