MBEN ISRAEL IMBUT-MBUT NYEN 13
13
Ibou simnaibrimigcan di igyok itta kep minu Kanaan
(Ul. 1:19-33)
1Lene tuhan pai bak Musa, 2“Suar adimig nibou di igya kui nani gom-gom leu mben Israel ide keret simnaibrimigcan ikieti leu api acuk yok leu binhyepo imbris nyahan bigyok itta kep minu Kanaan di midiyai bak mben Israel nok ide minu nijep bu.” 3Lene Musa cuk nibou di igya kui noni dini yok bit leu nok Allah nicuk noti mpe di mben Israel ibong ei iggum ndigsi Paran.
4Nibou dima yok inyeng rino, Syamua di Zakur nipmot di ntun keret Ruben him,
5kin Safat di Hori nipmot di ntun keret Simeon him,
6kin Kaleb di Yefune nipmot di ntun keret Yehuda him,
7kin Yigal di Yusuf nipmot di ntun keret Isakhar him,
8kin Hosea di Nun nipmot di ntun keret Efraim him,
9kin Palti di Rafu nipmot di ntun keret Benyamin him,
10kin Gadiel di Sodi nipmot di ntun keret Zebulon him,
11kin Gadi di Susi nipmot di ntun keret Manasye him,
12kin Amiel di Gemali nipmot di ntun keret Dan him,
13kin Setur di Mikhael nipmot di ntun keret Asyer him,
14kin Nahbi di Wofsi nipmot di ntun keret Naftali him,
15kin Guel di Makhi nipmot di ntun keret Gad him.
16Musa cuk yo dini mem gima yuug yok itta kep minu dima. Mpe dima ne Musa luei Hosea di Nun nipmot ninyeng ba, jem ninyeng Yosua.
17Tirigi Musa cuk yok bimbut lene sok kep yok “Ma jimbut ug ei nite bei mpia nijjai ba, juug krau minu Kanaan nibiho. Leu api ma jikui kikau ug ei nungug him ei minu dima. 18Ma jiyok jitta kep minu dima leu binhyepo jinggok tut timiei nya. Yoni imang bibor e, he imang bi e, he isindem bibor e, he isindem bi e, lene nok. 19Jiyok jitta kep minu dima leu binhyepo jinggok tut gino minu dima kei bibor e, he bi e? Timiei minu dima ibong ei minu mien di jo bas nya e, he ibong ei minu ndig di bon ngug tig di bikrop ttai nya e? 20Ma jingon nddong ba, jita jibou eisi. Ma jinggok tut gino minu dima bon ninnumti kin baham nitindurti nindig bibor e? Ma jiyok ngon kep bipia nogindia son dideu nijam ba anggur ngat nimbie him ri. Gima rino ma jipuk biei ngat poi mien ba, jikwei sut.”
21Leu api nibou dima yok ikiju bimbut ndam nite bei mpia nijjai lene igyok itta kep minu dima leu iggum ndigsi Zin di jo nite bei mpia nibiho kikau ug ei minu ndig Rehob di jo nite bei mpia nijjai dideu puig di bie ug ei Hamat. 22Nimbie him lene yuug ei minu dima nibiho ba, yuug krau minu ndig Hebron. Hebron ne keret Ahiman Sesai Talmai di intun Enak him itimieisi ri. Yo dima iwin Hebron ei ari bingwam muhwindacan nipou tirigi mben Mesir iwin minu ndig Zoan bigyo. 23Leu api yuug krau Mbang Briep Eskol ba, ikos ba anggur ngat nimbeu ndig di buhun bibor gom ei sirima. Apino suar ibou can isu biei eisi bittei. Yoni ipuk biei delima ningat poi kin biei ara ningat poi cem. 24Tungwatu ijem mpia dima ninyeng Mbang Briep Eskol lewo nibou mben Israel pima yok irop ba anggur ngat nimbeu ndig gom ei sirima.
25Niabiati yo dima imbris nyahan bigyok itta kep minu Kanaan mem mmun-njap ningot bitai bingwig lene ingkwei hanyen ba, 26ingat Musa kin Harun kin mben Israel yahagom tirigi ibong ei Kades di jo ei iggum ndigsi Paran pima. Lene yoni itri tut mun di ingat bou igyai him hagom leu api indo biei ngat di ibiang kwei nya biyok. 27Ipai bak Musa “Ningig niyai kep minu dima lene jo nibreisi bipia dihyei dima bon ninnumti nindig bibor ba, biei nya hagom nimeng nggrou. Angat biei ngat gom-gom di nibiang kwei rini. 28Noro timiei minu dima isindem bibor lene ide minu nya nindig ba, sindem bibor cem ngug tig nindig krop bikrop ttai hagom. Gima he bi lewo ningat yo di intun yo di intig bou anjan nya him cem ei sirima. 29Mben Amalek ibong ser hanjop nsi gi bei mpia nibiho. Mben Het kin mben Yebus kin mben Amori yahagom idis yam bibong ser nungug him. Lene mben Kanaan ibong ser hanjop mukti kin Minyei Yordan nyai cem.”
30Noro Kaleb kimut ninda kep yo di sindi inso-nso nyen bak Musa bipai biyok “Suar nyeni icoi minu dima bihwen yok bipos minu dima hagom leu yok nogindini hak ug lewo nyeni isindem bibor mem gima icoi bihwen yok bicut binye.”
31Noro nibou nindigsi di ibit Kaleb pima isrep bipai “Dem tut bi! Nyeni isindem mem gima ihwen yok bi. Lewo timiei minu dima isindem bibor dor njiriek nye.” 32Lene nibou dini yok itri ighyet nitrowai tut minu po yuug yok itta kep pima bipai “Minu dima ne nikinei-kinausi ba, nggruk bibor mem timiei nya cem. Bikwop timiei nya di niyok nitta kep nya yahagom intig bou jei bibor. 33#Kej. 6:4 Ba, ningat yo di anjan nya di intun Enak him ei sirima. Gino nibinai nyenti kin yoni lene nikan bipia nyeni nimien nok hai nya he. Lene yoni ikan bipia nyeni cem ninok hai nya ri.”
Currently Selected:
MBEN ISRAEL IMBUT-MBUT NYEN 13: HAD
Highlight
Copy
Compare
Share
Want to have your highlights saved across all your devices? Sign up or sign in
