Yilan-Yilan Koe 31
31
Tayili-Sara-Koe Isirɛla Mɔgɛnu Bolo Midiyan Mɔgɛnu Na
1Mari ya a fɔ Musa ye ko, “Wo ni wo rabɛn kɛlɛ-kɛ-koe la. 2Wo ni ta Midiyan mɔgɛnu bira ka anu halaki kamasɔrɔn anu ya min ma nde, Mari la. Wo wa ban Midiyan mɔgɛnu kɛlɛla tumɛ min, wo kɔma, ile Musa si so-sɛgi-kɛ.”
3Musa ya a fɔ Isirɛla mɔgɛnu ye ko, “Wo ni wo rabɛn Midiyan mɔgɛnu kɛlɛ-koe la ka ma tayili sara Marita sɛnbɛ la. 4Kɛlɛ-dan mɔgɔ waga kelen-kelen ni bɔ Isirɛla bɔnsɔn bɛɛsi rɔ.”
5Bɔnsɔnnu ya kɛlɛ-dan wonu bɔ, wonu nakofunɛ yatɛ bɛnta mɔgɔ waga tan-ni-fila (12,000) ma. 6Musa ya Saraka-Masɔla Ɛliyasala dan Finihasi bi ka a sɔ mɔgɛ wonu yarɔ. Samani anu ni ta, Finihasi ya Marita bon-miran donu bi anubɛ burinu alako anu si mɔgɛnu nalɔn anu na. Musa ya anu nata kɛlɛ rɔ. 7-8Anu tara Midiyan mɔgɛnu kɛlɛ ka kei bɛɛsi faga, hali Midiyan mansa lolɛ minnu tɔgɛ le Ɛfi, Rɛkɛm, Suri, Huri, anubɛ Reba. Anu ya Beyorila dan Nɛbi Belam fanan faga.
9Isirɛla mɔgɛnu ya Midiyan musinu bira. Anu ya anuna dennɛnu anubɛ anuna kolo-fannu anubɛ anu bolo-fan mumɛ bɛɛsi bi. 10Wo kɔma, anu ya anuna soenu anubɛ anuna daga makɛ tinɛnu mintan gburr! 11-12Anu nara wo bɛɛsi la Musa anubɛ Ɛliyasa ma anuna dagɛ rɔ Mohabu lɛɛ rɔ Yorodan bɛ dafɛ Yɛrikɔ ya-telen ma.
Kɛlɛ-Dannu Sɛgi-Koe Musa Ma
13Nɛbi Musa anubɛ Ɛliyasa anubɛ Isirɛla mɔgɔ-banu tara kɛlɛ-kɛlɛnu nabɛn tinɛ kilɛ la tumɛ min, 14Musa diminyara kɛlɛ-den-kun-tiginu ma. 15A ya anu manyinika ko, “Nfen ya a to, wo ya musi kɛnu kɛndɛ to? 16#Yilan-Yilan Koe 25.1-9 Wo ya a lɔn serr, ko musi kɛnu denu bilara Nɛbi Belam kuman-kan fɛ alako mɔgɛnu ni Beyali kɔ Piyɔri kɔnkɛ kuma. 17Wo le ya a ma, Mari ya ata mɔgɛ donu faga wo wati rɔ. Wo ni Midiyan den-kei bɛɛsi faga anubɛ a musi minnu bara kei-koe lɔn. 18Kɔnɔ a sunkurun-mɛsɛnu anubɛ musi do minnu ma kei-koe lɔn bɛ, wo ni wonu kɛndɛ to wo nyɛrɛ ye. 19Wole minnu ya mɔgɛ faga kɛlɛ rɔ, anubɛ minnu ya anu bole tugu mɔgɔ-faganɛnu na, wonu ni to dagɛ kɔma. A tele sawɛ anubɛ a tele wɔrɔnfilɛ kɔrɔ, wonu ni sɛninya iko tɔn ya a fɔ nya min. Hali wo ya musi minnu bi wo nyɛrɛ ye fanan, wole damasi ni wo sɛninya iko tɔn ya a fɔ nya min. 20Fan minnu nadannɛ gbolo-kolonɛ la wo, baa-siyi la wo, kɔlɔma-malɛsɛnɛ la wo, anubɛ wola kurɛnu, wo ni wonu damasi sɛninya iko tɔn ya a fɔ nya min.”
21Ɛliyasa ya a fɔ kɛlɛ-dannu ye ko, “Tɔn le kɛnu na Mari ya min di Musa ma. 22-23Tɛ ti ke fan minnu mintanna iko sɛnɛ, wodi-gbɛ, silɛɛ, fukan, nɛgɛ anubɛ dandakuyi, wo si wonu sɛninya tɛ la. Wo kɔma, wo si Marita yi-sɛninyanɛ kɛ anu ma. Tɛ si ke fan minnu mintanna, wo ni wonu sɛninya sɛninya-yi la dɔrɔn iko tɔn ya a fɔ nya min! 24A tele wɔrɔnfila nyɔgɛ, wo si wola kurɛnu ku. Wo le si a ma, wo si sɛninya ka ta dagɛ rɔ iko Mari ya a fɔ nya min.”
Kɛlɛla Kolo-Fen Biranɛnu Tala-Koe
25Mari ya a fɔ Musa ye ko, 26“Ile anubɛ Ɛliyasa anubɛ Isirɛla bɔnsɔn-kun-tiginu, wo ni fan kɛnu dan anu ya minnu bira kɛlɛ rɔ, mɔgɛnu anubɛ kolo-fannu. 27Wo ni a ratala sigi tina fila la. Wo si a tɔnkɔn kelan di kɛlɛ-dannu ma. A tɔnkɔn kelen si to Isirɛla mɔgɛ toenu ye. 28Ni kɛlɛ-dannutɛ mara mɔgɔ kɛmɛ loli la, wo si kelen bi ka wo di nde, Mari ma. Ni a mara ninki kɛmɛ loli la, wo si kelen di nde ma. Ni a mara baanu na, wo si kelen di nde, Mari ma. Ni a mara sagɛnu na, wo si kelen di nde ma. Ni a mara sofɛlɛnu na, wo si kelen di nde, Mari ma. 29Wo ye kelen-kelen min dila, wo ni wonu don Saraka-Masɔla Ɛliyasa bolo ka wonu ma kɔ-fan la nde, Mari ye. 30Ni Isirɛla mɔgɛ toe wonu ya anutɛ wo rasigi bi-loli bi-lolinyɛ ma, anu si kelen-kelen bɔ wonu tɔ ka wonu di nde ma, a mara mɔgɔ la wo, a mara kolo-fan la wo. Wo si wonu di Lifayi mɔgɛnu ma minnu bi ndeta wɔlɛ kɛla Fani-Bɔn kɛ la.”
31Musa anubɛ Ɛliyasa ya wo bɛɛ ma iko Mari ya a fɔ anu ye nya min.#31.31 Fasi kɛnu donta fasi 47 kɔma. 36-40Kɛlɛ-dannu ya sagɛ anubɛ baa minnu yatɛ sɔrɔn, wo bɛnta waga kɛmɛ sawa ani waga bi-sawa, waga wɔrɔnfila, kɛmɛ loli (337,500) ma. Anu ya kɛmɛ wɔrɔ ani bi-wɔrɔnfila ani loli (675) bi wonu tɔ ka a di Mari ma. Anu ya ninki minnu yatɛ sɔrɔn, wo bɛnta waga bi-sawa ani waga wɔrɔ (36,000) ma. Anu ya ninki bi-wɔrɔnfilɛ ani ninki fila (72) bi wonu tɔ ka wonu di Mari ma. Anu ya sofɛlɛ minnu yatɛ sɔrɔn, wo bɛnta waga bi-sawa ani kɛmɛ loli (30,500) ma. Anu ya sofɛlɛ bi-wɔrɔ ani kelen (61) di Mari ma. Anu ya sunkurun-nasɔlɔnɛ minnu yatɛ sɔrɔn, wo bɛnta mɔgɔ waga tan-ni-wɔrɔ (16,000) ma. Anu ya mɔgɔ bi-sawa ani mɔgɔ fila (32) di Mari ma. 41Musa ya fan kɛ mumɛ di Ɛliyasa ma iko Mari ya a fɔ a ye nya min.
42-46Mɔgɛnu ya minnu sɔrɔn anubɛ kɛlɛ-dannu ya minnu sɔrɔn, wonu takɛn de! 47Musa ya kelen-kelen bi mɔgɔ bi-loli bi-lolinu tɔ. Wo kɔma, a ya kelen-kelen bɔ kolo-fen bi-loli bi-lolinu tɔ ka wonu di Lifayi bɔnsɔn-mɔgɛnu ma minnu bi Marita Fani-Bɔn-wɔlɛ kɛla.
32-35Kɛlɛ-dannu ya fan minnu bira kɛlɛ rɔ, wonu yatɛ le kɛnu na. Hali anu ya minnu bi anu nyɛrɛ ye, wonu bɔnɛ a la. Sagɛnu anubɛ baanu, wonu yatɛ bɛnta waga kɛmɛ wɔrɔ, waga bi-wɔrɔnfila ani waga loli (675,000) ma. Ninkinu yatɛ bɛnta waga bi-wɔrɔnfila ani waga fila (72,000) ma. Sofɛlɛnu yatɛ bɛnta waga bi-wɔrɔ ani waga kelen (61,000) ma. Sunkurun-nasɔlɔnɛnu yatɛ bɛnta waga bi-sawa ani waga fila (32,000) ma.
48Kɛlɛ-den-kun-tiginu nara anu dantɛgɛ Musa ye. Anu ko, 49“N fa, ma ara kɛlɛ-dannu dan. Hali mɔgɔ kelen ma tunu ma rɔ. 50Woletɔ ma ara sɛnɛ minnu sɔrɔn kɛ la, ma si na matɛ wonu di Mari ma. Ma ya sɛnɛ bolo-kalama-dɛɛnnu sɔrɔn, anubɛ sɛnɛ-dɛɛn-kɔlɔnɛnu, anubɛ sɛnɛ-forenu anubɛ sɛnɛ kanna-fannu, anubɛ sɛnɛ-mɔlɔnɛnu anu si minnu sa anuna durukinu ma, ma si wonu di Mari ma alako ma hakɛ yama ni togon.” 51-52Kun-tigi wonu ya sɛnɛ minnu sɔrɔn kɛlɛ rɔ, anu ya wonu nabɔ. Musa anubɛ Ɛliyasa ya sɛnɛ wo bɛɛsi bira. Wo mumɛ lakofunɛ gbiliyɛ manɛ le iko yi kalɔn bi-sawa ani lolɛta gbiliyɛ ye nya min. 53-54Musa anubɛ Ɛliyasa ya sɛnɛ-gbilimɛ wonu bi ka ta a la Marita Fani-Bɔn la alako Mari ni a miri anu ma. Kun-tigi ma minnu na, wonu ya anu bolo-fannu namara anu nyɛrɛ ye.
Currently Selected:
Yilan-Yilan Koe 31: KCLB
Highlight
Copy
Compare
Share
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
