HOSEA 2
2
1Gima rino ma ajem ade bat mben Israel inyeng “Allah De Limwa nya di tuhan Ngondut Yok.”
Gomer di ningon gom bi ndo tut mben Israel
2 tuhan pai “He dimunggwom bat jen e, jipmem nok ditnem bu bi lene Dani dinok nijjep bu bi. Gima rino ma jipai kep noni ei nikei noho bei leu binhyepo noni mikes hon ba, cut tut pinai nya ariwace ba, nikrar jut bu au. 3Gino noni nikrar jut kikau lene midijuk nide sinsun bingwig leu noni leu binhyepo ningat ngu noyam kin njap di nipmem srek tut noni. Midibindei ba, noni noyam kin iggum ndigsi di ningat ntun him bi leu api mai ninggobiau. 4Nimunggwom bat nya rijeni ba, dingondut je bu bi lewo jipmem ne sop di nikrar jut ri. 5Jipmem ne sop di nikrar jut di kan nimmaisi bi ri. Noni pai ‘Suug ngat pinai di icut tut sa nya leu binhyepo siyem njita ba, sidut ndia ngei bit yok. Leu api yoni migyai minyahas wol kin linen kin mini zaitun kin ba anggur ngei bisa.’
6Gima rino midiba war ninggwen bikrop ser noni bidiba ngug tig binggam ser nide puigya. 7Noni muhuk bram pinai di icut tut noni noro bit bon hatap yok kan bi. Noni minggok ser yok noro ngat yok bou niyai him cem bi. Noni mikan ‘Nnaba singkwei bisibong bit sijjep ndig hanyen lewo noni nyohou sa nok gi kei dor njiriek yo di icut tut sa pima yok.’
8Atnem pai jit bipia Dani rino diyai gandum kin ba anggur ngei kin mini zaitun kin mas kin perak binoni di bikuk no bak Baal bi sren. 9Gima rino tirigi bed dem mem ike gandum kwei ei ig gudanti ne midipos gandum kin ba anggur ngei kin sinsun wol kin sinsun linen di diyai binoni pima hanyen bingwig leu noni. 10Midibindei ba, ningat ngu bou pinai di icut tut noni igyai him leu api bit bon pinai dima hi teu noni biningwes ngun leu Ditde nisindemti kan bi. 11Midibindei ba, nide njap ndig nya hagom kes hon hak ug. Bitut pesta di noni bon bikwop ari bingwam kin bed kin Njap Nigwam Kep Ninghuisi nya di ijem ninyeng bipia njap nibon midutti nya. 12Midibindei ba, nide ba anggur kin biei ara di pinai di icut tut noni igyai binoni bibigo nicut tut yamti pima hagom sar bingwig. Midibindei ba, ba anggur nghousi kin biei ara nghousi nide wer bohousi leu api mindhe-ndhe di iten pos nya minggek hagom bingwig. 13Midikes hukum ei noni dip bit leu njap ngwa hagom di noni ndig biei nggrai di ui-gwang kei bak Baal lene ba nide mas kin perak bimau nonti buhuk bram pinai di cut tut noni. Da di tuhan disimbot dat tu.”
tuhan ningon ngakei Nide limwa nya
14 tuhan pai “Gima rino midibuwak noni hanyen ug ei iggum ndigsi leu api diba dihyet di mmau bihwen ningonti. 15#Yos. 7:24-26 Midingkwei nide miai ba anggur nghousi hanyen binoni bidibindei ba, nide Mbang Briep Ningon Buhunti luei nitta binok dimbou niyok ningon memti. Noni miya um Da ei sirima noyam kin nijam di noni sindi kwei leu Mesir nok sop gwam nitta pilei. 16Mpe dima lene noni mijem nijjep bit Dani leu api jem nijjep bit kwar Baal bu bi. 17Midipai ser noni leu binhyepo noni ndat kwar Baal ninyeng bu bi sren. Apino tungwatu nya migyok ngon kep kwar Baal ninyeng bu bi.
18Mpe dima lene midipai tes mindhe-ndhe kin ha nya di bit bon tungwatu nya ipijuk kan bi nya leu binhyepo iwaisi Ditde mben bu bi. Ba, midipos minggwen pran nya hagom bingwig leu Ditde limwa nya leu binhyepo ikon pran ei ide minu dima bit yam bu bi. Leu api yahagom ingon mijo nyahan ba, ibong kei igwam kei.
19Na di Israel e, midiwak na ba, anok ditnem di ningat-ngat bijo ninno bijo kikau. Midingondut na bidingon ngakei na cem. Midiba ningon srenti kin ningon gomti bibon na.
20Midiwak na bit leu nok gi dipreu ei mem na tu. Mporo ma apai jit bipia Dangkom he rino ade tuhan.
21Mpe dima lene midibuhup Ditde limwa di mben Israel ighyet tirigi ingat nadi.
22Midibindei ba, mpia but leu mpia-bbed him ug ei dihyeisi mu leu binhyepo gandum kin ba anggur kin mini zaitun ngat ningat nindig bibor.
23 #
Rm. 9:25; 1Ptr. 2:10 Midita Ditde limwa nya ei ide minu leu api yoni mibong kei migwam kei eisi. Midindo brei bou igyai him bipia dingon ngakei yo di dijem inyeng ‘Yo Di Hi Ngondut Bi’ pima. Midipai sut yo di dijem inyeng ‘Ditde Limwa Bi’ pima inyeng ‘Jinok Ditde limwa nya.’ Leu api ibuhup ‘Nani ne nyende Allah ri.’ ”
Currently Selected:
HOSEA 2: HAD
Highlight
Copy
Compare
Share
Want to have your highlights saved across all your devices? Sign up or sign in
