Saraka-Masɔlɛnuta Tɔnnu 25

Nyamanɛ Sulen-Koe a San Wɔrɔnfilɛ Ma

(Tɔn-Fɔɛ-Fila-Nyɔgɛ 15.1-11)

1 # Bɔ-Koe-Iyipiti 23.10-11 Wo tumɛ Musa ye Sinayi Kɔnkɛ kuma, Mari ya a fɔ a ye nyɔ ko, 2“I ni nna sarakanɛ kɛnu natenbi Isirɛla mɔgɛnu ma ko n bi nala Kenan nyamanɛ min dila wo ma, ni wo donta nyɔ rɔ tumɛ min, wo si to wɔlila dugi rɔ ha san wɔrɔ. Kɔnɔ a san wɔrɔnfila nyɔgɛ, wo kana dugi wo rasin. Wo ni wo ma ka ndeta gbiliyɛ yira n na. 3San wɔrɔ kɔrɔ, wo si wola ki-fannu ki ka anu fɛ-bira ka anu tɛgɛ 4kɔnɔ a san wɔrɔnfila nyɔgɛ ma, wola duginu ni anu sulen wo rɔ. Wo si wola duginu dantɛgɛ nde, Mari ma a san wɔrɔnfila nyɔgɛ wo ma. Wo kana wola suginu fui san kɛ la dugu ma hali ka wola ki-fannu fɛ-bira. 5Wo kana wola dɔn-fen-banannu tɛgɛ anu mayira-koe la san kelan kɛ la. Wo kana wola kɔn-gbɔɛnu keri anu mayira-koe la san kelan kɛ la fanan. Kɛ si ma dugi nyɛrɛ rasulen-san la. 6-7Dɔn-fan minnu bi bɔla dugi rɔ san wo la, mɔgɔ kelenta ma wonu na. Wo ye mɔgɛ bɛɛsi le ye. San wo la, nyamanɛ wo fen sa mɔgɔ kelen ye. Fen-tigi si do sɔrɔn a rɔ, ala yɔɔnnu si do sɔrɔn a rɔ, ala wɔli-kɛlɛnu si do sɔrɔn a rɔ, ala sundannu si do sɔrɔn a rɔ, ala kolo-fannu si do sɔrɔn a rɔ, hali sogo-feremɛnu si do tinya a rɔ. San kelan kɛ la, fen-tigi anubɛ bolo-kolɔn takɛn.#25.6 Fasi 8 si taran fasi 22 kɔma.

20“Ni mɔgɛ do ya nyinikalɛ kɛ sa ka a fɔ ko, ‘Ni mɔgɔ-wo-mɔgɔ sa dɔnta fuila ka a siyaman tɛgɛ, ma si ke fan dɔnna kama san wɔrɔnfila nyɔgɛ kɛ ma?’ A tigi si a yabi ko nde, Mari si duwɛ layigi dugu-kole kuma a san wɔrɔ nyɔgɛ ma. 21San wɔrɔ nyɔgɛ wo ma, nde, Mari si dɔnta siyaman natasakara wo ma min si wo wasa san sawa kɔrɔ. 22Hali wo tenbi wɔlila a san segin nyɔgɛ ma, wola dɔn-fen-kɔrɔmɛ si taran wo bolo. Wo si to dɔn-fen-kɔrɔmɛ dɔnna ha wo si dɔn-fen-kurɛ tɛgɛ a san segin nyɔgɛ ma.

Mɔgɔ Halala-Fan-Lasɛgi-San

8“San wɔrɔnfilɛ sigi tinɛ wɔrɔnfila, wo le bɛnnɛ san bi-nani san kɔnɔntɔ, a san kɔnɔntɛ wo karɛ wɔrɔnfilɛ tele tan ma, 9wo si mɔgɛnu nawuli ka belenna buri fɛla nyamanɛ kan-tinɛ bɛɛ rɔ. Tele kɛ si ma wo Hakɛ-Yamatogon-Tele la. 10San bi-loli wo san bi-loli si ma san-yabɔnɛnu na minnu dantɛgɛnɛ nde, Mari ma. San wo la, bɛɛ halala-fen-kɔrɛ si sɛgi a tigi fɔlɔtɛ ma. 11San wo nyɛrɛ la, wo kana wola suginu fui anubɛ ka wola ki-fen-banannu tɛgɛ a mayira-koe la. Wo kana wola kɔn-gbɔɛnu keri a mayira-koe la. 12Kɔnɔ wo si min dɔn san wo la, fɔ ki-fen-banannu dɔrɔn. San kɛ si ma san-sɛninyanɛ la wo ye.

13“Wo ara wola dugi minnu mayira wo ta-nyɔgɛnu ma nun, san wo la, bɛɛtɛ si sɛgi a ma iko ile Musa si na a tala wo la nya min. 14Kɔnɔ n bara min fɔ nun, wo ni wo hɛnkili to wo ko. Min tenbi ata dugi mayirala a ta-nyɔgɛ Isirɛla mɔgɛ do ma, a kana a dɛ lagbɛlɛya a kuma. 15Min tenbi ala wɔli-kɛ-tinɛ mayirala a ta-nyɔgɛ do ma, a ni a miri a ta-nyɔgɛ si san min nyɔgɔn tɔnɛ sɔrɔn ala ki-fan wonu tɔ yanni dugi ni sɛgi a tigi fɔlɔtɛ ma. 16Ni san siyaman tonɛ yanni ala wɔli-kɛ-tinɛ ni sɛgi a ma, a si a dɛ lagbɛlɛya iko san wonu yatɛ ye nya min. Ni san siyaman toni ma tun, a si a dɛ mayigi a ye. Dugu-tigi si ala dugi dɛ fɔ iko dugu-sannɛ si san min nyɔgɔn wɔlɛ kɛ a rɔ. 17Wo kana wo na-kelen-nyɔgɛ Isirɛla mɔgɛnu kensunya. Wo ni kilan nde, Mari Alla la min ya kɛ fɔ.#25.17 Fasi 18 si taran fasi 28 kɔma.

Mɔgɔ Halala Dugi Kunka-Koe

23“Wo kana wola duginu mayira wo ta-nyɔgɛnu ma alako a ni to anu bolo habadan bawo wota ma. Nde, Maritɛ le dugi mumɛ bɛɛ la. Ile mintan a la, i mani de iko sundan kɔnɔ n sɔnta a ma i ni wɔli a rɔ.

24“Ni min ya dugi san i ma, a ni a miri a ma ko a wati wa ke, a si a lasɛgi i ma tun. 25Ni Isirɛla mɔgɛ min bolo-kolonyara ha a ni ala dugi mayira nɔnfulu-tigi do ma, ni bolo-kolɔn wo na-kelen-nyɔgɛ do ya kalasɔrɔn dugi wo mayira-koe ma, yoe ye ale fanan bolo ka a na-kelen-nyɔgɛla dugi kunka. 26Ni bolo-kolɔn wo na-kelen-nyɔgɛ sa nyɔ min si ke ka ala dugi kunka a ye kɔnɔ tɔ-a-la, ale ni fen sɔrɔn, yoe ye ale fanan bolo worɔ ka kei wola wodi do lasɛgi a ma. 27Ka a bi wati wo ma ka a sigi Mɔgɔ-Halala-Fan-Lasɛgi-San la, san min nyɔgɔn tonɛ, a si wo nyɔgɔn wodi di a ma. 28Kɔnɔ ni fen sa ale fanan bolo, fɔ a ni a munyu. Nɔnfulu-tigi min ya a san a ma worɔ, a si to wo bolo ha Mɔgɔ-Halala-Fan-Lasɛgi-San wa ke. San wo wa ke, dugi wo si sɛgi ale dugu-tigi ma tun.

18“Ni wo ya nna tɔn kɛ damasi bira, wo si ke worɔ ka sigi yisi-kimɛ rɔ nyamanɛ wo rɔ. 19Wo si dɔn-fen siyaman sɔrɔn dugi wo rɔ ka tagba wo ma. Wo ti yakɔrɔ-mamɔɛ sɔrɔn nyamanɛ wo rɔ.

Mɔgɔ Halala Bɔn Kunka-Nya

29“Ni tarɛ mininɛ soe do ma mɔgɛ dola bɔn ye nyɔ, a ni bɔn wo mayira nɔnfulu-tigi do ma, yoe ye ale bon-tigi bolo san kelen wo kɔrɔ ka ala bɔn wo kunka. 30Kɔnɔ ni a ma ke ala bɔn wo kunkala san kelen wo kɔrɔ, a ti yo sɔrɔn bɔn-sannɛ wo ma tun. Mɔgɛ min ya a san wo la, bɔn wo ti bɔ ale anubɛ a kegeyɛnu bolo tun, hali Mɔgɔ-Halala-Fan-Lasɛgi-San wa ke, a la ti sɛgi a tigi ma tun.

31“Tarɛ minini ma soe min ma, bɔn minnu bi nyɔ, wo si wonu bira iko wola wɔli-kɛ-tinɛnu. Ni wo do tigi ya a mayira nɔnfulu-tigi do ma, yoe ye a bolo ka a kunka a ma tun. Ni a ma ke a kunkala, a la si sɛgi a ma le Mɔgɔ-Halala-Fan-Lasɛgi-San wo la.

32“Kɔnɔ Lifayi bɔnsɔn-mɔgɛnu ti a ma ka. Anu bi nala anuta soe minnu sɔrɔnna, ni anu ya anuta bɔn donu mayira nɔnfulu-tigi donu ma, wo yoe ye anu bolo ka bɔn wonu kunka tun. 33Ni anu ma ke bɔn kunkala, san bi-loli nyɔgɛ kɛ ma, anu si anu nasɛgi anu ma tun. Lifayi bɔnsɔn-mɔgɛnutɛ ye bɔn minnu na yɛ, anuna soenu tɔ, wonu si sɛgi anu ma le bawo anu halalɛ le wonu na Isirɛla mɔgɛnu tɛma. 34Kɔnɔ anuna kolo-fen dɛ nyini tinɛnu min bi anuna soenuna foolɛnu tɔ, anu kana wonu mayira dɛɛ bawo anu halala-bɛrɛbɛrɛ le wonu na.

Sigi-Nyɔgɛ Dɛnbɛn-Koe

35 # Tɔn-Fɔɛ-Fila-Nyɔgɛ 15.7-8 “Ni min sigi-nyɔgɛ bolo kolonyara, ado a ti ke a nyɛrɛ makoe nyinyala, yanni a ni ala dugi mayira mɔgɔ-gbɛrɛkɛ ma, fɔ i ni i sigi-nyɔgɛ dɛnbɛ a makoe wonu tɔ. Wo le si a ma, a si to i dafɛ. 36-37#Bɔ-Koe-Iyipiti 22.25; Tɔn-Fɔɛ-Fila-Nyɔgɛ 23.19-20 Ni i ya a dɔndɔ min na, i kana tɔnɛ sa wo kuma. Ni i ye ila dɔntɛ mayirala a ma, i kana tɔnɛ sa wo fanan kuma. Wo ni kilan nde, Alla la ka wo sigi-nyɔgɛnu fɛ-bira. 38Nde, Mari Allata tɔn le kɛ la min siginɛ wo kuma bawo nde le ya wo labɔ Iyipiti nyamanɛ rɔ ka Kenan nyamanɛ di wo ma alako n ni ma wota Alla la.

39-43 # Bɔ-Koe-Iyipiti 21.2-6; Tɔn-Fɔɛ-Fila-Nyɔgɛ 15.12-18 “Ni wo sigi-nyɔgɛ Isirɛla mɔgɛ do bolo-kolonyara, ni wo tara ile nɔnfulu-tigi wara ka a nyɛrɛ sigi tulumɛ la i ma, i kana a lawɔli iko yɔɔn bawo ndeta yɔɔn le wole Isirɛla mɔgɛnu na. Nde le ya wo labɔ Iyipiti woletɔ wo kana wo nyɔgɔn mayira iko yɔɔn. Wo kana wo nyɔgɔn bira boloko-yogomɛ-kɛ iko yɔɔn. Wo ni kilan nde, Alla la min ya wo hɔrɔya. I ni a lawɔli iko ila wɔli-kɛlɛ min bi a sarɛ sɔrɔnna, ado a si to wɔlila i ye ha Mɔgɔ-Halala-Fan-Lasɛgi-San wa ke. San kɛ nyɛrɛ wa ke, anubɛ ala denbayɛnu si bɔ i kɔrɔ. Anu si ta anu sigi anu kebila-mɔgɛnuna dugi rɔ min dira anu bɔnsɔn ma nun.

44“Kɔnɔ ni min bi nyinina yɔɔn ma, anu si sibolo-gbɛrɛ san ka bɔ soe wonu tɔ minnu bi wola nyamanɛla foolɛ rɔ. 45Sibolo-gbɛrɛ minnu fanan basannɛ wola nyamanɛ la, wo si wonuna dannu san de! 46Ni wo ya den sufa wonu san, wonu si ma le kɛɛ la wo si min to wola dannu anubɛ wo kegeyɛnu bolo. Wonu si to yɔɔnyɛ rɔ wola dannu kɔrɔ ha wonu si faga. A wa gbɛlɛya i kuma nya-wo-nya, i kana i na-kelen-nyɔgɛ Isirɛla mɔgɛ do bira iko yɔɔn.

47“Ni a taranta, sibolo-gbɛrɛ do siginɛ wo tɛma, fan bi min bolo, a ni a taran fanan, wo na-kelen-nyɔgɛ Isirɛla mɔgɛ do bolo-kolonyara, ni wo ya a nyɛrɛ sigi tulumɛ la sibolo-gbɛrɛ wo ma wole do yala, 48yoe ye Isirɛla mɔgɛ wo do bolo ka a na-kelen-nyɔgɛ wo kunka sibolo-gbɛrɛ wo ma. 49Ni a mara a berin do la, wo si ke le ka a kunka. Ni a mara a fa do le la, wo si ke le ka a kunka. Ni a mara a kebila-mɔgɛ do le la anubɛ min gbɛrɛnnɛ anu nyɔgɔn ma, wo fanan si ke le ka a kunka. Kɔnɔ ale min ya a nyɛrɛ sigi tulumɛ la sibolo-gbɛrɛ wo ma, ni ale ya nɔnfuli sɔrɔn tɔ-a-la, a si ke le ka a nyɛrɛ kunka. 50A wa fen sɔrɔn, a si a gbɛrɛn a tigi wo ma ka kuma a la. Anu mɔgɔ filɛ si sigi ka san dan ka a dabira a ya a nyɛrɛ sigi tulumɛ la san min na ha ka a sigi Mɔgɔ-Halala-Fan-Lasɛgi-San ma. Wo kɔma, anu si san kelen-kelan wo dɛ fɔ iko wɔli-kɛlɛ bɛnta ka min nyɔgɔn sɔrɔn-san kelen kɔrɔ. 51-52Wo kɔma, ka a bi a ye a nyɛrɛ kunkala san min na ha ka a sigi Mɔgɔ-Halala-Fan-Lasɛgi-San la, a si wo nyɔgɔn wodi lasɛgi sibolo-gbɛrɛ wo ma 53iko wɔli-kɛlɛ bɛnta ka min nyɔgɔn sarɛ sɔrɔn san kɔrɔ. Hali wo mumɛ bɛɛ rɔ, ale sibolo-gbɛrɛ kana a bira-bole layogoya. 54Kɔnɔ ni Isirɛla mɔgɛ wo ma ke a nyɛrɛ kunkala, ado mɔgɔ sa a bolo min si a kunka sibolo-gbɛrɛ wo ma, Mɔgɔ-Halala-Fan-Lasɛgi-San wa ke tumɛ min, anu si bɔ kei wo kɔrɔ ka to anu nyɛrɛ ma. 55N bi a fɔla wo ye, Isirɛla mɔgɔ ti ma yɔɔn la mumɛ bawo nde, Mari le nara wo la ka bɔ Iyipiti nyamanɛ rɔ ka wo ma nta yɔɔnnu na. Wo tigi Mari Alla le nde la.”

Currently Selected:

Saraka-Masɔlɛnuta Tɔnnu 25: KCLB

Highlight

Copy

Compare