Yilan-Yilan Koe 34
34
Kenan Nyamanɛ Mumɛ Bɛɛ Dan-Tɛgɛ-Koe
1-2Mari ya kuman-kan kɛ don Musa da rɔ ka a fɔ Isirɛla mɔgɛnu ye ko, “N bi nala Kenan nyamanɛ min dila wo ma, wo dan denu bi kɛnu na. 3-5Ka a fɔlɔ dugula wara la, wola nyamani-dan si a dabira Dalɛ-Faganɛ#34.5, 12 Dalɛ Faganɛ: Dalɛ kɛ tɔgɛ gbɛrɛ ye nyɔ ko Kɔgɔ Dalɛ. ma ha ka ke Akiribin Don-Dɛ ma ka tenbi Sin wulɛ rɔ ka ta a labila Idɔm nyamani-dan ma min bi Kɛdɛsi-Baniya dugula-waralɛ rɔ. Dan wo le ye tala ha kan tinɛ do anu bi a fɔla min ma ko Hasa-Ada, tarɛnu bi kan min. Dan wo le ye tala tun ka bila yi-dɔgɔmɛ do fɛ min bi Iyipiti dan la ka ke kɔgɔ-yi ma. 6Wola nyamani-dan si ma Mɛdetereniyan kɔgɔ-yi la tele-yigi wara la.
7-8“Wola dan wo le ye a fɔlɔla Mɛdetereniyan kɔgɔ-yi ma kantɔ-wara la tun ha ka ta ke Hɔ kɔnkɛ ma min bi Hɛrɔman kɔnkɛ dafɛ. Dan wo tara ha Hamati kɔnkɔ-gbɛran la ka ta ha Sidadi soe ma. 9Wo le tara fanan ha Sifarɔn soe ma ka ta ha ka dan Hasar-Inan soe la. Kantɔ-waralɛ-dan le wo la.
10“Tele-bɔɛ-waralɛ-dan fɔlɔtɛ ya a dabira Hasar-Inan soe ma 11ka ta Sifam soe ma ka ta ha Ribila soe ma min bi Eyin soe tele-bɔɛ wara la. Wo le tara fanan ha Kalili dalɛ ma ka a labila 12Yorodan bɛ ma. Wo le tara tun ha Dalɛ-Faganɛ ma ka dan nyɔ.
“Fan minnu bɛɛsi ye dan kɛnu burɔ yɛ, wo dama si ma wotɛ la.”
13-15 #
Yasowa 14.1-5
Musa ya Marita sarakanɛ kɛ latenbi Isirɛla mɔgɛnu ma ko, “Rubɛn bɔnsɔn wo, Kadi bɔnsɔn wo, anubɛ Manasa bɔnsɔn tɔnkɔn kelan, wonu bara ban anuta nyamanɛ sɔrɔnna Yorodan bɛ tele-bɔɛ wara la yan. Kɔnɔ Kenan nyamanɛ si to bɔnsɔn kɔnɔntɛ anubɛ Manasa bɔnsɔn tɔnkɔn kelan bolo ka a tala koron-nakɛ fɛ wo wa Yorodan bɛ tɛgɛ wati min. A si ma wo ye iko Mari ya a fɔ nya min.”
16-18Mari ya a fɔ Musa ye ko, “Saraka-Masɔla Ɛliyasa anubɛ Nunna dan Yasowa si nyamanɛ tala bɔnsɔnnu tɛma. Wo si kun-tigi kelen-kelen bɔ bɔnsɔn kɛnu tɔ ka wo dɛnbɛ wɔlɛ kɛla. 19Kun-tigi min bɔra Yuda bɔnsɔn rɔ, wo le Yɛfunɛla dan Kelabu la. 20Kun-tigi min bɔra Simiyɔn bɔnsɔn rɔ, wo le Amihudila dan Sɛmuwɛli la. 21Kun-tigi min bɔra Bɛnyamɛ bɔnsɔn rɔ, wo le Kisilɔnila dan Ilaidadi la. 22Kun-tigi min bɔra Dan bɔnsɔn rɔ, wo le Yogolila dan Buki la. 23Kun-tigi min bɔra Manasa bɔnsɔn rɔ, wo le Ifɔdila dan Haniyɛli la. 24Kun-tigi min bɔra Ifɛrɛm bɔnsɔn rɔ, wo le Sifitanila dan Kɛmuwɛli la. 25Kun-tigi min bɔra Sɛbulɔn bɔnsɔn rɔ, wo le Panakala dan Ilaisefan la. 26Kun-tigi min bɔra Isakari bɔnsɔn rɔ, wo le Asanla dan Palɛtiyɛli la. 27Kun-tigi min bɔra Asɛra bɔnsɔn rɔ, wo le Sɛlimila dan Ahayihudi la. 28Kun-tigi min bɔra Nafatali bɔnsɔn rɔ, wo le Amihudila dan Pɛdahɛli la.”
29Kun-tigi wonu denu bi kɛnu na nde, Mari ya minnu yabɔ wo ye.
Currently Selected:
Yilan-Yilan Koe 34: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
