MBEN ISRAEL IMBUT-MBUT NYEN 12
12
Miryam tug ndei hukum
1Mpe dima ne Musa wak sop mben Kus gom nok nitnem noro Miryam kin Harun iba ighyet biyai noni drek dip. 2Lewo yahacem inso-nso nyen bipai “tuhan sok nihyet ei Musa nongkom dip bak mben Israel e? Noni sok nihyet ei nyeni dip cem mem yok bi e?” Lene mun di ipai dima tibim ug ei tuhan nitingou nsi. 3Tut Musa ne noni ba nibou coi mem tungwatu nya nindig bibor dor njiriek tungwatu dihyeisi dini hagom.
4Lene tuhan hig Musa Harun Miryam yoni kros bipai “Ma jibou ningai jikwei ngat Da ei Ditde Prak Meng.” Gima rino yoni yuug ei sirima. 5Leu api tuhan ba bumbuhui ttou binggai kep Nonti lene juk kwei biya kui dimbou hui ei Prak Meng bihig yok “Harun kin Miryam e!” Leu api yahacem ison kwei bigya ei tuhan Noho bei. 6Lene tuhan pai biyok “Suar jingig jitingou mem dihyet! Tirigi jide nabi nya ikiju bitri tut dihyet bije lene dindo dingon kanti biyok tug hon ningat-hi-ngat nya ba, dimbrap bit yok tug hon ide mun di imumpriem nya cem. 7#Ibr. 3:2 Noro tirigi dimbrap bit Ditde awak di Musa lene nok gima bi. Dita noni nok nibou di ninyeng tak kep Ditde limwa di mben Israel. 8Gima rino dimbrap ei noho bei bidindo dingon kanti brei binoni lene tug hon nihyet nibiti ninda bi. Noni ngat dingat bou niyai him tu. Nggon rino jingon sir bijisrep tut Ditde awak di Musa i?”
9 tuhan gga yo cin dima bibor ba, ug hak leu yok, 10leu api bumbuhui dima pror leu tuhan De Prak Meng lene bras mbrei sindi kieng kep Miryam ningkek dip apino ningkek dip tiei-tiau noyam kin bunggum a. Tirigi Harun kiek no bingat Miryam lo, bras mbrei dima yem noni, 11lene hara bak Musa “Andigpoi e, ampu nye! Asindui sut nye ba, nitug ndei hukum drek dip sisar di niba ningon di mbum bibon dini au. 12Ma asindui sut ba, Miryam ningkek dip mpiei noyam kin ningwoi-ngwoi di nipmem gwam tut kinei au.”
13Gima rino Musa hara bak tuhan “Allah e, dahara bipia ma ayai ningkek ngun eisi hanyen binoni!”
14 #
Bil. 5:2-3
Noro tuhan buhup “Gino nicig trai Miryam niimaisi lene gima mibindei ba, noni gwam nimmaiti mem njap muhwindacan bi e? Ma jibindei hei noni ug ei prak meng yati nisai ma kwei mem njap muhwindacan. Mpe di nijam dima ngwig leu api ma jisindui sut noni ba, coi hanyen kwei.” 15Leu api ibindei hei Miryam leu prak meng yati kikau ei njap muhwindacan. Lene mben Israel ipri leu mpia dima bi bibou isindui sut ba, Miryam ngkwei hanyen kwei ei prak meng yati ug e. 16Gima ngwig leu api ijo leu Hazerot ba, yohok ide prak meng nya hanyen ei iggum ndigsi Paran.
Currently Selected:
MBEN ISRAEL IMBUT-MBUT NYEN 12: HAD
Highlight
Copy
Compare
Share
Want to have your highlights saved across all your devices? Sign up or sign in
