Yoano 19

1Ponkapo Pilato wamutwajile Yesu na kumututaula. 2Kabiji bashilikale nabo balukile munchinya wa miba ne kumuvwika ku mutwe wanji, kabiji bamuvwikile ne kivwalo kichila 3ne kwiya ko aji ne kwamba amba, “Mutende, Mfumu wa Bayudea!” Ne kumupuma mapi.

4Ne Pilato walupukile pangye jibiji, ne kwibambila amba, “Talai mbena kumuleeta kwi anweba, namba muyuke amba, amiwa kechi namonamo mambo mwi aye ne.”

5Ponkapo Yesu walupukile, kasa avwala munchinya wa miba ne kivwalo kichila. Ne Pilato naye wibambijile amba, “Talai! Muntu we!”

6Abo bang'anga bakatampe ne bakalama pa kumumona, babijikile amba, “Mupopai pa musalabu, mupopai pa musalabu!”

Pilato wibambijile amba, “Musendai anweba, mukamupope pa musalabu. Pakuba amiwa kechi namonamo mambo mwi aye ne.”

7Kumvwa Bayudea ba ambile amba, “Atweba tuji na muzhilo, kabiji mwayila muzhilo wetu aye wafwainwa kufwa, mambo aye wipele bu Mwana Lesa.”

8Ponkapo Pilato byo a umvwine byo byo, wa umvwine moyo mukatampe. 9Ne aye watwelele jibiji mu kipango ne kumwipuzha Yesu amba, “Nanchi obewa wafuma pi?”

Pakuba Yesu kechi wamukumbwile ne. 10Kabiji Pilato wamwambijile amba, “Ne kunkumbula amiwa nenyi? Obewa kechi wayuka byo nji na luusa lwa ku kukasulula, nangwa lwa kukupopa pa musalabu nenyi?”

11Kumvwa Yesu wamwambijile amba, “Kechi uji na luusa pe amiwa ne, poso wapewalo kwiulu. Onkao mambo awa wamfikizha kwi anweba ye uji na mambo akila.”

12Pakumvwa kino, Pilato wakebelenga kumukasulula. Pakuba Bayudea babijikile amba, “Inge umukasulule uno, kechi wi mulunda na Kesala ne! Bonse bepa bufumu bo bamusatukila Kesala!”

13Ponkapo Pilato byo a umvwine bino byambo, wamulupwile Yesu pangye, ne kwikala pa kipona kya kije, ponka po batelelenga amba, “Kyalanta,” Mu Kihebelu amba, “Ngabata.” 14Jajinga ke juba ja kunengezhezha jimo bya kijiilo kya Lupitailo, ne juba jaubile jaseela kala. Aye wa ambijile Bayudea amba, “Talai, Mfumu wenu!”

15Ne abo babijikile ne kwamba amba, “Bamutwale! Bamutwale! Kamupopai pa musalabu!”

Kumvwa Pilato amba, “Mfumu wenu namupope pa musalabu nyi?”

Kumvwa bang'anga bakatampe ba ambile amba, “Kechi tuji na mfumu ne, poso yenka Kesala!”

16Ponkapo wibapeleye amba, bakamupope pa musalabu.

Kupopwa kwa Yesu pa musalabu

(Mateo 27:32-56; Mako 15:21-41; Luka 23:26-49)

Kepo bamutwajile Yesu. 17Ne aye walupukile, kasa esendela ne musalabu wanji, kuya ko batela amba, “Kuntu kwa Kiboyongolo,” Mu Kihebelu batongolako amba, “Ngolongota.” 18Ko bamupopele pa musalabu, ne bakwabo babiji pamo ne aye, umo ku lubaji lumo, mukwabo naye ku lubaji lukwabo, ne aye Yesu pakachi. 19Pilato wanembele kiyukilo ne kwikibika pa musalabu. Kyanembelwe amba, “YESU MWINA NAZALA, MFUMU WA BAYUDEA.” 20Byonkabyo kino kiyukilo Bayudea bavula bekitangile, mambo ko bapopele Yesu pa musalabu kwajinga ku bwipi na muzhi. Kabiji kyanembelwe mu Kihebelu, ne mu ki Latini, ne mu kigiliki. 21Ponkapo bang'anga bakatampe ba Bayudea ba ambijile Pilato amba, “Kechi munembe amba, ‘Mfumu wa Bayudea’ ne, poso amba, aye mwine wa amba amba, amiwa ne Mfumu wa Bayudea.”

22Kumvwa Pilato wa ambile amba, “Akya kyo nanemba kyo kyonka.”

23Ne bashilikale, byo bamupopele Yesu pa musalabu, bashikwile bivwalo byanji, ne kwibyabanya pana, mushilikale kyanji, mushilikale kyanji. Ne mukangyo naye, bino mukangyo kechi wajinga na mifumo ne, bamulukiletu kufuma kwiulu ne kufika kunshi. 24#Sala 22:18Ponkapo abo ba ambang'ene bene na bene amba, “Kumutabula ne, kilekai, tutaye bubale, kana usakwikala wa kwa ng'anyi.” Amba, kinembelo kifike kyaamba amba,

“Be abenya bene na bene bivwalo byami,

kabiji batayile bubale pa mukangyo wami.”

Bino bintu byo byo baubile bashilikale.

25Kabiji ku musalabu wa Yesu kwaimene inanji, ne mulongo wa inanji, ne Maliya muka Kileopasa, ne Maliya wa ku Magadala. 26Yesu pa kumona inanji, ne yewa mwana wabwanga ye atemenwe, kasa baimana konka, wa ambijile inanji amba, “Mama, talai mwanenu!”

27Kabiji wa ambijile yewa mwana wabwanga, amba, “Talai inenu!”

Kufuma ku joja juba awa mwana wabwanga wamutwajile kwanji.

Lufu lwa Yesu

(Mateo 27:45-56; Mako 15:33-41; Luka 23:44-49)

28 # Sala 69:21; 22:15 Bino byo byapwile, Yesu wayukile amba, pano byonse byapwa, wa ambile amba, “Nafwa kilaka,” mambo a kuuba amba kinembelo kifike.

29Kabiji kwajinga ne nsanyi yo batujile konka yayula binyu byasasa, kepo basomekele shipanja wayula binyu byasasa ku kakichi ka isopi, ne kumubika ku kanwa kanji. 30Ponkapo Yesu, byo atambwile binyu byasasa, wa ambile amba, “Kyapwa!”

Wanyengekele mutwe wanji ne kuleka ku mweo.

Yesu byo bamwashile mu mbavu

(Mateo 27:57-61; Mako 15:42-47; Luka 23:50-56)

31Aja juba byo jajinga ja kunengezhezha jimo bya kijiilo ponkapo Bayudea balombele Pilato amba, bebachimaune maulu, bebafumyepo, mibiji yabo kechi ikale pa musalabu mu juba ja Sabado ne (mambo aja juba ja Sabado jajinga janeema). 32Ponkapo bashilikale baishile, bachimwine maulu a mutanshi, ne a mukwabo wapopelwe nanji pa misalabu. 33Pakuba byo bafikile pe Yesu, pa kumona amba, wafwa kala, kechi bamuchimwine maulu anji ne. 34Bino mushilikale umo wamwashile jifumo mu mbavu, ponkapotu mwafumine mashi ne mema. 35(Kino wikishimuna aye wikimwene, ne kushimuna kwanji ko kwa kine. Kabiji ne aye wayuka amba, abya byo mbena kwamba byo bya kine, amba ne anweba mwitabile.) 36#Lupu 12:46; Bala 9:12; Sala 34:20Mambo bino bintu byaubilwe amba, kinembelo kifike, amba, “Bikupa byanji kechi pakachimunwa nangwa kimo ne.” 37#Zeka 12:10; Lum 1:7Kabiji ne kinembelo kikwabo amba, “Bakamumona awa ye baashile.”

Kubiikwa kwa Yesu mu kilende

(Mateo 27:57-61; Mako 15:42-47; Luka 23:50-56)

38Pa kupwisha bino, Yosefwa mwina Alimatea, mwana wabwanga wa Yesu, bino wifiile mambo a kuchiina Bayudea, walombele Pilato amba, asende mubiji wa Yesu, ne aye Pilato waswile. Ponkapo waishile kusenda mubiji wanji. 39#Yoa 3:1,2Nikodema naye waishile, yenkawa waishile patanshi kwi Yesu bufuku, waletele ne byo bavwangakanya na mola ne maalo, byafikile mapaunji kampe kitota kimo. 40Kepo bashikwile mubiji wa Yesu, ne kumuvungila mu kisapi kya linenyi ne binunka bulongo, mwayila bisela bya kuzhiika kwa Bayudea. 41Byonkabyo ko bamupopele ku musalabu kwajinga ne bujimi, kabiji mu bobwa bujimi mwajinga ne kilende kya katataka, mo babujile kuzhika muntu nangwa umo ne. 42Mo mo bamubikile Yesu, mambo kilende kyajinga pepi ne aja juba jajinga ja kunengezhezha jimo bya kijiilo kya Bayudea.

Currently Selected:

Yoano 19: KNTP

Highlight

Copy

Compare