YOHANES GI NININGAI 1
1
Nibou mbusyamei pigo Gayus
1 #
Kis. 19:29; Rm. 16:23; 1Kor. 1:14 Srat dini leu da di nibou mbusyamei ba, dipinak srat dini bak na di Gayus. Nani ne dingon kieti rin ba, dingon ngakei na.
2Handei kon ba, anghuisi kwes ba, abong kei agwam kei noyam kin gi dikan tut bipia angon kwes kei. 3Dingon llei bibor tirigi yo di ingon jo kep nya ibou poi ikwei pui bida bipia angon gom tut Allah di nijit lewo jo nibreisi bipia ayai igbit Allah ningon kanti mem na. 4Tirigi dimiap tut dimunggwom bat nya di igyai igbit Allah ningon kanti inghapti lene gima biyai dingon llei-llau sut dor njiriek mun nindigsi nya hagom.
Nibou mbusyamei nggei sut Gayus
5Disut na di dingon kieti e, dinggei sut na tut ayai munti dino abrim angkek ba, angondut asut bat yo di ingon jo kep nya kin ngkiai nya di ingon jo kep nya. 6Yo dima ipui sut ade ningondut yokti bak yo di mbusyamei ei minu ndig dini tu. Ma ampu yo dima tut mun di isuar mem imbutti nya. Tug hon nisinati dima ne Allah joi sut yok. 7Yo dima ittei yam leu binhyepo igyai kep midyai mem Kristus lo, igyai mun di bahati tut yonti leu yo di ninghim Kristus bi. 8Suar nye di Kresten yahati tut isut bat yo di ingon jo kep dima yok leu binhyepo ipriet kin ide midyai nitri tut Allah nihyet di nijitti.
Diotrefes kin Demetrius
9Dipas kep srat cun ningat gom bidipinak hwou ndam ade mbusyamei tu noro Diotrefes di ningon pri kep ninyeng nibou mbusyamei kou sut ditde nipingok noti. 10Gino dihwou ngat je lene midimbot kep tut niyai munti nya hagom. Lewo noni kkin kep nyeni ninghapti biris mun ei nye dip cem! Ba, ningon cut hon niyai munti nya dima he bi. Lewo noni cigit yo di Kresten kui ig bi noro cuon ser yo di ingon jo kep nya di ijoi sut icigit yok kui ig bijji yo di ingon jo kep dima yok leu mbusyamei ikieti!
11Disut na di dingon kieti e, ma ayai bram yo di ibon mun tunggwei nya igyai munti nya au. Noro ma ayai bram yo di ibon mun di igbit nya igyai munti nya. Allah ninyeng tak kep no di bon kep mun di igbit. Noro no di bon mun tunggwei nya ningon dorti tut Allah bi.
12Tungwatu nya yahagom inggei sut Demetrius. Ba, Allah Nonti cem nggei sut noni ba, nyeni cem ninggei sut noni. Akan tut bipia bon aba angon com mun di nitri tut bina ba, nijit ri.
Nibou mbusyamei kes nihyet hon
13Dipi bidipas kep srat jei bina tut mun nyeng mang bibor bu noro dikou sut gi dipas kep hagom ei srat diniti. 14Diyok dingon mem gima dihwou cem kep na leu binhyepo simbrap bit yam tut.
15Handei kon ba, Allah yai angon jo nyahan.
Asut bat nindigsi nya di ingat rin ei mpia ttou nsi dini ipigo na. Disok dihyet ei na dip leu binhyepo atri tut ditde nipigo yokti bak sisut bat nya yahagom lo, tungwagom-gom sindam.
Currently Selected:
YOHANES GI NININGAI 1: HAD
Highlight
Copy
Compare
Share
Want to have your highlights saved across all your devices? Sign up or sign in