MATIUS 9
9
Yesus bindei ba, no di las hwen kei hanyen
(Mrk. 2:1-12; Luk. 5:17-26)
1Yesus bri ut bingkwei hanyen buug dihip ei minyei nite hi hanyen ba, ug ei Nide ig.#9:1: Nipas kep Nide ig cem kei lene nipas kep Kapernaum (angig ayai kep Mat. 4:13) cem kei. 2Tungwatu nya ibou poi di ittei lat tut no di las hwen gom ikwei ndam Yesus ei mpia dima. Tirigi Yesus ngat lo, iba ingon com Noni bibor lene pai bak no di las hwen “He mot de ug o, dwai! Dikos ser ade sisar.”
3Guru Puig Yahudi nicukti nya ibou poi di ingat rin ei ig bei dima ikan ei ingonti “No dini nihyet wer mpiahi tut Allah.”
4Noro Yesus kan tut ingon kanti leu api hig singgre yok “Jikan-kan nyen mun di mbuk ei jingonti leu binggon i? 5Lewo gi tou rikrop i? Dipai ‘Dikos ser ade sisar’ e, he dipai ‘Akiju ba, ambut hak ug’ e? 6Noro nogindini midindo bindo brei bije leu binhyepo jikan tut bipia Munggwom Tungwatu Nipmot yai nisindemti mem gima kos ser sisar ei dihyeisi dini.” Leu api Noni cuk no di las hwen “Akiju ba, aya pijum lene ma akon ade lat ba, aug sut ug ei ade ig hak ug!”
7No di las hwen kiju biya leu api ngkwei hanyen ug ei nide ig. 8Tirigi tungwatu ingat mindur di Yesus bibon dima lene idigit tut ba, inggei sut Allah di yai nisindemti dima bak tungwatu nya.
Yesus hig Matius bidimig noni
(Mrk. 2:13-17; Luk. 5:27-32)
9Lene Yesus jo leu mpia dima bimbut-mbut nyen. Noni tau kep Matius tirigi noni gwam ei nide kintrorti ba, ya tindei belasten biyem tungwatu nya imuhub. Yesus hig noni “Akwei bit Da.”
Lene Matius kiju bibit Noni bihigom.
10 #
Luk. 15:1-2
Tirigi Yesus yem njita bit Matius ei nide ig#9:10: Nipas kep bit Matius ei nide ig cem kei lene nipas kep bit Matius ei Nide (Yesus) ig bei cem kei. lene yo di igya tindei belasten di igyem tungwatu nya imuhup kin nikinei-kinau nindigsi nya imang bibor induk yam kwei ba, igwam bit Yesus kin yo di igya kui Noni. 11Farisi nya ingat yo dima leu api ihig ser yo di igya kui Yesus “Nggon rino jide guru yem njita bit yo di igya tindei belasten di igyem tungwatu nya imuhup kin yo di ibon sisar nindigsi nya i?”
12Yesus miap ighyet leu api buhup “Yo di ikei yuug ngat no di ninda kan bi noro yo di inggwen rino yuug ngat noni a. 13#Hos. 6:6; Mat. 12:7 Je juug ba, jihig yam ser ningginausi tut Allah nihyet di pai binye ‘Dijoi sut ningondut yamti nindig bibor dor njiriek nikos mindhe tut ninggromti’. Lewo dikwei mem gima dinduk yo di ikan bipia ikei-kau nya bi noro mem gima dinduk yo dino hiter irok yok ei itta.”
Ningginausi tut niyem njita bi mem nituti poi
(Mrk. 2:18-22; Luk. 5:33-39)
14Mpe di gom bu ne yo di igya kui Yohanes di tur tungwatu nya ei minyeiti ikwei hig simber Yesus “Nggon rino nyeni kin Farisi nya niyem njita bi mem nituti poi noro yo di igya kui Nani igyem njita bi mem nituti poi bi i?”
15Yesus buhup “Jikan bipia yo di induk yam kwei mem pesta niwak yamti ingon buhun tirigi pinai di wak nitnem ningat rin bit yok e? Nok bi! Noro ei nidipti bu tirigi pinai dima ningat rin bit yok bi lene yoni migyem njita bi mem nituti poi.
16Tungwatu nya iba sinsun nghas di nijep-jau binap kep ser sinsun timiei nirikti bi. Leu mbigom sinsun nghas di nijep-jau bindei ba, sinsun timiei rik bibor bu ri. 17Nok gima cem tungwatu nya yuhug ba anggur ngei di nijep ei aigmui mindhe ngkek timieiti bi. Leu gi nok lene mbigom ba anggur ngei mikiak leu api aigmui mindhe ngkek mikimbo bikinei sut ba anggur ngei bikiber bingwig ug ri. Aigmui mindhe ngkek dima cem kinei. Noro suar yuhug ba anggur ngei di nijep ei aigmui mindhe ngkek nijepti leu binhyepo kiber bingwig bi.”
Misop di ninnei kimbas kin sop di ngget Yesus de sinsun
(Mrk. 5:21-43; Luk. 8:40-56)
18Tirigi Yesus tri tut nihyet bak yo di igya kui Yohanes bingwig bigyo lene nibou mbusyamei Yahudi gom tau kwei. Noni ba nibiau bicom mpia ei Yesus Noho bei bahara “Dipmisop sindi ninnei kimbas aponi tu. Ma akwei kes anda ei noni dip leu binhyepo niyaijo hanyen bu.”
19Gima rino Yesus kiju bibit noni ba, yo di igya kui Yesus cem ibram.
20Yuug krau puig sinon lene sop gom di ningkek kan mun kikau bikwop mmun-njap mem ari bingwam simnaibrimigcan jop bram Yesus biya kui ninghim dip leu api ngget Nide sinsun nggruna. 21Lewo noni kan “Gino singget Nide sinsun lene misikei hanyen.”
22Yesus kiek no bingat noni lene pai bak “He dikwohop ndia ug o, dwai! Lewo akei hanyen tug hon ade niba ningon com Dati tu. Tirigi pai bak nok rino misop dima kei hanyen.”
23Gima ngwig leu lene Yesus coi kikau ug ei nibou mbusyamei Yahudi de ig. Tirigi Noni ngat lo, yo di ibui ndug-ndug ser nimai kin nindigsi yahagom ighyet sra nggai, 24lene cuk yok “Jahagom jehei leu! Misop dini mai bihigom bi noro bong mai he yo.”
Lene yo dima yahagom insrik ser nihyet. 25Yesus jji yahagom biyuug ei nisai leu api coi ug ei nghim nsi dino misop dima ningut joti bikrau ninda leu api noni kiju biya. 26Yesus ninghapti tibim tut mindur dima bikieng kep hanjop nsi dima nisurti-nipekti.
Yesus bindei ba, ibou can di igyai tu igyai da hanyen
27Mpe dino Yesus jo leu mpia dima bimbut nimig lene yo di igyai tu ibou can yuum Noni ei puig sinon bijop bram lene yahara “Na di Daud Nipmot e, ma angondut nye o!”
28Tirigi Yesus coi ug ei ig bei lene yo cin pima cem ibisau ndam Noni. Leu api Noni hig singgre yok “Jiba jingon com bipia midisindem mem dibindei ba, jiyai da hanyen yo e?” Lene ice bipai “Niba ningon com Na!”
29Lene Yesus ngget igyai njep bipai biyok “Ma jiyai da hanyen bit leu nok jingon di jo kep Dati pima.” 30Gima rino igyai da hanyen. Noro Yesus sok kep yok ngkiem ser “Ma jipui sut mindur dini bak hiter au.”
31Noro imbut ba, itri tut Yesus ninghapti bidem hanjop nsi dima nisurti-nipekti.
Yesus jji ninnei rom leu tungwagom ningonti
32Tirigi yo cin pima yehei leu ig bei tu lene tungwatu nya ibuwak no di ninnei rom kibou di bit bon mbrap kan bi kwei ndam Yesus. 33Tirigi Yesus jji ninnei rom leu ningonti lene noni mbrap kan. Tungwatu nya yahagom inggap leu tut nindig bibor bipai biyam “Mbenjen! Ingat mindur hi nok gini ei minu Israel bi sren!”
34 #
Mat. 10:25, 12:24; Mrk. 3:22; Luk. 11:15 Noro Farisi nya isrep bipai “Nibou ndig mem ninnei rom nya sindem tut Noni leu binhyepo jji ninnei rom nya leu tungwatu nya ingonti.”
Yesus ngondut tungwatu nya
35 #
Mat. 4:23; Mrk. 1:39; Luk. 4:44 Mpe dima lene Yesus mbut nimig bidem minu ndig kin minu mien nya hagom ba, ngginau tungwatu nya ei mben Yahudi ide ig mbusyameisi bitri tut Nihyet Di Kei tut Allah Ninyeng Tak Kepti lene bindei ba, yo di inggwen yahagom ikei hanyen cem. 36#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mrk. 6:34 Noni mian ser tungwatu di inggreu bibor nya bingondut yok nindig bibor lewo inok domba nya di ibou ngwak sibui ba, inghuisi jet cem lewo ibon ide gembala bi. 37#Luk. 10:2 Gima rino Yesus pai bak yo di ibit Noni “Njita nindig bibor len tu noro yo di ikos njita kwei nya ibou cin-can he yo. 38Gima rino ma jingat nadi bak miai niceu leu binhyepo noni micuk nide awak nya biyuug kos njita hagom kwei ei igudanti.”
Currently Selected:
MATIUS 9: HAD
Highlight
Copy
Compare
Share
Want to have your highlights saved across all your devices? Sign up or sign in
