MATIUS 20
20
Nihyet nibiti nindati tut yo di igyai midyai ei ba anggur nghousi
1Allah Ninyeng Tak Kepti rinok miai ceu gom di mbut mem njap bigyoti binggok tungwatu di igyai midyai bi nya leu binhyepo igyai kep midyai ei nide ba anggur nghousi. 2Niabiati noni preu kep yok tut imuhup mitiei nitig di buhun gom mem njap gom leu api cuk yok ba, ikinyon ei midyai dimati. 3Mpia ngket lene noni ug nggok tungwatu hi kin bu leu api ttau kep ibou poi di igya-ya nyen ei biyati he. 4Gima rino noni cuk yok ‘Jeni cem ma juug yai midyai ei ditde ba anggur nghousi leu api midiyai jimuhup di igbit bije.’ 5Yo dima cem ice bikinyon eisi. Miai ceu dima ug nggok awak hi kin bu mem mpia huk pijumti kin mpia nicaisi. 6Son dideu mmunti lene noni mbut hanyen bu bingat yo di igya-ya nyen ei biyati hi kin bu bihig ser yok ‘Nggon rino jiya-ya nyen ba, jiyai midyai hi bi kikau njap jei di ammani i?’ 7Ibuhup ‘Lewo hi ndo midyai di niyai binye bi.’ Miai ceu dima cuk yok ‘Jeni cem ma juug yai midyai ei ditde ba anggur nghousi.’
8 #
Im. 19:13; Ul. 24:15 Mpia jinjui su lene miai ceu dima cuk nide mindor bipai ‘Ahig yo di igyai midyai yahagom kwei lene ma ayai imuhup biyok. Ba, ayai bak yo di ikinyon eisi mem mmunti bibie sindam ug bipek yo di ikinyon eisi mem njap bigyoti ei ningwigsi.’ 9Lene yo di ikinyon ei midyaiti mem mmunti itug ndei imuhup mitiei nitig di buhun gom bibikwop yahagom. 10Gima rino yo di ikinyon ei midyaiti bibie mem njap bigyoti igyok ingon mem gima itug ndei imuhup di nindig bibor dor njiriek nindigsi nya. Noro yoni cem itug ndei imuhup mitiei nitig di buhun gom bibikwop yahagom. 11Tirigi itug ndei imuhup nok rino ilua sok tut bak miai ceu, 12bipai bak ‘Yo di ikinyon ei midyaiti mem mmunti igyai midyai mem jam gom ngat he noro nyeni niyai midyai ba, nahanggwap mbilen kikau njap jei di ammani. Nggon rino yoni itug ndei imuhup di noyam kin nyeni nimuhup i?’ 13Miai ceu buhup ‘He disut na e, diyai mun tunggwei sut na bi. Tirigi akinyon ei midyaiti ne ace tut mitiei nitig di buhun gom ngat nok amuhup bi e? 14Yo, atug ndei amuhup tu ba, ambut tut hak ug. Lewo dikos tut bipia yo di ikinyon ei midyaiti ei niabiati igyai imuhup noyam kin amuhup di diyai bina. 15Diba mitiei di dinyeng tut bitri je bit leu dijoi sutti bi e? He ma jibou dut drek dip gi dingondut tungwatuti e?’
16 #
Mat. 19:30; Mrk. 10:31; Luk. 13:30 Lene Yesus binut bu “Nok gima cem tut yo di yoom yonti bigya nohon keti mikwei ya bibie lene yo di igya bibie miyoom yo leu bingkwei hanyen ug ei nohon keti bu.”
Yesus pai nimbiningai tut Nonti nimaisi
(Mrk. 10:32-34; Luk. 18:31-34)
17Tirigi Yesus kin yo di igya kui Noni ibou simnaibrimigcan imbut imig bikui ug ei Yerusalem lene Noni buwak yok ter biyongkom hapuig leu api pai nyahan biyok, 18“Jimiap e, nogindini ikui ug ei Yerusalem ri. Ei sirima ne tungwatu nya mitri Munggwom Tungwatu Nipmot ei imam nindig nya kin guru Puig Yahudi nicukti nya indati leu api yoni mijem nimai gau Noni. 19Leu api yoni mitri Noni hanyen bak ngkiai nya. Yo dima miba ighyet bicig Noni ba, imbas Noni leu api mipek Noni ei biei salibti cem. Noro ei njap gi niningai lene Noni mikiju hanyen leu nimai eisi.”
Zebedeus nitnem hara Yesus
(Mrk. 10:35-45)
20Lene Zebedeus nitnem buwak nipmot bat cin ug ei Yesus Noho bei lene ba nibiau bicom mpia bahara Yesus tut mun nyeng gom.
21Yesus hig ser noni “Ahara Da tut mindei i?”
Noni buhup “Apreu ei bida bipia dipmot bat cin dini hi migwam kui anda com lene hi migwam kui anda prak ei mpe dino anok Nibou Ndig.”
22Yesus buhup “Jikan bidem tut mun di jahara Da tut bi. Bon jidut ei mok ninghuisi wei di didut eisi kan e?” Lene ice.
23Yesus pai biyok “Igbit ri. Jidut ei gi mokti di didut eisi. Noro tut yo di igwam kui dinda com kin dinda prak ne bit bon dindo yok bi lewo Dicig jem gumihyep dima bou No mem yo di inyeng jo niti he.”
24Tirigi nindigsi ibou simnai imiap tut mun di yo cin dima yahara Yesus tut lene ingon sibui sut yok. 25#Luk. 22:25-26 Gima rino Yesus nduk yo di igya kui Noni yahagom kwei bipai biyok “Jikan tut bipia nibou ndig ngkiai nya ico kep ide limwa nya ba, yo di isindem nya ighyet buhun tak ide awak nya bi e. 26#Mat. 23:11; Mrk. 9:35; Luk. 22:26 Noro ma jinok yoni au. No di joi sut ninyeng di jei lene ma om nonti nok awak mem nindigsi nya. 27No di joi sut ya bibie mem je lene ma om nonti nok awak mem je di nindigsi. 28Bit leu nok Munggwom Tungwatu Nipmot di kwei leu binhyepo tungwatu nya inyohou Noni bi noro kwei leu binhyepo nyohou tungwatu nya leu api kes ninnei ei mem bikwek imang bibor leu mun di kat yok.”
Yesus bindei ba, ibou can di igyai tu igyai da hanyen
(Mrk. 10:46-52; Luk. 18:35-43)
29Tirigi Yesus nya ijo leu Yerikho lene tungwatu ningot ndig ijop bram yok. 30Ibou can di igyai tu igwam simpak ninghas ba, imiap tut Yesus di mbut njiriek yok. Gima rino yahara “Na di Daud Nipmot e, ma angondut nye o!”
31Noro tungwatu nya imang bibor ingon sibui sut yok bipai ser yok “Jahara sok au.” Noro iba ighyet nindig bahara bu “Na di Daud Nipmot e, ma angondut nye o!”
32Lene Yesus ya niyati bihig ser yok “Jijoi sut dinggon ndei je i?”
33Ibuhup “Andigpoi e, akinding nyeni niyai ba, da hanyen bu ug!”
34Yesus ngondut yok bingget igyai njep. Tirigi Noni ngget igyai njep rino igyai da leu api ibit Noni.
Currently Selected:
MATIUS 20: HAD
Highlight
Copy
Compare
Share
Want to have your highlights saved across all your devices? Sign up or sign in
