NEHEI LEUSI 40
40
Musa hok tuhan De Prak Meng ba, piga ei mem Noni
1Lene tuhan pai bak Musa, 2“Ma ahok Ditde Prak Meng ei njap gi nigom mem jide bed gi nigom. 3Lene akon Brua Gi Preu bitut Nicukti Simnai di joti ba, akes eisi. Lene apindur ban mbrawin bijo ser Brua dima. 4Lene akon meja kwei bitut nimbumbati di joti nya ba, akes eisi. Lene akon mini njeng nidihim kwei ba, acim nide ninjeng mbrei nya eisi. 5Lene akon nimbar hum dok mem biei nggrai kwei ba, akes bijo ei Brua Gi Preu nibiho leu lene apindur ninghas gom kin bu bijo ser dimbou hui ei Prak Meng nsi. 6Lene akon nimbar hum dok kwei ba, akes bijo ei Prak Meng nuhui. 7Lene akon bokor minyei kwei ba, akes bijo ei Prak Meng kin nimbar hum dok nikieti leu api atau minyei eisi. 8Lene atas sar di bikrop ttai ninsi di jo bas hak dima bitut nide cou nya leu api apindur ninghas gom kin bu bijo ser dimbou hui ei sar dimati.
9Lene aba mini nibon midut bipiga Prak Meng bitut nimbumbati nya lene gima bindei ba, hagom kwes-kwau ei mem Dani. 10Lene aba mini nibon midut dima bipiga nimbar hum dok lene gima bindei ba, kwes-kwau ei mem Dani. 11Lene adimig bokor minyei bitut nidihim cem ei mem Dani.
12Lene abuwak Harun kin nipmot bat nya kwei bigya kui dimbou hui ei Ditde Prak Meng nuhui. Ma ibon midut dino ikek minyeiti ei sirima. 13Lene ajuk sinsun imam pima hagom ei Harunti leu api akiber mini nibon midut ei nibou nggram him leu binhyepo abidimig noni ei mem gima yai kep midyai nok imam mem Da. 14Lene abuwak nipmot bat nya kwei ba, ajuk sinsun ninda ei yoti. 15Lene akiber mini nibon midut ei ibou nggram him bit leu nok akiber ei icig nibou nggram him pima leu binhyepo igyai kep midyai nok imam mem Da. Tug hon nibon midut dima lene yoni migyai inyeng imam bijo ninno bijo kikau.”
16Lene Musa yai hagom bit leu nok tuhan nicuk noti. 17Gima rino yohok tuhan de Prak Meng ei njap gi nigom mem ide bed gi nigom ei ari bingwam nitindur can niabiati yehei leu minu Mesir tu. 18Musa bindei ba, limwa nya iprion nitriti nya ba, itas nide biei kibi nya ba, yuhum nide biei njiti nya ba, ita nide cou nya cem. 19Lene iba minyahas nititut yam di jei bibor bijuk kep ninggilai lene iba prak meng di iba mindhe ningkek bibon bimie nidip hu kwei bit leu nok tuhan nicukti. 20Lene ikon tig mma can pima bikes hacem ei Brua Gi Preuti. Lene igyai ug nya ba, isu ei srak nyati leu api iba nibeng bikibou kep. 21Lene ikon Brua Gi Preu titut yam bikes ei Prak Meng behei lene ipindur sinsun mbrawin pima bijo ser bit leu nok tuhan nicukti.
Mben Israel yohok tuhan de Prak Meng bipiga ei mem Noni
22Lene Musa bindei ba, ikon meja pima ug ei Prak Meng nsi bikes bijo ei sinsun mbrawin nuhui nite bei mpia nijjai. 23Lene ikon roti di ipigig sut ei mem tuhan bikes ei meja dip bit leu nok tuhan nicukti. 24Lene ikon mini njeng nidihim bikes ei Prak Meng nsi sur meja nijoti noro ndam nite bei mpia nibiho. 25Leu api itin mini njeng pima ei ninsi dima ei tuhan Noho bei. 26Lene ikon nimbar hum dok di iba mas bibon mem biei nggrai pima kwei bikes ei sinsun mbrawin pima nuhui. 27Lene indig biei nggrai di ui-gwang kei eisi bit leu nok tuhan nicukti. 28Lene ipindur minghas gom kin bu bijo ser dimbou hui ei Prak Meng dimati. 29Lene ikon nimbar hum dok pima kwei bikes ei minghas dini nuhui bu. Lene noni bon midut nindig mindhe titut kep hum kin nibon midut njita nibipai sigyo bak Allah cem bit leu nok tuhan nicukti. 30Lene ikon bokor minyei kwei bikes ei Prak Meng kin nimbar hum dok ikieti bitau minyei eisi. 31Lene Musa kin Harun kin nipmot bat nya ipiap inda kin imig eisi, 32bikwop mpe dino isu yo ndam nimbar hum dok ba, icoi ug ei Prak Meng behei bit leu nok tuhan nicuk yoti. 33Lene iba sar pima bikrop ttai Prak Meng kin nimbar hum dok cem. Lene ipindur minghas gom bu bijo ser dimbou huigya. Nok gima lene midyai dima yok hagom put tu.
Bumbuhui nggai kep tuhan De Prak Meng
(Bil. 9:15-23)
34 #
1Raj. 8:10-11; Yes. 6:4; Yeh. 43:4-5; Why. 15:8 Lene bumbuhui pima juk kwei binggai kep tuhan de Prak Meng leu api tuhan de nikei-kau-keisi piga ei Prak Meng nsi. 35Gima rino bit bon Musa coi ug ei Prak Meng nsi kan bi. 36Bikwop mpe dino bumbuhui pima kui bijo nai tuhan De Prak Meng lene mben Israel illet ide prak meng mien nya hagom bitin ei mem imbut ug ei minu hiter. 37Ne gino bumbuhui jo nijoti bikui bi lene yahagom ibong nyahan bimbut bi. 38Lene tuhan ningat rin ei Nide Prak Meng nsi biluei nitta nok cou bumbuhui mem njap lene biluei nitta nok cou hum mem mmun bou mben Israel yahagom igyai him kikau bidem imbutti nya hagom.
Currently Selected:
NEHEI LEUSI 40: HAD
Highlight
Copy
Compare
Share
Want to have your highlights saved across all your devices? Sign up or sign in
