2 Tesalonika 2
2
Muntu wa bumpupabizhila
1 #
1 Tesa 4:15-17
Twimusashijila anweba bakwetu, na mambo a kwiya kwa Nkambo yetu Yesu Kilishitu ne byo tukapwila atweba konka kwi aye, 2namba kechi bakemulengele kuzhinauka bukiji mu michima yenu ne kwimuubisha kijikila nangwa ku mupashi, nangwa ku byambo, nangwa ku nkalata yauba nobe yafuma kwi atweba amba, juba ja Nkambo pano jafika ne. 3Kechi muleke nangwa umo emujimbaike nangwa pachechetu ne. Mambo aja juba kechi jikafike ne, poso patanshi akwa kupondoka ku lwitabilo kukafike, ne muntu wa bumpupabizhila akamweke, yenkaye mwana wa lonaiko. 4#Dan 11:36; Ezi 28:2Ye wimeena byonse ne kwitumbijika mwine kukila byonse bitelwa bu lesa nangwa bipopwelwa. Kabiji ukekala mu nzubo ya Lesa kasa emweesha amba, yami lesa.
5Kechi mwavuluka nenyi? Byonajinga neenu nemubujile bino bintu. 6Kabiji anweba mwayuka, akya kibena kumukanya. Amba akamweke mu kimye kyanji. 7Mambo akya kyafyamika kya bumpupabizhila kibena kwingila ne pa kino kimye, bino ko aji umo ubena kwikikanya mu kino kimye poso byo bakamufumyapo. 8#Isa 11:4Kabiji pa kyokya kimye awa mpupabizhila ukamweka, yenkawa yeakepaya Nkambo Yesu na muuya wa mu kanwa kanji, ne kumuvulang'anya ke waatu na kumweka kwa kwiya kwanji. 9#Mat 24:24Kabiji kwiya kwanji awa mpupabizhila kukayila monka mu kwingila kwa Satana na bulume bonse, ne na biyukilo ne bya kukumya bya bubela, 10kabiji ne na bujimbijimbi bwa misango yonse yabipa bwa kujimbaika aba babena konaika, mambo bakaine kutemwa bukine amba bapuluke. 11Kabiji na onkao mambo Lesa ukebatumina kya kwibalubankanya amba betabile bya bubela. 12Amba bakazhatwe bonse babujile kwitabila bya bukine, pakuba bamwenejile lusekelo mu bya bumbulwa koloka.
Bemusalulwijile lupulukilo
13Kabiji pano kitufwainwa kusanta kwi Lesa moba onse na mambo a anweba, batemwe ba Lesa. Mambo Lesa wimusalulwile anweba patanshi kwimupulusha, ne kwimuzhijika na Mupashi ne mu kwitabila bukine. 14Mwaichilwe ku lupulukilo byo twimusapwijile Mambo Awama, amba mwikale na lukumo lwa Nkambo yetu Yesu Kilishitu. 15Onkao mambo, anweba bakwetu, imanai kasa mwakosa mukwachishe ku mafunjisho o mwafunjishiwe, mu byambo nangwa mu nkalata yetu.
16Pano aye mwine Nkambo yetu Yesu Kilishitu ne Lesa Taata wetu, aye witutemenwe ne kwitupa kya kwitukosesha kya myaka ne luketekelo lwawama monka mu bupe bwanji, 17akoseshe michima yenu ne kwiikajika mu mingilo yonse yawama ne mu byambo byonse byawama.
The Kaonde New Testament © The Bible Society of Zambia, 2019.