2 Tesalonika 3
3
Tulombeshaipo
1Kyapelaako, anweba bakwetu, kasa mwitulombelela atweba, mambo a Nkambo ayenga kulutwe kwakubula kya kwiakanya ne, atumbijikwe monka mo obila ne mwi anweba. 2Kabiji namba tupokololwe ku bantu babi bakatazha. Mambo bonse kechi baji na lwitabilo ne.
3Bino Nkambo ye wakishinka, kabiji ukemukosesha bulongo ne kwimulamwina kwi aye mubi. 4Kabiji tuji na luketekelo mwi Nkambo na mambo a anweba namba, mu bena kwibyuba kabiji mukebyubanga abya bintu byo twimukambizha.
5Pano aye Nkambo atangijile michima yenu mwayila butemwe bwa Lesa ne butekanye bufuma kwi Kilishitu.
Lujimuno na mambo a bukope
6Anweba bakwetu, twimukambizha mu jizhina ja Nkambo yetu Yesu Kilishitu namba, mwabane naabo bonse balongo betu mwi Nkambo abo baikala na bukope bwa kwingila, ne kulondela mafunjisho o twimufunjishe atweba ne. 7Mambo anweba bene mwayuka byo kimufwainwa kuuba abya byo mwamwene mwi atweba. Mambo kechi twajinga bankope byotwaikajilenga nenu ne. 8Kabiji kechi twajiile kajo katuutu ka muntu nangwa umo ne. Pakuba twaingijilenga mwingilo wakosa ne wa malwa. Twaingijilenga bufuku ne mute kuchiina amba twakemukatazha. 9Mambo kechi twabujile luusa lwakuuba amba anweba mwafwainwa kwitumwena bintu ne, bino twasakile kwikala ba kumwenako anweba amba mulondelenga mwi atweba. 10Mambo ne byotwajinga nenu twimukambizhizhe kino namba, “umvwe muntu wakana kwingila kechi mu muleke aje ne.”
11Mambo twibomvwa bamo ba mwi anweba bankope, babula kusaka kwingila nangwa pachechetu ne, bino basakatu kwibiika mu mingilo#3:11 Kwibiika mu mingilo: nangwa amba, kulubankanya mingilo ya bakwabo. 12Ba byonkabyo twibakambizha ne kwibajimuna mwi Nkambo Yesu Kilishitu namba, bekale ba kwingila mingilo mu kwimwena abo bene ne kajo ka kuja.
13Pakuba anweba bakwetu, kechi mukooke mukuuba byawama ne. 14Kabiji umvwe muntu wakana kukookela byotwanemba mu yo ino nkalata, ao muntu mu mukenkente bulongo, kechi mwikale mu lumvwang'ano ne aye ne, amone bumvu. 15Bino kechi mu mumone nobe mulwanyi ne, poso kumufunda byafwainwa mulongo wetu.
Byambo bya kupezhako
16Pano aye mwine Nkambo wa mutende, emupe mutende moba onse mu bintu byonse. Nkambo ekale ne anweba bonse.
17Lwimu lwami amiwa Paulo. Na kuboko kwami amiwa mwine. Ko kayukilo mu makalata ami onse, byo byo nnemba.
18Bupe bwa Nkambo yetu Yesu Kilishitu bwikale ne anweba bonse.
The Kaonde New Testament © The Bible Society of Zambia, 2019.