NEHEI LEUSI 39
39
Tukan nya inap sinsun nibon midut mem imam nya
(Kel. 28:1-14)
1Lene Bezaleel kin Oholiab iba minyahas wol di nimmun kin nghei nta kin gi ningwoi binap sinsun nibon midut mem gima imam nya ijuk ei yokti tirigi igyai kep midyai nok imam ei Ninsi Di Kwes. Inap sinsun dini mem Harun bit leu nok tuhan nicuk Musati.
2Lene iba linen di dia-diau kei kin wol di nimmun kin nghei nta kin gi ningwoi kin mong mas cem binap sinsun efod ningat gom. 3Idip mong mas di dile bibor leu api ibien kin linen di dia-diau kei kin wol di nimmun kin nghei nta kin gi ningwoi dima. 4Lene ibien nimmam can kin sinsun efod ba, gom ei nite hi lene gom ei nite hi leu binhyepo bisrou imam ninghat dip. 5Lene iba mong ninyeng hagom pima cem bibien mun di bikri kep imam nintig bou ba, inap kin sinsun efod nok sinsun ningat gom di ibien bikei-kau-kei. 6Lene igyai tig delima ninjep can ba, ikes tig dima hacem bicim kin bunggan nimpung di iba mas bibon. Lene ikilis Yakub nipmot bat nya ibou simnaibrimigcan inyeng eisi. 7Lene iba tig ninjep can dini bitut nimpung nya bicim kin nimmam can di ibien kin sinsun efod. Tig dini hacem nok tig nibiyok ngon kep mben Israel ide keret simnaibrimigcan bit leu nok Allah nicuk Musati.
Tukan nya inap sinsun minai mem imam ninggeda
(Kel. 28:15-30)
8Lene tukan nya iba minyahas kin mun di ibien ei sinsun efod him pima binap sinsun minai mem imam ninggeda. 9Lene ikrop minyahas mem sinsun minai dini kin yam mbigom leu binhyepo nijeisi kin ninyanti hacem senti ningot can ba, can. 10Lene icim tig permata nipuig bitai kin nibiho. Icim tig delima kin topas kin baiduri sepah ei nipuig gi nigom. 11Lene icim tig zamrud kin nilam kin intan ei nipuig gi nican. 12Lene icim tig lazuardi kin akik kin kecubung ei nipuig gi niningai. 13Lene icim tig pirus kin yakut kin ratna cempaka ei nipuig gi nibitai. Lene ibicim hagom kin bunggan nimpung di iba mas bibon. 14Lene ikilis bibikwop Yakub nipmot bat nya ibou simnaibrimigcan inyeng ei tig permata pima dip ba, gom ei tig gom lene gom ei tig gom lene nok leu binhyepo ibiyok ngon kep mben Israel ide keret nya. 15Lene iba mas bibon lante can dem kep nok kuk mbrei ba, ibien kin yam mem sinsun minai dini cem. 16Lene iba mas bibon srak ningat can ba, inap kin sinsun minai nuhuisi di jo nai. 17Lene inap lante mas can pima kin srak can dini. 18Lene inap lante mas can pima niyenti kin tig delima pima nide bunggan nimpung leu binhyepo sinsun minai kin sinsun efod nimmam nya u yam nok gi kei bitak kep yam bingkiem. 19Lene iba mas bibon srak can bu leu api inap hacem kin sinsun minai nuhuisi ndam nibehei hammi ninghas him simiak sinsun efod pima. 20Lene iba mas bibon srak can kin bu leu api inap hacem hammi sinsun efod nimmam niyenti ei nibiho ndam ninghas him leu binhyepo mun di imam bikri kep nintig bou pima jo bijehei bu. 21Lene iba kuk nimmun bikim srak di ndun ei sinsun minai kin srak di ndun ei sinsun efod kin yam leu binhyepo sinsun minai jo nai leu mun di imam bikri kep nintig bou ba, kwat bi. Nok leu binhyepo hagom bit leu nok Allah nicuk Musati.
Tukan nya inap sinsun nibon midut nindigsi nya
(Kel. 28:31-43)
22Lene tukan nya iba minyahas wol di nimmun binap sinsun ndok di jei mem imam juk ei noti ba, jo ser sinsun efod pima. 23Lene ibien sinsun dima ninghas him ndam nikra ngkiem bibor ser nhyepo nonti rik bi. 24Lene iba mong wol di nimmun kin nghei nta kin gi ningwoi kin mong linen di dia-diau kei cem bibien mun di nok biei delima ningat ba, ipindur hagom bindun sinsun ndok di jei dima ninghas him ndam dihyeisi. 25Lene iba mas bibon brem-brem mien nya ba, ipindur hagom bindun sinsun ndok di jei dima ninghas him ndam dihyeisi bu. 26Lene ipindur brem-brem mas ningat gom ba, ipindur biei delima ningat gom lene nok sindam bindun sinsun ndok di jei dima him bit leu nok tuhan nicuk Musati.
27Lene inap sinsun ninda mem Harun kin nipmot bat nya ijuk ei yoti. 28Lene iba linen di dia-diau kei binap topi kin sinsun bopen. 29Lene iba linen di dia-diau kei kin wol di nimmun kin nghei nta kin gi ningwoi binap mun di imam bikri kep nintig bou bit leu nok tuhan nicuk Musati. 30Lene iba mas bibon penen di bindo bipia Imam Nibou Ndig dimig nonti ei mem tuhan ningat gom leu api ikilis eisi nok gini. tuhan Dimig Imam Dini Ei Mem Nonti. 31Lene iba kuk nimmun bingot mun di nok penen dima kin imam de topi bit leu nok tuhan nicuk Musati.
Midyai tuhan De Prak Meng hagom put tu
(Kel. 35:10-19)
32Lene midyai dino yohok tuhan De Prak Meng dima hagom put tu. Mben Israel ibon hagom bit leu nok tuhan nicuk Musati. 33Lene ikon Prak Meng dima ningat tut nimbumbati nya hagom kwei bak Musa. Nimbumbati nya rinok gini. Nikoisi nya kin nide biei kibi nya kin nide biei njiti nya kin nikiou nya, 34kin prak meng di iba domba nikre ningkek di ningwoi bibon kin prak meng di iba mindhe hiter ningkek di kei bibor kei bibon kin minyahas nititut yam di ibinggai kep biei kibi nya, 35kin Brua Gi Preu bitut tig mma can di joti nya kin nide ug nya kin nibeng, 36kin meja bitut nimbumbati nya hagom kin roti di ipigig sut ei mem Allah, 37kin mini njeng nidihim di iba mas bibon bitut nide ninjeng mbrei nya kin nimbumbati nindigsi nya kin nide mini, 38kin nimbar hum dok mem biei nggrai di iba mas bibon kin mini nibon midut kin biei nggrai di ui-gwang kei kin ninghas di ndun ser dimbou hui ei Allah De Prak Meng nsi, 39kin nimbar hum dok di iba ngkimom-tembaga bibon bitut nide kawanggai kin nide ug nya kin nimbumbati nindigsi nya kin bokor minyei bitut nidihim, 40kin minyahas nititut nya mem sar kin cou nya kin nikiou nya kin ninghas di ndun ser dimbou hui ei sar dimati bitut nide kuk nya kin keu di sren nya mem Prak Meng kin mun di imam nya ikrau kep ei Prak Meng dimati, 41kin sinsun nibon midut mem imam nya ijuk ei yokti tirigi igyai kep midyai ei Ninsi Di Kwes di inap nok sinsun nibon midut mem Harun kin nipmot bat nya ijuk ei yokti hagom. 42Mben Israel igyai kep midyai dini hagom bit leu nok tuhan nicuk Musati. 43Lene Musa yok niyai kep mun dima yok hagom bingat lo, ibon hagom bit leu nok tuhan nicuk noti. Gima rino noni ngat nadi leu binhyepo tuhan njei mun di kei bak yoni.
Currently Selected:
NEHEI LEUSI 39: HAD
Highlight
Copy
Compare
Share
Want to have your highlights saved across all your devices? Sign up or sign in
