Yoano 18
18
Kukwatwa kwa Yesu
(Mateo 26:47-56; Mako 14:43-50; Luka 22:47-53)
1Yesu byo apwishishe kwamba bino, waabukile kakola ka Kedolona ne baana banji babwanga, ko kwajinga bujimi mo atwelele, aye mwine ne baana banji babwanga. 2Ne Yudasa, yenka wamusolwele, naye wayukileko mambo bimye byavula Yesu ko koayanga na baana banji babwanga. 3Ponkapo Yudasa, byo atambwile kiombe kya bashilikale, ne bakalama ku bang'anga bakatampe ne Bafaliseo, ke beye konka na malampi ne masoko a mujilo ne bilwilo. 4Yesu byo ayukile byonse bisa kumumwekela, walupukile ne kwibambila amba, “Ing'anyi ye mukeba?”
5Kumvwa abo amba, “Yesu mwina Nazala.”
Kepo Yesu ebambijile amba, “Amiwa bano.”
Ne Yudasa naye yenka wamusolwele, waimene naabo. 6Kabiji Yesu byo ebambijile amba, “Amiwa bano,” babwelele lumfutwanyuma, ne kupona panshi. 7Kabiji aye wibepwizhe jibiji amba, “Ng'anyi ye mukeba?”
Kumvwa abo bamukumbwile amba, “Yesu mwina Nazala.”
8Kumvwa Yesu amba, “Naji kwimubula namba amiwa bano, byonkabyo inge mubena kunkeba amiwa, muleke bano bayenga.” 9(Amba byambo bifike byo a ambile amba, “Aba bomwampele kechi naelelepo nangwa umo ne.”)
10Ponkapo Shimona Petelo byo ajinga na mpoko, wiisomwene ne kumukampa kalume wa ng'anga mukatampe, ne kumukopola kutwi kwa kilujo, jizhina janji Malikusa. 11#Mat 26:39; Mako 14:36; Lu 22:42Ponkapo Yesu wamwambijile Petelo amba, “Somekai mpoko mu kikwa! Katomeno ko bampele bataata kechi nekatome nenyi?”
Yesu kumeso akwa Anasa
12Ponkapo kiombe kya bashilikale ne mukulumpe wabo, ne bakalama ba Bayudea, bamukwachile Yesu ne kumukasa, 13ke bamutwale patanshi kwi Anasa, mambo ye wajinga shanjivyala Kaifasa, ng'anga mukatampe mu yewa mwaka. 14#Yoa 11:49,50Kaifasa wajinga yewa wibambijile Bayudea, amba kyafwainwa umo afwile bantu.
Petelo byo amukaine Yesu
(Mateo 26:59-75; Mako 14:55-72; Luka 22:55-71)
15Ne aye Shimona Petelo walondejilenga Yesu, ne mukwabo mwana wabwanga. Ne awa mwana wabwanga bamuyukile kwi ng'anga mukatampe, kepo atwelele ne Yesu mu kipango kya ng'anga mukatampe, 16pakuba Petelo waimene ku kibelo pangye. Kepo alupukile awa mwana wabwanga mukwabo, ye bayukile kwi ng'anga mukatampe ne kwamba na mwanamukazhi walaminenga kibelo, ne kumutwezha wamutwezhezhe Petelo. 17Ponkapo awa kamwale walaminenga kibelo wa ambijile Petelo amba, “Ne anweba mwi mwananji wabwanga uno muntu nyi?”
Kumvwa aye amba, “Amiwa ne.”
18Kabiji bakalume ne bakalama ba banzhile mujilo wa mashanga na mambo a mashika, ne kwimana baimene konka kasa bota mujilo, ne Petelo naye waimene naabo, kasa ota mujilo.
19Ponkapo ng'anga mukatampe waipwizhe Yesu mambo a baana banji babwanga ne a kufunjisha kwanji. 20Kumvwa Yesu wamwambijile amba, “Amiwa na ambile patoka ku ba pano pantanda, moba onse nafunjishenga mu mashinagoga, ne mu nzubo ya Lesa, mo bapwila Bayudea bonse! Kafwako kyo na ambile kumbaji amiwa ne. 21Mungipwizha ka amiwa? Ipuzhai bang'umvwine byo nebambijilenga. Bo bayuka byo na ambile amiwa.”
22Ponkapo byo a ambile bino, umo kalama waimene kwipi wapumine Yesu lupi, ne kwamba amba, “Umukumbwila ka byo byo ng'anga mukatampe?”
23Yesu wamukumbwile amba, “Inge naamba byatama, bishimunai, pakuba inge byawama, nanchi mwampumina ka?”
24Ponkapo Anasa wamutumine kwi Kaifasa, ng'anga mukatampe, kasa akaswa.
Petelo byo amukaine Yesu ja bubiji
25Ne Shimona Petelo waimene kasa ota mujilo. Ponkapo abo ba mwambijile amba, “Anweba kechi mwi mwananji wabwanga nenyi?”
Ne aye wakaine amba, “Amiwa ne.”
26Umo kalume wa ng'anga mukatampe, mulongo wa yewa ye akopwele kutwi kwanji Petelo, wamwambijile amba, “Kechi naji kwimumona nanji mu bujimi nenyi?”
27Ne Petelo wakaine jikwabo. Ponkapotu ne shikombwe wakokweele.
Yesu ku meso a Pilato
(Mateo 27:1-2,11-14; Mako 15:1-5; Luka 23:1-5)
28Kabiji Yesu bamufumishe kwi Kaifasa, ne kumutwala mu kipango kya ndamakyalo. Pano kwaji ke kumakya, pakuba abo bene kechi batwelele mu kipango kya ndamakyalo ne, bachiine kwizhilulula, kabiji amba, bakaje kijiilo kya Lupitailo. 29Ponkapo Pilato walupukile kwi abo ne kwibambila amba, “Ng'anyi mambo o mwamulobela uno muntu?”
30Kumvwa abo ba mwambijile amba, “Inge kechi wauba byatama ne, inge kechi twamuleeta kwi anweba ne.”
31Kumvwa Pilato wibambijile amba, “Musendai anweba bene, mukamuchibile mambo mwayila mizhilo yenu.”
Kumvwa Bayudea amba, “Kechi tuji na luusa lwa kwipaya muntu ne.” 32#Yoa 3:14; 12:32(Amba abya byambo bya Yesu, byo a ambile byo atongwele musango wa lufu lo akafwa bifike.)
33Ponkapo Pilato watwelele jibiji mu kipango, ne kumwita wamwichile Yesu, ne kumwambila amba, “Obewa yobe Mfumu wa Bayudea nyi?”
34Kumvwa Yesu amba, “Anweba bene mwiambila kino kintu nyi, inyi bakwabo bemubulakyo?”
35Kumvwa Pilato amba “Nanchi amiwa ne mwina yudea nyi? Mukoka wobe obewa mwine, ne bang'anga bakatampe bo bakufikizha kwi amiwa. Nanchi kyo wauba ki ka?”
36Kumvwa Yesu amba, “Bufumu bwami kechi bwa pano pantanda ne, inge bufumu bwami bwajinga bwa pano pantanda, inge bakalume bami baji kundwilanga amba, kechi bamusolole ku Bayudea ne. Pakuba pano bufumu bwami kechi bwa pano ne.”
37Kumvwa Pilato wamwambijile amba, “Nanchi obewa wi mfumu nyi?”
Kumvwa Yesu amba, “Anweba mwafikilapotu amba, ‘Wi mfumu.’ O mambo o nasemenwe, ne o naishijile pano pantanda, namba nshimune bya bukine. Ne bonse ba bukine bomvwa jiwi jami.”
38Kumvwa Pilato wamwambijile amba, “Nanchi bukine bo buka?”
Yesu byo bamuzhachishishe amba afwe
Byo a ambile byo bino, Pilato walupukile jibiji kwiya ku Bayudea, ne kwibambila amba, “Amiwa kechi namona mambo mwi aye ne. 39Pakuba anweba muji na kisela, kyo nemukasulwila umo pa kijiilo kya Lupitailo. Mwasaka nemukasulwile Mfumu wa Bayudea nyi?”
40Kumvwa bonse babijikile jibiji amba, “Kechi uno ne! Twasaka Balabasa!” Bino Balabasa wajinga kapondo.
Currently Selected:
Yoano 18: KNTP
Highlight
Copy
Compare
Share
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
