NEHEI LEUSI 36
36
1Bezaleel kin Oholiab kin tukan nindigsi nya di tuhan sindem tut yok biyai ningon di ki biyok ba, ibon mun di ibohok tuhan De Prak Meng bou inda him kan cem ri. Suar yoni igyai kep midyai dima bit leu nok tuhan nicuk yokti tu.”
Mben Israel ikwas ide ndigban dor njiriek tut Allah
2Lene Musa hig Bezaleel kin Oholiab kin tukan nindigsi di tuhan sindem tut yok di ijoi sut igyai kep midyai dima yahagom kwei leu api cuk yok ba, ikinyon eisi. 3Ba, Musa kes ndigban di mben Israel ikwas tut Allah mem gima ibohok Nide Prak Meng hagom ei tukan dima yok indati. Noro mben Israel ikum eisi bu bikwop njap bipwoi ndigban di ikwas tut Allah dor njiriek bu kwei tu 4Gima rino tukan di igyai kep midyai yuug ba, 5ipai sut bak Musa “Ade limwa nya ipwoi ndigban di ikwas tut Allah bidor njiriek leu ade nicuk yokti mem midyai dini kwei tu.”
6Nok rino Musa sok nihyet bak mben Israel ei ide prak meng yati leu binhyepo ikes hon ba, ipwoi ndigban di ikwas tut tuhan mem Nide Prak Meng dima kwei bu au. Lene yoni ipwoi ndigban hi kwei bu bi. 7Mun di ikwas tut Allah tu midem mem midyai dima ba, put lene niken mijo.
Tukan nya yohok tuhan De Prak Meng
(Kel. 26:1-37)
8Lene yo di ingon ki dor njiriek nindigsi pima yohok tuhan De Prak Meng. Igyai minyahas linen di dia-diau kei ninghas simnai di iba mong wol di nimmun kin nghei nta kin gi ningwoi ba, ibibien kerub#36:8: Nipas kep kerub: Angig ayai kep Kamus. nya ingwes bidis yam kikau ei nahacanti. 9Bikwop ninghas dima yok hagom noyam ba, nijeisi meter simnaibrimigcan lene ninyanti meter can. 10Inap ninghas muhwi kin yam nok nititut yam di jei bibor gom lene inap nindigsi ninghas muhwi kin yam nok gi pima cem bu. 11Lene ibien nibisrousi nya ei ninghas him. 12Ibien nibisrousi ningot muhwi ei nititut yam gom ninghas him lene nok gima cem mem nititut yam gom kin bu ninghas him. 13Lene iba mas bibon mun di buhum kin yam ningat ningot muhwi leu binhyepo ibuhum minyahas nititut yam dima hacem kin yam nok gom.
14Lene iba kambir nta bibien prak meng simnaibrimiggom bu leu binhyepo ibinggai kep Prak Meng dima. 15Lene ibien hagom noyam ba, nijeisi meter simnaimuhwidip ba, ninyanti meter can. 16Lene inap prak meng dini yok nimeng muhwi kin yam ba, nok nititut yam di jei bibor gom lene inap nindigsi nimeng muhwindagom kin yam ba, nok nititut yam di jei bibor gom bu. Lene ikrop nimeng gi nimuhwindagom kin yam mem gima ipindur ei Prak Meng nuhui. 17Lene ibien nibisrousi nya ningot muhwi kin nititut yam gi nigom ninghas him lene ibien ningot muhwi kin bu kin nititut yam gi nican ninghas him. 18Lene iba ngkimom-tembaga bibon mun di buhum nititut yam dini hacem kin yam nok gom. 19Lene iba domba nikre ningkek di ningwoi kin mindhe hiter ningkek di kei bibor kei bibon prak meng nimeng can kin bu mem gima ibimie kep Prak Meng bu.
20Iba biei meng dia bibon biei kibi nya bibingon nok ig hyei mem Prak Meng. 21Ibon biei kibi dima nanaisi meter bitai ba, ninyanti senti ningot muhwindagom ba, muhwindagom. 22Icim mun di nok keu di sren ningat can eisi bidem biei kibi nya hagom leu binhyepo bindei binut nikiou nya. 23Ibon biei kibi ningat ningot can mem ighyei ei nite di ndam mpia nibiho. 24Lene iba perak bibon nikiou nya ningot bitai mem biei kibi dima ba, ningat can mem bikwop biei kibi gom lene nok. Ibicim keu di sren gom ei nikiou gom, gom ei nikiou gom lene nok. 25Lene ibon biei kibi ningat ningot can mem ighyei nite bei mpia nijjai bu. 26Kin nikiou perak ningat ningot bitai ba, ningat can bikwop biei kibi gom lene nok. 27Lene ibon biei kibi ningat muhwindagom mem ig hyei ei nite di ndam mpia nikimbasti bu. 28Lene ibon biei kibi ningat can bu mem ig nuhuisi. 29Lene ibon mun di pek biei kibi ningat can di jo hammi nuhuisi kin yam ei nitriti kui kikau ug bipek ninggrupti. Ibindei biei kibi mem ig hyei di jo hammi nuhuisi hacem rap yam nok gima. 30Gima rino ig hyei ei nite dima kwei bon biei kibi ningat muhwindaningai tut nikiou nya ningat simnaimuhwidip brimigtehigom di iba perak bibon ba, nikiou ningat can mem biei kibi ningat gom lene nok.
31Lene iba biei meng dia bibon biei njiti di jei bibor ningat simnaimuhwidip. Ningat muhwi mem ig hyei ei nite hi, 32lene ningat muhwi mem ig hyei ei nite hi bu. Lene ningat muhwi mem ig hyei ei nite di ndam mpia nikimbasti bu. 33Ingot biei njiti kin biei kibi pima ei nahacanti sur yam leu Prak Meng dima nuhuisi kikau ug bipek nuhuisi gi nite hi bu. 34Lene iba mas ibinggai kep biei kibi nya kin biei njiti nya hagom. Lene iba mas bibon srak mem gima isu biei njiti nya eisi.
35Lene igyai minyahas linen di dia-diau kei bu mem ban mbrawin ba, ibien mong wol nimmun kin nghei nta kin gi ningwoi eisi. Lene ibien kerub#36:35: Nipas kep kerub: Angig ayai kep Kamus. nya ingwes eisi bidis yam kikau ei nahacanti. 36Lene ipindur ban mbrawin dini ei paku mas ningat bitaisi di ipek kin cou ninjem bitai di iba biei meng dia bibon. Iba mas binggai kep cou dini yok leu api ita hagom ei nikiou nya di iba perak bibon. 37Lene ibon ninghas gom kin bu mem gima ipindur ser dimbou huigya. Iba minyahas linen di dia-diau kei bibon ninghas dini ba, ibien mong wol di nimmun kin nghei nta kin gi ningwoi eisi. Lene ibien ninghas him nya cem bu. 38Lene iba biei meng dia bibon cou ningat muhwi mem ninghas dini lene iba mas bibon nikoisi nya cem. Lene iba mas binggai kep ninggrupti nya kin nide bot nya cem. Lene iba ngkimom-tembaga bibon nikiou nya ningat muhwi.
Currently Selected:
NEHEI LEUSI 36: HAD
Highlight
Copy
Compare
Share
Want to have your highlights saved across all your devices? Sign up or sign in
