Saraka-Masɔlɛnuta Tɔnnu 26

Kuma-Birɛ anubɛ Duwɛ

(Tɔn-Fɔɛ-Fila-Nyɔgɛ 7.12-24; 28.1-14)

1 # Bɔ-Koe-Iyipiti 20.4; Saraka-Masɔlɛnuta Tɔnnu 19.4; Tɔn-Fɔɛ-Fila-Nyɔgɛ 5.8; 16.21-22; 27.1 Mari ya a fɔ Musa ye ko, “Wo kana kuri malɛsɛ ka a kɔ bawo nde nyɛrɛ-nyɛrɛ le wota Mari Alla la. 2Wo ni ladɛn-telenu gbiliya, wo ye n batola minnu ma, kɔni. Wo ni nta Fani-Bɔn fanan gbiliya. Nde le wota Mari Alla la.

3 # Tɔn-Fɔɛ-Fila-Nyɔgɛ 11.13-15; 28.1-14 “Ni wo ya nna tɔn damasi bira a kila-bɛrɛbɛrɛ fɛ, n ti bandan ko-nyimɛ kɛla wo ye. 4N si bandɛ lana a tumɛ rɔ woletɔ wola ki-fannu si nanfa dugi rɔ a kilɛ fɛ. Wola kɔlɔmanu fanan si gbɔ-siyaman kɛ. 5Wola dɔn-fannu ti dasa wo ma. Wo si to wola ki-fannu tɛgɛla ha kɔn-gbɔɛnu keri-wati. Wo si to kɔn-gbɔɛnu fanan kerila ha wola ki-fen-kurɛnu ki-wati. Wo si to sigini nyɔ rɔ lafɛrɛ anubɛ yisi-kimɛ rɔ.

6“Wo si kinɔgɔ wo fanbolo. Mɔgɔ-wo-mɔgɔ ti ke wo makilanna. N si sogo-yogomɛnu nabɔ wola nyamanɛ rɔ. Wo ti kɛlɛ sɔrɔn tun wola nyamanɛ rɔ. 7Wo si nɔ-ko sɔrɔn wo yoge damasi kuma. 8Wole mɔgɔ loli si ke le mɔgɔ kɛmɛ gbesila. Wo mɔgɔ kɛmɛ si ke le mɔgɔ waga tan forondola. 9N si to duwala wo ye alako wo ni yiri bui! Ma ara lanyiri min kiri ma nyɔgɔn tɛma wona, nde si n baralɛ latɔnbagaya. 10Wo tenbi wola dɔn-fen-kurɛnu tɛgɛla, wo si a kɔrɔmɛnu nabɔ bɔn la ka a kurɛnu nadon. 11N si to wo fɛ nta Fani-Bon-sɛnimɛ burɔ. N ti wo boloka mumɛ! 12#2 Kɔrɛnti 6.16 N si ma wota Alla la, wole si ma nta mɔgɛnu na. 13N nara wo la ka bɔ Iyipiti alako wo kana ma yɔɔnnu na tun. N bara wo kunyɛ bɔ gbaran rɔ ka wo hɔrɔya. Wo ye tagamana iko dunu-gbilimɛ wa bɔ mɔgɛ min kuma.”

Kuma-Birabɛliyɛ anubɛ Tɔrɔyɛ

(Tɔn-Fɔɛ-Fila-Nyɔgɛ 28.15-68)

14Mari ya a fɔ anu ye tun ko, “Ni wo ma nna tɔnnu bira, wo si tɔrɔyɛ sɔrɔn. 15Ni wo ma sɔn ka nta sereya kɛnu bira, ni wo ya wota sarama-kan tinya min bi ma tɛma wona, 16n si wo tɔrɔya. N si yakɔrɔ-mamɔɛ lana wo kuma iko kiraya-yogomɛ sufa min ti dandan, anubɛ fɛrɛma-kaliyɛ min si wo fiyonya ka wo bara wao! Wo si wola suginu fui kɔnɔ wo ti fenfen sɔrɔn bawo wo yogenu si bui wo ma ka wola dɔn-fen-sabatinɛnu bi wo bolo ka ta anu na. 17Nde nyɛrɛ si n kan-kɔ sɔ wo la. Wo yogenu si nɔ-ko sɔrɔn wo ma. Wo ma di mɔgɛ minnu ye, wonu si wo lamara. Wo si ma yutoenu na. Hali mɔgɔ sa wo gbenna, wo si wo buri.

18“Hali n bi kɛ dama mala wo la, ni wo ma nna sereyanu natɔnbagaya, n si wo tɔrɔya ka tenbi a fɔlɔtɛ la. 19Ni wo ya wo nyɛrɛ kɔrɔbi, n si na n bɔ wo kɔrɔ. N ti bandɛ lana wo ye woletɔ wola duginu si gbɛlɛya iko fara-kole. 20Wo ye wɔli-gbɛlɛmɛ minnu kɛla, fenfen ti bɔ wonu tɔ bawo wola fui-fannu anubɛ ki-fen-gbɔɛnu ti sabati dugi rɔ.

21“Hali wo, ni wo ma wo kɛ-nya yɛlɛma n bara la, wo ma sɔn ka nna tɔnnu bira mumɛ, n si wota tɔrɔyɛ lagbɛlɛya ka tenbi a fila nyɔgɛ la. 22N si sogo-feremɛnu nana wo tɛma. Wonu si to wola dannu fagala. Anu si wola kolo-fannu kasara. N si wo madɔgɔya hali wola kila-kunyɛ na si kolonya fiyon!

23“Ni n ya tɔrɔya su kɛ bɛɛsi lana wo kuma, hali wo, wo ma yɛlɛma ka kalabanteyɛ boloka, 24n si ma wo yoge la. N si n yɛ lamunun wo la ka kɛ wo ma taragba ka a lagbɛlɛya wo kuma gben! N si wo tɔrɔya kɛ rɔ ka tenbi a sawa nyɔgɛ la. 25N si mɔgɛnu nana wo tɛma ka wo kɛlɛ. Wonu si wo tɔrɔya bawo wo ara sarama-kan tinya min bi ma tɛma wo na. Hali wo ya wo ladɛn wola soenu tɔ alako wo ni kisi wo yogenu ma, n si kiraya-yogomɛ lana wo tɛma min ti dandan muk! Wo ra si nama anu kɔrɔ ka wo nyɛrɛ don anu bolo. 26N si a ma, wola dɔn-fannu ni dɔgɔya. Hali denbaya kelan duruta dɔn-fan tela daga kelan min tɔ, n si a ma, denbaya tan mɔgɛnu ni dɔn-fan te daga kelan wo rɔ anu nyɔgɔn fɛ. Wo wa a tala wo nyɔgɔn tɛma, a ti a bɔ. Wo dama kɔnkɔtoe si to.

27“Ni wo ya wo mun tɔrɔyɛ kɛ dama kɔrɔ, ado wo yisi-gbɛlɛyanɛ ni to ka a dan-natenbi, wo ma nna tɔnnu bira, 28n fonde si bɔ wo kuma ka tenbi a nani nyɔgɛ wo la. 29Kɔnkɛ si wara wo kuma ha wo si wola dannu dɔn. 30Wo si wola isɛnti mintan wola bɛsɛnu bi kan min, nde si kan tinɛ wonu tinya ka wo furinu nakɛ wola bɛsi-tinyanɛ wonu kuma. Wo wara-koe si gboya n ye. 31N si wola soenu bira ka anu kasara. N si wola bɛsi-kɔ-tinɛ bɛɛsi tinya fanan. Hali wo ya sarakɛnu bɔ n ye, n ti sɔn anu na. Anu mintan-sumɛ ti diya n ye muk! 32N si wola nyamanɛ duginu tinya, hali wo yogo minnu bi nala anu sigila wo gbɛ rɔ, wola dugi wo tinya-nya si ma latɛrɛna-koe la anu fanan bolo. 33N si wo yogenu nana ka wo kɛlɛ ka wo bira ka ta wo la nyamanɛ siyamɛnu tɔ. Wola nyamanɛ rakolɔn si to. Wola soenu si ma iko tonbon-kɔrɛnu. 34-35Kɔnɔ yanni wo yogenu ni wo bira, san-wɔrɔnfila wo san-wɔrɔnfila, wo ti sɔn wola nyamanɛ ni a sulen wo bolo. Wo tumɛ wo ye wo yogenu bolo kan-tina-gbɛrɛkɛnu tɔ, wola nyamanɛ si a sulen wo kɔma.

36“Wo tumɛ wo ye nyɔ rɔ, wo si to yutoyɛ rɔ. Hali fɔnyɔ wa yanba-kunyɛnu namaga, wo si wo buri a kɔrɔ. Wo si to wo burila ka bui kilan bolo. A mani de iko wo yogenu denu bi wo kɔma kilɛ la. 37Hali mɔgɔ sa wo kɔma, wo si to wo kiannu nakɔla wo nyɔgɛ na ka bui buri-kɛ-tinɛ. Wo yoge minnu bi wo sagaranna, wo ti ke wonu kɛlɛla. 38Wo si to fagala nyamani-gbɛrɛkɛnu tɔ wo yogenu bolo. Wonu si wo ki iko bɛniki-kalɛnu. 39Wo toe minnu basannɛ wo yogenu na, wonu baranɛ si belenna tagamana wo yogenu tɛma kamasɔrɔn wo benbanu anubɛ wole fanan hakɛ sebu la.

40-41“Bawo wo si wo nyɛrɛ porokɔlɔ n bolo ka murutiya n ma woletɔ wo ti ma n diyana-mɔgɛnu na wo rɔ tun. Nde si ma wo yoge la gbɛ! N si wo latuntun wo yogenu ma ka ta wo la pon! Kɔnɔ n ba a yen n bara tɔrɔyɛ min nana wo kuma, wo ara koloya ha wo ara wo kegeyɛnu famayigi alako anu ni anu sɔ anu hakɛ la anubɛ anu benbanu ya min tinya. 42#Ko-Dabirɛnu 17.7-8; 26.3-4; 28.13-14 Ni anu ya wo ma, n si n miri nta lanyiri ma n ya min kiri Iburayima, anubɛ Isiyaka anubɛ Yakoba ye. N si nta lanyiri kɛ ma a kurɛ la wo kegeyɛnu ye ka wola nyamanɛ lasɛgi anu ma tun. 43Kɔnɔ a fɔlɔfɔlɛ, fɔ wo ni nyamanɛ wo boloka, woletɔ nyamanɛ si a sulen bɛrɛbɛrɛkɛ. N bara tɔrɔyɛ min bɛɛsi lana wo kuma wola kalabanteyɛla ko la, fɔ wo kegeyɛnu ni anu munyu wo damasi kɔrɔ. 44Hali anu tenbi tɔrɔyɛ rɔ anu yogenu bolo, n ti anu boloka feufeu ka anu nato dogbe! Ni n ya wo ma, lanyiri min bi ma tɛma worɔ, wo ara tinya. Wo tigi le nde, Mari Alla la min si lanyiri latɔnbagaya. 45N ya lanyiri kɛ kiri wo ye, wole min bɔra Iyipiti ka nta fanka yira duninya la wati wo. N ya wo damasi ma alako nde ni ma wota Alla la. N si wo lanyiri kiri wo kegeyɛnu ye ka a ma a kurɛ la tun.”

46Tɔn kɛnu anubɛ sereya dira Musa ma Sinayi kɔnkɛ kuma Isirɛla mɔgɛnuna ko la.

Currently Selected:

Saraka-Masɔlɛnuta Tɔnnu 26: KCLB

Highlight

Copy

Compare