MATIUS 8
8
Yesus bindei ba, no di bras yem no kei hanyen
(Mrk. 1:40-45; Luk. 5:12-16)
1Tirigi Yesus juk kwei leu mbigdip lene tungwatu nya ningot ndig ijop bram. 2Mpe dima lene no di bras yem no#8:2: Nipas kep no di bras yem no: Bit leu nok Allah niggai serti ne dem mem gima yo di bras yem yok icoi ug ei mben Yahudi ide ig mbusyameisi kin Tuhan De Ig mem ikuk yok bak Allah eisi bi. kwei ba nibiau bicom mpia ei Yesus nimig him bahara “Andigpoi e, gino ajoi sut ne akrau nisindemti mem gima abindei bidikei hanyen hak ug.”
3Lene Yesus su ninda bingget no dima bipai “I, dijoi sut. Ma akei hanyen!” Hammi tirigi pai bak nok rino bras dima llet hak leu noni. 4#Im. 14:1-32 Lene Yesus cuon ser noni “Amiap e, ma aug mbot kep tut mun di pek kep mem na dima bak nindigsi nya au. Noro aug ndo nanti bak imam leu binhyepo bimian ser angkek dip. Leu api abon midut bit leu nok Musa nicuk nyeti nok bindo bak tungwatu yahagom bipia akei hanyen tu.”
Yesus bindei ba, nibou tentara Roma de awak kei hanyen
(Luk. 7:1-10)
5Tirigi Yesus kwei krau Kapernaum lene nibou tentara Roma gom kwei um Noni bahara, 6“Andigpoi e, las hwen ditde awak ei ig bei ba, bit bon noni kiju-kiju nyen kan bi lewo nggwen bibor.”
7Lene Yesus buhup “Dwai, miduug bindei ba, noni kei hanyen.”
8Noro nibou tentara tte tut bipai “Nok bi. Dani ne dem mem gima acoi kwei ei ditde ig bi. Apai hak ei ahui him he apino ditde awak mikei hanyen hak. 9Lewo nibou ndig tentara ninyeng tak kep da ba, dani cem dinyeng tak kep ditde limwa nya ba, ikuk yok bida. Gino dicuk hi ‘Aug hak!’ Leu api noni bisau buug hak. Gino dihig hi ‘Akwei!’ Leu api noni bisau bikwei hak. Gino dicuk awak hi ‘Ayai midyai dini!’ Leu api noni bisau biyai hak.”
10Tirigi Yesus miap nihyet lene nggap leu tut nindig bibor bitri tut bak yo di ijop bram Noni “Mbenjen! Duum limwa Israel gom di ba ningon com Da noyam kin no dini hi bi sren. 11#Luk. 13:29 Ma jiyok ngon kep gini! Tungwatu nya imang bibor mikwei leu mpia nipriti kin mpia nicutti leu api migyem njita bit Abraham Ishak Yakub nya ei Allah Ninyeng tak Kepti. 12#Mat. 22:13, 25:30; Luk. 13:28 Noro Allah micuk Nide malaikati nya ba, yuug com yo po Allah mbus yok habiei ei nimbie him mem icoi ei Allah De Dihyei Di Nijep pima kikau ug ei nidinditi di jo nisai. Apino yo dima ipim nggruet ba, yaham yuhui drek dip cem ei mpia dima.” 13Lene Yesus cuk nibou tentara dima “Angkwei hanyen ug ei ade ig hak ug. Midiyai igbit leu nok aba angon com Da tutti.”
Tirigi Yesus pai nok rino awak dima kei hanyen hak ug.
Yesus bindei ba, yo di inggwen imang bibor ikei hanyen
(Mrk. 1:29-34; Luk. 4:38-41)
14Yesus ug ei Petrus de ig bingat lo, Petrus nignyot ningkek dut bibong nibongti. 15Yesus ngget ninda apino ningkek di dut dima pren hak leu api noni kiju bingei njita tut Yesus nya.
16Mmunti lene tungwatu nya ibuwak yo di ninnei rom ya ingonti imang bibor kwei bingwig ttai Yesus leu api Noni ba nihyet gom ngat bijji ninnei rom nya leu yok bibindei ba, yo di inggwen yahagom ikei hanyen. 17#Yes. 53:4 Yesus yai midyai dini hagom dem igbit tto bou di nabi Yesaya tri tut “Noni kwek nye leu ide ninggwenti bibiang ide nibuhunti nya.”
Yo di ikan bipia ibit Yesus noro ingon gom bi
(Luk. 9:57-62)
18Tirigi Yesus ngat lo, yo di imang bibor ingwig ttai Noni lene cuk yo di igya kui Noni jikwei ba, yuug ei igpong nite dinyo. 19Lene guru Puig Yahudi nicukti gom kwei pai binoni “Guru e, midibit Na kikau bidem ambutti nya hagom.”
20Yesus buhup “Nsien bigbehei nya ibong kikepti nonaha, Ha nya cem ibas nonaha. Noro Munggwom Tungwatu Nipmot bon nibongti hi bi.”
21Lene hiter di bit Yesus pai binoni “Andigpoi e, gino ace tut ne duug tig dicig nimai nipou ug e leu api midikwei bit Na.”
22Lene Yesus buhup “Nnaba yo di imai nya mitig ide nimai nya. Noro tut nani ne ma akwei bit Da hak ug.”
Yesus bindei ba, hou ntus hanyen
(Mrk. 4:35-41; Luk. 8:22-25)
23Yesus bri ut bit yo di igya kui Noni. 24Hou di nimig ten bibor cut kros ba, igpong roi nindig bibor bikibor ei ut nsi. Noro Yesus bong mai leu su. 25Leu api yo di ibit Yesus yuug win Noni ba, yahara “Andigpoi e, ampu nye leu isar minyei ug ri!”
26Yesus buhup “Jidigit tut mindei i? Jiba jingon com Da bi!” Lene Noni kiju biya leu api ggai ser hou di ten bibor kin igpong di roi bibor apino hou ntus hak ba, mpia mbum-bra.
27Leu api yo di ibri ut dima bit Noni inggap leu tut nindig bibor bihig ser yam “Tou rin i? Lewo hou kin minyei bit nihyet bintus hak!”
Yesus jji ninnei rom nya leu ibou can ingonti
(Mrk. 5:1-20; Luk. 8:26-39)
28Yesus nya yuug tau ei igpong nite dinyo ei minu ndig Gadara leu api ibou can ikwei um Noni. Ninnei rom nya igya ei ingonti ba, imbuk bibor apino timiei hanjop nsi dima ittin tut yok bikriau mpia dima. 29Yahacem yehei leu jui dip di hak mihyeti di ibong-bong nyen eisi bimbrua Yesus bipai “Na di Allah Nipmot e, anggon ndei nye i? Akwei hwen bit nye nipou tirigi tto bou dem bigyo e?”
30Na nya ningot ndig item dihyei ei timbukti dideu mpia dima. 31Ninnei rom nya yahara Yesus “Gino akos tut bipia ajji nye ug rin ne ma ajji nye binuug ei na dima yok ingonti.”
32Yesus ce “Jug hak ug!” Nok apino ninnei rom nya ikes yo cin dima ei leu bicoi kikau ug ei na nya ingonti leu api na nya yahagom idor sindem bibor ug ei pimbien bou ba, ikinyon ei igpongti leu api minyei kot yahagom bisar bingwig.
33Lene yo di ighyen kep na dima yok idor bingkwei hanyen ug ei ide minu ndig bitri tut mindur dini yok bitut tungwa cin di ninnei rom nya igya ingonti cem. 34Lene timiei minu dima yahagom induk yam kwei biyuum Yesus. Tirigi ingat Noni lene ibidip huk Noni leu binhyepo ngkwei hanyen bikes ide hanjop nsi ei.
Currently Selected:
MATIUS 8: HAD
Highlight
Copy
Compare
Share
Want to have your highlights saved across all your devices? Sign up or sign in
