MATIUS 19
19
Yesus ningginausi tut nikou nitnemti
(Mrk. 10:1-12)
1Tirigi Yesus kes nihyet tut nipingok yokti hagom tu lene Noni jo leu Galilea buug kikau ug ei hanjop Yudea ei Minyei Yordan nite dima ug. 2Tungwatu nya ningot ndig ijop bram leu api Noni bindei ba, yahagom ikei hanyen ei mpia dima.
3Lene Farisi nya ibou poi ittau kwei bihig singgre Noni “Ide Allah niggai serti sindui sut tungwatu nya ikos tut bipia ikou sut itnem mikui-kausi e?”
4 #
Kej. 1:27, 5:2 Lene Yesus buhup “Jikwop leu Allah Nihyet di pai ‘Ei nimbie him ne Nipai Tes Mun Cig pai tes no di pinai kin no di sop bi e?’ ” 5#Kej. 2:24 Leu api Noni pai bu “Gima rino no di pinai mikes nicig nipmem nya ei ba, nitnem yoni mibong gom leu binhyepo yahacem inok gom kin yam. 6Gima rino inok ibou can bu bi noro inok gom kin yam. Tut mun di Allah bicim yamti tu ne ma tungwatu nya inggek tut yam au!”
7 #
Ul. 24:1-4; Mat. 5:31 Lene Farisi nya ihig ser noni bu “Gi nok lene nggon rino Allah niggai serti sindui sut ba, tungwagom bon srat nikou sut nitnemti biyai srat dima bak leu api jji noni buug bihigom i?”
8Yesus buhup “Allah niggai serti sindui sut gi jikou sut jitnem lewo jingkek ndok. Noro ningat ne, habiei ei nimbie him nok gima bi. 9#Mat. 5:32; 1Kor. 7:10-11 Ma jiyok ngon kep bipia mbro nok gino nitnem bon mun hi bi lo, nijjep kou sut noni mikui-kausi biluei ninggang bu lene no dima cut ei sisar nipigau nitnemti tu.”
10Gima rino yo di igya kui Noni ipai bak “Gino mun dima micut kep nicep-tnem nya lene gi kei rino iwak yam au.”
11Yesus buhup “Tungwatu nya yahagom mibit jipaisi dima kan bi noro yo di Allah dimig yok ei mem nya he. 12Lewo pinai nya bihi ipijet habiei ei ipmem ninghopti ba, bit bon igyem njita tut sop nya kan bi. Ba, bihi ipijet lewo tungwatu nya ikinding yok ser. Ba, bihi iba noom ningon leu sopti nya bahati tut Allah Ninyeng Tak Kepti. No di dem mem ningginausi dini lene ma noni ce tut bibit ningginausi dini.”
Yesus ngat nadi tindei gi kei mem munggwom nya
(Mrk. 10:13-16; Luk. 18:15-17)
13Mpe dima ne tungwatu nya ibuwak munggwom mien nya kwei bak Yesus leu binhyepo Noni mitak kep ibou nggram him bingat nadi tindei yok. Noro yo di igya kui Noni ibigen ser yok. 14Gima rino Yesus srep “Ma jisindui sut munggwom dima yok bikwei ngat Da ba, jibigen ser yok au. Lewo tungwatu di ingonti noyam kin munggwom dini yok ingonti minggre kin Allah Ninyeng Tak Kepti.”
15Lene Noni kes ninda ei munggwom mien dima yok ibou nggram him biyai gi kei biyok leu api kes yok bimbut.
Pinai pilei gom di nyeng bibor
(Mrk. 10:17-31; Luk. 18:18-30)
16Mpe di gom ne pinai pilei gom kwei ngat Yesus bihig ser Noni “Guru e, dibon mun di kei di notou leu binhyepo ditug ndei niyaijo nijep di jo kikau i?”
17Yesus buhup “Nggon rino ahig ser Da tut mun di kei i? Allah Nongkom kei. Gino ajoi sut atug ndei niyaijo kikau lene ma abit Allah nicukti nicuk nyeti nya.”
18 #
Kel. 20:13-16; Ul. 5:17-20 No dima hig ser Yesus “Apai sut nicukti di notou i?”
Yesus buhup “Ahwen mun au acut tut hi nitnem au anggimang mun au ambres kep hiter au. 19#Kel. 20:12; Im. 19:18; Ul. 5:16 Ma akuk na ba, anyohou acig apmem nya ba, angon ngakei yo di hiter bit leu nok angon ngakei nanti.”
20No dima buhup “Dibit nicukti dima yok hagom tu ba, suar dibon mindei bu i?”
21Yesus pai binoni “Gino ajoi sut abindei ba, akei-kau lene ma aug tri ade ndigban hagom ba, abipek mitiei leu api akwas hagom tut yo di yuhui mbum nya. Ayai nok gima lene abikum ei mun di keiti mem nanti ei gwamti. Ayai gima bingwig leu api akwei bit Da.”
22Tirigi no dima miap Yesus nibuhupti nok rino noni ba ningon di buhun bingkwei hanyen drek dip gi nyeng tut ndigban nindig bibor.
23Lene Yesus pai bak yo di igya kui Noni “Dipai bije bipia nggruk bibor mem yo di inyeng nya inggre kin Allah De limwa nya. 24Dipai mun nyeng gom kin bu bije bipia krop kei mem unta ningut gom coi kak mup mbrei mihyeti leu gima no di nyeng bibor coi Allah De Dihyei Di Nijep.”
25Tirigi yo di igya kui Yesus imiap nipaisi lene inga leu tut nindig bibor bihig ser “Lene tou ridem mem gima yai niteu leu sisarti kin niyaijo nijep i?”
26Yesus mian huk yok bibuhup “Bit bon tungwatu nya igyai mun dini yok kan bi! Noro Allah sindem mem gima yai mun nyeng hagom.”
27Lene Petrus pai binoni “Angat i! Nikes mun di hagom ei leu binhyepo nibit Na. Nitug ndei mindei ngan drek dip i?”
28 #
Mat. 25:31; Luk. 22:30 Yesus pai biyok “Ma jiyok ngon kep bipia tirigi Munggwom Tungwatu Nipmot gwam ei Nide banggo mbrei di kei-kau-keiti ei Dihyei Di Nijepti bu lene je di jiya kui Da jibou simnaibrimigcan cem mijigwam ei jide banggo mbrei dip leu api mijinyeng tak kep mben Israel ide keret simnaibrimigcan. 29Bikwop no di kes nide ig bei nsi nya kin nikindig-nikinjoi bat nya kin nikwohop bat nya kin nicig-nipmem nya kin nimunggwom bat nya kin nide miai bitut njita di joti ei leu binhyepo bit Da lene no dima miyai bibikwop mun dima yok hagom mbisratus gom bram yam hanyen bu bitut niyaijo nijep di jo kikau cem. 30#Mat. 20:16; Luk. 13:30 Noro yo di imang bibor di igya bibie ei nijam dini miyoom yok bigya ei nohon keti. Yo di imang bibor di yoom yonti bigya ei nohon keti ei nijam dini mikwei ya bibie mem nindigsi nya.”
Currently Selected:
MATIUS 19: HAD
Highlight
Copy
Compare
Share
Want to have your highlights saved across all your devices? Sign up or sign in
