NEHEI LEUSI 35
35
Nicukti nya tut Njap Nigwam Kep Ninghuisi
1Lene Musa nduk mben Israel yahagom kwei bipai biyok “Miditri tut tuhan nicukti nya hagom bije. 2#Kel. 20:8-11, 23:12, 31:14-15, 34:21; Im. 23:3; Ul. 5:12-14 Ma jiyai kep jide midyai mem njap nitindur muhwindagom noro njap gi nimuhwindacan ne njap ndig rin ba, Allah dimig njap dima ei mem Nonti. Tungwa tou rino gwam kep ninghuisi bi noro yai kep midyai mem njap dima mitug ndei hukum nimai. 3Ma jindig hum ei jide ig bei mem njap dima cem au.”
Mun di ikwas tut tuhan mem Nide Prak Meng
(Kel. 25:1-9)
4Lene Musa binut bu bipai bak mben Israel “Miditri tut tuhan nicuk nyeti nya dini. 5Jittei mun di jikwas tut Allah kwei. Tungwa tou rino ningon huk niti lene ttei mun di noni kwas. Nok mas kin perak kin ngkimom-tembaga, 6kin minyahas linen di dia-diau kei kin minyahas wol di nimmun kin nghei nta kin gi ningwoi kin minyahas di iba kambir nta binap, 7kin domba nikre ningkek di jihwen bingwoi kei kin mindhe-ndhe nindigsi ningkek di kei bibor kei kin biei meng dia, 8kin mini mem mini njeng nidihim kin mun di ui-gwang kei nya mem mini nibon midut kin biei nggrai di ui-gwang kei, 9kin tig permata delima kin tig permata nindigsi nya mang bibor mem gima ibinap kin Imam Nibou Ndig nide sinsun efod kin nide sinsun minai di noni juk ser ningget hagom kwei.”
Nimbumbati mem tuhan De Prak Meng
(Kel. 39:32-43)
10“Suar tukan di ibon mun bou inda him igkei nya yahagom ikwei bibon kep mun di tuhan cuk nye tut hagom. 11Nok Prak Meng kin minyahas nititut yam kin prak meng di iba kambir ningkek bibon kin nikoisi nya kin biei kibi nya kin biei njiti nya kin cou nya kin nikiou nya, 12kin Brua Gi Preu bitut ug nya kin nibeng kin ban mbrawin di jo ser, 13kin meja bitut ug nya bitut nimbumbati nindigsi nya kin roti di ipigig sut ei mem Allah, 14kin mini njeng nidihim di piga digai bitut nimbumbati nya kin ninjeng mbrei di joti nya bitut mini, 15kin nimbar hum dok mem biei nggrai bitut ug nya kin mini nibon midut kin biei nggrai di ui-gwang kei kin ninghas di isreu ser dimbou hui ei Prak Meng nsi, 16kin nimbar hum dok di indig mindhe kep hum eisi bitut nide kawanggai kin ug nya kin nimbumbati nindigsi nya kin bokor minyei bitut nidihim, 17kin sar mem ninsi di jo bas bitut nide cou nya kin nikiou nya kin ninghas di ipindur ser dimbou hui ei sar dimati, 18kin keu di sren kin kuk nya mem Prak Meng kin gi mem sar, 19kin sinsun nibon midut mem Harun kin nipmot bat nya di ijuk ei yokti tirigi igyai kep midyai nok imam ei Ninsi Di Kwes hagom.”
Mben Israel ipwoi mun di ikwas tut tuhan kwei
20Lene mben Israel yahagom intek gimahap. 21Lene bikwop tungwatu di ingon huk niti ipwoi mun di ikwas tut tuhan kwei leu binhyepo tukan nya ibohok tuhan De Prak Meng. Ipwoi mun di isuar mem gima ibinggei sut Allah kin ibinap sinsun mem imam nya kwei. 22Bikwop yo di ingon huk niti nok pinai nya kin sop nya ipwoi ide piniki kin mitingou him mas kin srak mas kin miep kin mimau mas nindigsi nya hagom kwei bidimig ei mem tuhan. 23Yo di inyeng tut linen di dia-diau kei kin wol di nimmun kin nghei nta kin gi ningwoi kin minyahas di iba kambir nta bibien kin domba nikre ningkek di ihwen bingwoi kei kin mindhe-ndhe nindigsi ningkek di kei bibor kei ba, ittei hagom kwei. 24Yo di inyeng tut perak kin ngkimom-tembaga ipwoi hagom kwei bikwas tut tuhan. Yo di inyeng tut biei meng dia yahagom ipian biei dima kwei mem midyai dima. 25Bikwop sop di idip mong kan yahagom ipwoi mong linen di dia-diau kei kin mong wol di nimmun kin nghei nta kin gi ningwoi di idip ei su kwei. 26Yoni iba kambir nta cem bidip mong hi bu. 27Lene nibou nya ittei tig permata delima kin tig permata nindigsi nya mang bibor kwei mem gima ibinap kin sinsun efod kin sinsun minai. 28Ba, ipwoi mun di ui-gwang kei nya kin mini mem mini njeng kin mini nibon midut kin biei nggrai di ui-gwang kei cem hagom kwei. 29Bikwop yo di ingon huk niti yahagom ipwoi mun di ikwas tut tuhan kwei leu binhyepo tukan nya iba mun di ikwas dima biyai midyai bit leu nok tuhan nicuk Musati tu.
Tukan nya di yohok tuhan De Prak Meng inyenga
(Kel. 31:1-11)
30Lene Musa pai bak mben Israel “tuhan ndo Bezaleel di Uri nipmot ba, Hur nignyon po nimbier kim keret Yehuda pima. 31Ba, Allah kwas Nide nisindemti#35:31: Nipas kep Nide nisindemti cem kei lene nipas kep ninnei cem kei. ndrim hi tut noni leu binhyepo ningon ki tut mun di noni bon bou ninda him nya hagom. 32Ma noni ba nikan bidemti bikilis ndiyok lene ba ningon di ki bitin ei gambar kin bindo leu api ba mas kin perak kin ngkimom-tembaga bibon hagom. 33Bitut tig permata di noni nap kin sinsun minai kin biei di noni heu kan kin midyai nindigsi di tukan nya igyai nya hagom. 34tuhan sindem tut noni kin Oholiab di Ahisamakh nipmot di nimbier kim keret Dan cem leu binhyepo yoni ingginau tukan nindigsi nya tut mun di ibon bou inda him. 35Noni sindem tut yok leu binhyepo ba nikan bidemti bikilis ndiyok bipas gambar cem bibien minyahas linen di dia-diau kei cem minyahas wol di nimmun kin nghei nta kin gi ningwoi cem minyahas nindigsi nya cem. Yoni ne tukan di ingon ki nya di ibon mun nyeng hagom bou inda him kan ri.
Currently Selected:
NEHEI LEUSI 35: HAD
Highlight
Copy
Compare
Share
Want to have your highlights saved across all your devices? Sign up or sign in
